¹ ''Muchiindi eecho - ooku nkwaamba kwaJehova - bayoyeta kuzwa mutubanda mafuwa abaami baJuda abasimilimo babo, mafuwa aabapayizi abasinsimi, alimwi amafuwa aabakkala muJelusalemu. ² Mpawo bayowayanzaania mumumuni wazuba amwezi anyenyeezi zyamajulu; eezi nzintu zyakujulu nzibakatobela akubelekela, nzibakatobela akuziyanduula, alimwi nzibakakomba. Mafuwa takoyobungikwa na kutentwa lubo pe. Banoli mbuli mafumba aajulu anyika. ³ Kunyika yoonse iitakachaale ooko nkundakabagwisya , bayosala lufu kutali buumi bwabo beni, aabo boonse bachicheede kuzwa kuchibi chanyika - ooku nkwaamba kwaJehova wamakamu. ⁴ Aboobo amba kuti kulimbabo, 'Jehova waamba eechi: Mpali na uuwa katabuki? Mpali na usweeka katayezyi kuboola? ⁵ Nkaambonzi aaba bantu, Jelusalemu bakabweeda chakumaninina mukubula lusyomo? Balakakatila mulweeno aalimwi balakaka kusanduka. ⁶ Ndakachenjeka matwi alimwi ndakaswiilila, pesi tebakambuula kabotu pe; takwe naba omwe wakakumbila lulekelelo bwazibi zyakwe. Takwe waamba kuti, ''Ndachitaanzi?'' Boonse balayinka nkubayanda, mbuli silumamba munkutwe kunkondo. ⁷ Nikuba bbunga kujulu lilizi chiindi chibotu; alimwi inziba, zibelesyo, antantizyo zileenda achiindi cheelede, pesi bantu bangu tabazi mbeta zyaJehova. ⁸ Kujana ulaamba buti kuti, ''Tuli basongo, nkaambo mulawu waJehova uli aandiswe''? Nchobeni, bona! Chilembyo chalweeneeno chabasikulemba chachita lweeno. ⁹ Baalumi basongo bayowusigwa nsoni. Bayoowa akuchigwa. Bona! Bakaka jwi lyaJehova, aboobo busongo bwabo bubelekaanzi? ¹⁰ Aboobo ndiyoopa banakazi babo kulibambi, amyuunda yabo kuli babo bayoyivuba, nkaambo kuzwa kumuniini kusika kumupati, boonse mbalyabi kumpindu yakutalemeka! Kuzwa kumusinsimi kusika kumupayizi, boonse bachita lweeno. ¹¹ Bakaponia zilonda zyabantu bangu buniini kabati, 'Luumuno, Luumuno,' aawo kakutakwe luumuno pe. ¹² Bakafwisigwa mawuse na aawo nibakali kuchita zisesemyo? Tebakaba aamawuse pe; tebakezi pe kulisyobasyoba! Aboobo bayoowa aakati kabawide; bayoselezegwa eelyo nibatanoopegwe chisubulo, mbwaamba Jehova. ¹³ Ndiyobagwisya chakumaninina - ooku nkwaamba kwaJehova - takukoyoba masaansa aaminsaana , nikuba nkuyu kumikkuyu. Nkaambo matu ayopusama, alimwi eezyo nzindakabapa ziyoyinda. ¹⁴ Nkaambonzi nitukkede aano? Tuze aantomwe; ngatwiinke kumadolopo aabayilidwe, alimwi tukafwe muchuumunizi nkukooko. Nkaambo Jehova Leza wesu uyotumuzya. Uyotuchita kuti tukanywe zijaya mukuti twakamubisizya. ¹⁵ Tulikulangilila luumuno, pesi takwe chinoli chibotu pe. Tulikulangilila chiindi chakuponisigwa, pesi bona, kuyooba nkondo. ¹⁶ Kulumbuzigwa kwamabbiza aabo kwamvwigwa kuzwa kuliDani. Nyika yoonse yazungaana amizuzumo yakuza kwamabbiza aasimide. Nkaambo bayosika akulya nyika abuvubi bwayo, madolopo abaabo bakkala mulingawo. ¹⁷ Nkaambo bona, ndiyotumina nzoka aakati kanu, bachipile mbimutakonzyi kweemuzya. Bayomuluma -- ooku nkwaamba kwaJehova.''' ¹⁸ Kuusa kwangu takukwe mamanino pe, alimwi moyo wangu ulachiswa. ¹⁹ Bona! Koompolola kwajwi lyamwana musimbi wabantu bangu kuzwa kunyika iilikule! Jehova tali muZiyoni na? An mwami wakwe tachili ooko na? Nkaambonzi nibandituka kuti bandinyemye azikozyanio zyabo zyakubeza azibumbwa zyabo zitabeleki zyakule? ²⁰ Butebuzi bwayinda, miinza amana. Pesi tetwafutulwa pe. ²¹ Zyandichisa akaambo kakuchiswa kwamwana musimbi wabantu bangu. Ndoomoka akaambo kazintu zyakachitika kulinguwe; ndawusa. ²² Takwe musamu wakusilika na kuGiledi? Takwe musilisi na ooko? Nkaambonzi kuponesegwa kwabana basimbi babantu bangu nikutalikuchitika?