¹ Mpawo Jobbu wakasandula wati, ² ''Ndakamvwa zyiingi zintu ziliboobu; monse muli basikundumbulizya buyo batagwasyi. ³ Eno majwi abuyo ayoba aampamanina na? Nchinzi chinyonyongene kuli nduwe chipa kuti usandule boobu? ⁴ Ambebo ndali kwambula mbuli mbochita, niinga wali muchiimo changu, ndali kubwezelela akuswanizya majwi antomwe kukukazya akuguna akutikinia mutwe wangu kukuninda kwako. ⁵ Ndalikuno kusimya amulomo wangu, akukankama kwamulomo wangu kuyokweetela kulyokezya! ⁶ Kuti ndaambula, kuusa kwangu takuchesegwi; na ndalilesya kwambula, ndagwasigwa biyeni? ⁷ Pesi lino, Leza, wandichita ndawizuka; wachita bang'anda yangu tongo. ⁸ Wandichita kuti ndiyuminine, eechi chalo mbukamboni bundilwana; kukotela kwamubili wangu kulandibukila, akundibeda kamboni bundikazya. ⁹ Leza wandikwamuna mukunyema kwakwe akundipenzya; wandilumina ntwiino mubunyeme, sinkondoma ulandilangisisya nalokundikwamuuna. ¹⁰ Bantu bakandilanga kabeeseme, bakanduuma kuseya chakundisoka; bakandibunganina chakundilwisya. ¹¹ Leza wandaaba kubantu batakwe Leza, alimwi undisowela mumaanza abasizibi. ¹² Ndakakkede obotu, we wandikwamuuna akkati. Iyi, wandijata munsingo akupwaya ndazapuuka; alimwi wachita chipimyo chakwe. ¹³ Basitunta balindizyungulukide; Leza uyasa insa zyangu alimwi tandileki; utila mululwe wangu aansi. ¹⁴ Uladinka bulambo bwangu chakwindulula, ulachijana alindime mbuli silumamba. ¹⁵ Ndasuminina masaka achikanda changu. Ndayasa lwija lwangu aansi. ¹⁶ Busyu bwangu bwasalala akukwila; munkowe zyangu muli mwenzule walufu ¹⁷ nikuba takwepe lupyopyongano mumaanza angu, alimwi inkombyo yangu ilasalala. ¹⁸ Yomusele, utavumbi bulowa bwangu; kulila kwangu kutabi abusena bwakulyokeezezya. ¹⁹ Nikuba lino, bona, bukamboni bwangu bulikujulu; oyo undiminina ulikujulu. ²⁰ Benzuma balandiseka pele menso aangu atila misozi kuli Leza. ²¹ Ndakumbila kamboni ulikujulu kuti akkazizye muntu oyu a Leza mbuli muntu mbwachita angwayakilene awe! ²² Nkambo elyo yayinda minyaka miche biyo, Ndiyoyinka kubusena oko nkwesikabule kuyoboola.