¹ Mpawo Bbilidadi mu Syuli wakasandula wakati, ² ''Uyoowumuna lili kwaambula kwako? Yeesesya, mpawo musule tuyoowambuula. ³ Nkaambonzi nitubwezwa mbuli ng'ombe, bafubafuba kumenso aako? ⁴ Iwe nooliyawuula mubunyeme bwako, kujana nyika yasiilwa nduwe na nikuba mabwe kugwisigwa aamasena aawo? ⁵ Nchobeni mumuni wamuntu mubi uyoozimwa; nsasi yamulilo wakwe tikoyoomweka pe. ⁶ Mumuni uyoodimaana mutente lyakwe; lampi lyakwe aajulu alinguwe liyoozimwa. ⁷ Ntaamo zyamanguzu aakwe ziyoofwinsigwa; mabambe akwe mwini ayomuwisizya aansi. ⁸ Nkaambo uyoowaalilwa mukazamba amawulu akwe mwini; uyoowida mugodi. ⁹ Chiteezyo chiyomucha kasindi; kakole kayoomujata. ¹⁰ Kkole lyabufwizyo linoosisilidwe nguwe aansi; alimwi chiteezyo munzila. ¹¹ Njoosyo ziyoomuyoosya mabbazu woonse; ziyoomutandaania kutusindi twakwe. ¹² Buvubi bwakwe buyooba nzala, anguzuuzu kubbazu lyakwe. ¹³ Zizo zya mubili wakwe ziyoolyigwa; nchobeni bulwazi bupati buyoolya zizo zya mubili wakwe. ¹⁴ Wazavuulwa kuzwa ku bulondozi bwatente lyakwe akwiinkisigwa ku mwami wa njoosyo. ¹⁵ Bantu batali nzubo zyakwe bayookkala mutente lyakwe baakubona kuti salufa ulimwaywidwe mumunzi wakwe. ¹⁶ Miyanda yakwe iyooyumisigwa munsi; aajulu ntabi zyakwe ziyoogonkwa. ¹⁷ Kuyeeyegwa kwakwe kuyoomana munyika; takoyooba ezina pe mumigwagwa. ¹⁸ Uyowandwa kuzwa mumumuni kuya mumudima alimwi uyowandwa kuzwa munyika eeyi. ¹⁹ Takwe bana na lunyungu aakati kabantu bakwe, takwe wakasyaala kapona ooko nkwakali wakkala. ²⁰ Aabo bakkala kumbo bayooyosegwa kulizeezyo zitakachitike kulinguwe limwi zuba; aabo bakkala kujwe bayookankabala anchicho. ²¹ Nkasimpe mbiibede myuunzi yabantu batasalali, masena abaabo batazi Leza.''