¹ Mpawo Elifazi muTemanayiti wakasandula kati, ² ''Kulelede na kuti muntu musongo asandule anzila ilaluzibo lutagwasyi alimwi alizuzuzye amuuwo wakujwe? ³ Kulelede na kuti abuzyanie twambo tutagwasyi na ankazyanio zitakwe bubotu mbuzichitya? ⁴ Chanchoonzyo, ulawubula bulemu kuli Leza; ulalilebya kulipeda kwako kulinguwe, ⁵ nkaambo bubi bwako buyiisya mulomo wako; ulasala kuba alulimi lwabuchenjeezu. ⁶ Mulomo wako ulakusampawula, pepe wangu; chanchoonzyo, iyako milomo ipabukamboni anduwe. ⁷ Ndonduwe mwalumi mutaanzi na wakazyalwa? Wakalengwa zilundu kazitana kubawo na? ⁸ Wakali wamvwa na busongo busisikene bwaLeza? Ulalitimuna busongo bwako na? ⁹ Nzeezili nzyozi swebo nzetutazi? Nzezili nzyomvwisisisya eezyo zitamo mulindiswe? ¹⁰ Iswebo toonse tulaamvwi mumitwe alimwi tulibaalumi bapati loko bachembeede kwinda wuso. ¹¹ Ingumbulizyo zyaLeza ninche na kuli nduwe, majwi mabotu alangene anduwe? ¹² Nkaambonzi moyo wako nuyanda kukusowa? Nkaamboonzi menso aako nalaba, ¹³ zyakuti wapilusya muuya wako kukupapila Leza alimwi akweeta majwi aliboobo kuzwa mukanwa lyako? ¹⁴ Muntu niinzi loko ku.ti asalale? Mbobuli oyo uzyedwe kumwanakazi mbwanga ulalulama? ¹⁵ Langa, Leza takonzyi kusyoma nibaba basalali bakwe; nkasimpe, majulu tasalali kumenso aakwe; ¹⁶ mbobuli mbwayindwa oyo usofweede abusyachivulemwangu, muntu unywa zibi mbuli mbwanywa manzi! ¹⁷ Ndilakutondeezya; swilila kuli ndime; ndiyokwambila webo zintu nzindakabona, ¹⁸ zintu ezyo bantu basongo nzibakalungulula kuzwa kumawisaabo, zintu ezyo bansiku nzibakatasisa. ¹⁹ Eezi zyakali basinsiku babo, abo abalike bakapedwe nyika, alimwi mbembabo bakatindwa mbali abanakwenda. ²⁰ Muntu sizibi ulapilimuka mumachise mazuba akwe wonse, mweelwe mamyaaka eyo ibambululwa kulisikupenzya kuti apengaane. ²¹ Mizuzumo yaziyoosyo mwiili mumatwi aakwe; nekuba kalimubuvubi, sikumwayuula uzomuzida. ²² Takonzyi pe kuyeeya kuti ngawuzoozwa mumudima; ipanga lilamulindila. ²³ Ulayinka kumasena manji kayanduula chinkwa, kati, 'Chilikuli mpo?' Ulizi kuti izuba lyamudima lilafwiifwi. ²⁴ Kupengana akulebuuka nzezimuyoosya; zilamuzunda lwakwe, mbuli mwami ulibambilide nkondo. ²⁵ Nkaambo wakatantamuka kule ajanza lyakwe kulwana Leza alimwi wakalisumpula kalwisya Singuzu, ²⁶ oyu muntu sizibi ulachijanina kuli Leza ansiko njuumu, antobo niini loko. ²⁷ Aaka nkasimpe, nikuba kuti wavumba busyu bwakwe azibi zyakwe alimwi akulibunganisizya zibi zyakwe muchikungu, ²⁸ alimwi akuyoliponena mumadolopo atelede kukkalwa; mumaanda atakwe muntu uwakkala lino alimwi akali elela kuti abemulwi wamatongo. ²⁹ Takwe pe natakabe muvubi; buvubi bwakwe tabukoyokkala alimwi mbono zyakwe tazikoyotandabala atala anyika. ³⁰ Takwepe natakazwe mumudima; mulilo uyoyuminizya munsonga; akuyooya kwamulomo waLeza uyochijila kule. ³¹ Ngakube kuti atasyomi kuzintu zitagwasyi, kalyena lwakwe; nkaambo zitagwasyi ziyooba njempindu yakwe. ³² Ziyochitika kachitana kusika chindi chakufwa kwakwe; mitabi yakwe tikoyovovwela mbulisokwe tete. ³³ Uyokulumbuka michelo yakwe kitana kubizwa mbuli magilepuvayini; uyokulumbuka malubaluba aakwe mbuli maluba amu olifa. ³⁴ Nkaambo kabunga kabatayoowi Leza tabakoyozyala pe; mulilo uyosyukuta matente amasinkamulomo. ³⁵ Bayominta bubi alimwi bayotumbuka bubi; izyalilo lyabo liyominta lweeno.''