¹ Ijwi lyakasika kuli Jelemiya kuzwa kuli Jehova kaliti, ² ''Imikila kumulyango weng'anda yaJehova akukambawuka eeli jwi! Utedi, 'Muswiilile jwi lyaJehova moonse nobaJuda, nywebo nimunjila mumilyango kukulumbayizya Jehova. ³ Jehova wamakamu, Leza waIzilayeli waamba eechi: Nchita nzila zyako alimwi uchite zibotu, alimwi ndiyoyinkilila kunembo kuti upone munyika eeyi. ⁴ Utalisyomi nomwini kunajwi mabi akwaamba kuti, ''Tempele yaJehova! Tempele yaJehova! Tempele yaJehova!'' ⁵ Nkaambo na mwachita nzila zyenu akuchita bubotu; na mwachita bululami bumaninide aakati kamwaalumi asimabambanwa wakwe - ⁶ na waleka kupenzya aabo bakkede munyika, bamuchaala, na mukamufu alimwi temwatila bulowa busalala aabusena oobu, akuteendela bamwi baleza kukulibisizya - ⁷ mpawo ndiyokkala munyika eeyi, munyika njindakapa kuli bamawuso benu kuzwa kuzyiindi zyachiindi abutamani. ⁸ Mubone! Mulikusyoma majwi aakubeja aayo atamugwasyi pe. ⁹ Mulabba na, mulajaya na, alimwi mulachita na mamambe? Mulakonka na chakweeneena akutenta tununkilizyo kuliBbaali akweendela bamwi baleza mbimutazi? ¹⁰ Mpawo mulaza na akwiimikila kunembo lyangu mung'anda yangu eeyo yiitwa muzina lyangu akwaamba kuti, ''Twafutulwa,'' aboobo ulakonzya kuchita zyoonse zisesemyo eezi? ¹¹ Sa eeyi ng'anda eeyi, iibwezede zina lyangu, ndikkomba lyababbi mumenso enu? Pesi amulange, ndakazibona - ooku nkwaamba kwaJehova. ¹² Aboobo koya kubusena bwangu bwakali muSyiyoli, ooko nkundazumizya zina lyzngu kuti likkale nkuko lutaanzi, alimwi langa kuli eezyo nzindakachita kulinchicho nkaambo kakubisya kwabantu bangu Izilayeli. ¹³ Mpawo lino mulachita zintu zyoonse - ooku nkwaamba kwaJehova - ndakambuula kulindinywe chiindi achiindi pesi temwakaswiilila pe. Ndakamwiita pesi temwakavwiila pe. ¹⁴ Nkinkaako, nzindakachita kuSyiyoli ndiyozichita lubo kung'anda eeyi eeyo yiitwa muzina lyangu, ng'anda njimwakasyoma, oobu busena mbundakapa kulindinywe abasikale banu. ¹⁵ Nkaambo ndiyomutuma kuzwa kunembo lyangu mbuli mbundakatuma boonse bakulana benu, boonse balunyungu lwaIfulemu.' ¹⁶ Mbuli kulinduwe, Jelemiya, utabakombeli pe bantu aaba, alimwi utabanyampwidi lukwiilo na kwaamba nkombyo yakubiiminina, alimwi utandikombeli ndemwini, nkaambo nsikoyokuswiilila pe. ¹⁷ Tozibwene na nzibalokuchita muJelusalemu muzisi zyaJuda amumigwagwa yaJelusalemu? ¹⁸ Bana balikubungania nkuni alimwi bamawisi balikuyasya mulilo! Banakazi balikufunka busu kuti bachite zinkwa zyamwanakazi mwami wamajulu akutila chipayizyo chakunywa kuli bamwi baleza kuti bakandisampawule. ¹⁹ Nkasimpe na kuti balikundiniaka? - ooku nkwaamba kwaJehova - tensi balikuliniaka na lwabo, kuti mawuse aayo ali aalimbabo? ²⁰ Nkinkaako Mwami Jehova waamba eechi, 'Bona, kunyema kwangu abukali bwangu buyotilwa mubusena oobu, kuli boonse bantu abanyama, aamisamu iili mulusaka amichelo iili aanyika. Ziyoopya akutazimika.' ²¹ Jehova wamakamu, Leza waIzilayeli wamba eechi, 'Yungizya chipo chako chakunywa kuchipayizyo chako alimwi enyama kuzwa kulimbabo. ²² Nkaambo aawo nindakagwisya basikale benu kuzwa munyika yaIjipiti, tendakakumbila nikuba chintu chomwe kuzwa kulimbabo. Tensi ndakabapa malayilile aatala azipo zyakutenta aazipayililo. ²³ Ndakabapa biyo aaya malayilile, ''Muswiilile kujwi lyangu, alimwi ndiyooba Leza wanu, anywebo bantu bangu. Aboobo mweende muzila zyoonse eezyo nzindamulayilila, kuchitila kuti kukabe kabotu kulindinywe.'' ²⁴ Pesi takwe nibakaswiilila na kuchenjeka kutwi. Balapona kwiindilila mumiyeeyo yamyoyo yabo mibi, aboobo bakabweedela musule, peepe kunembo. ²⁵ Kuzwa buzuba basikale banu nibakazwa munyika yaIjipiti kusikila oobuno buzuba, ndatuma boonse balanda bangu, basinsimi bangu, kulindinywe. Ndakasungwaala mukubatuma. ²⁶ Pesi tebakandiswiilila pe. Tebakaswiilila pe. Pesi bakayumya nsingo zyabo. Bakali basizibi kwiinda basikale babo.' ²⁷ Aboobo amba woonse majwi aaya kulimbabo, pesi tabakoyokuvwiila pe. ²⁸ Amba kulimbabo kuti: Eechi nchisi chitaswiilili kujwi lyaJehova Leza wacho alimwi tachitambuli lulayo. Kasimpe kakalobesegwa akugonkwa kuzwa kumilomo yabo. ²⁹ Mukagele masusu enu akulinyoola, mukasowe masusu enu. Mwiimbe lwiimbo lwedilwe aatala lyamasena aajulikide. Nkaambo Jehova wakaka alimwi waanda zyalane eeli mubukali bwakwe. ³⁰ Nkaambo bana balombe baJuda bakachita zibi kunembo lyangu - ooku nkwaamba kwaJehova - bakabika zintu zyabo zibi mung'anda eeyo yiitwa muzina lyangu, mukuyanda kulisofwaazya. ³¹ Mpawo bakayaka busena buli aajulu bwaTofeti buli muMumpata waBbeni Hinoni. Bakachita eezi kukutenta bana babo balombe abasimbi mumulilo - chimwi chintu nchindakatabalayilila pe, nikuba kunjila mumiyeeyo yangu. ³² Aboob bona, mazuba ayobuza - ooku nkwaamba kwaJehova - eelyo nilitachinoyitwi limbi kuti Tofeti na Mumpata waBbeni Hinoni. Inoli yaba Mumpata Wakajayila; bayovwika mitunta muTofeti kusikila kakutachikwe busena busyeede. ³³ Mitunta yabantu aaba iyooba chikkafu chabayuni bakujulu abanyama bamulusaka bamunyika, alimwi takwe naba womwe uutakabakonge. ³⁴ Ndiyobika magozezyo azisi zyaJuda amigwagwa yaJelusalemu, musabilo walukondo amusabilo wakubotelwa, musabilo wamuyeni amusabilo wanabwiinga, nkaambo nyika iyooba matongo.''