¹ ''Jehova waamba oobu: Langa, ndaamba kukazika kukopa luuwo lwakkopa lwalunyonyooko aatala aBbabbiloni alimwi aatala abaabo bakkede muLebbi Kkamai. ² Njotuma bazwakule kuBbabbiloni. Bayomwanzaania akumwaya inyika yakwe, Nkaambo bayomulwisya kumuzyunguluka kubuzuba bwalunyonyooko. ³ Utazumizyi baalumi basitunta bagogomanie madaantambwa aabo; utabazumizyi kuti bazwaate zilwisyo. Utabafwidi luzyalo bakubusi bakwe; amubambile impi yoonse alunyonyooko. ⁴ Nkaambo bantu balichiside bayoowida munyika yabaKkasidi; aabo bayojayigwa bayowida mumigwagwa yakwe. ⁵ Nkaambo Izilayeli aJuda tabasiidwe pe aaLeza wabo, Jehova wamakamu, nikuba kuti nyika yabo izwide amulandu aatala awusalala waIzilayeli. ⁶ Muchije kuzwa aakati kaBbabbiloni; akube kuti uumwi awumwi muntu aligwasye lwakwe mwini. Utafwidilili muzibi zyakwe. Nkaambo nchiindi chachisubulo chaJehova. Uyoliya zyoonse kulinguwe. ⁷ Bbabbiloni wakali chinywido changolida mujaanza lyaJehova eeyo yakachita nyika yoonse kunywida; Inyika zyakanywa wayini wakwe aalimwi bakapenga. ⁸ Bbabbiloni uyoowa aachakufwambana alimwi akunyonyoonwa. Mumukwilile! Mumupe musamu wamachise aakwe; ambweni walikunopona. ⁹ Twakali kuyanda kupenzya Bbabbiloni, pesi taakaponesegwa pe. Aatumusiye toonse tuyekule, kunyika yesu. Nkaambo mulandu wakwe wasika kumajulu; bwalundikwa aajulu kumayooba. ¹⁰ Jehova watwaambila kubula mulandu kwesu. Mubole, twaambe muziyoni milimu yaJehova Leza wesu.' ¹¹ Ngamunone tuunta akubweza intobo. Jehova ulokukopa muuya wamwami waMediya mumabambe aakumwaya Bbabbiloni. Eechi nchisubulo chaJehova. Chisubulo chakumwaya itempeli yakwe. ¹² Nyampula kujulu indembela aabulambo bwaBbabbiloni; musimye basikulinda;mubike baalumi basikulinda; mubambe basikuyubilila; nkaambo Mwami uyoochita eecho nchaakaamba aatala abakkede muBbabbiloni. ¹³ Inywebo nobantu nimukkala mutulonga twamanzi twiingi, nywebo nobantu nimuli embono abuvubi, mamanino aanu asika. Inzila yabuumi bwenu lino yafwinsigwa. ¹⁴ Jehova wamakamu wakonka kwiinda mubumi bwakwe mwini, 'Ndiyomuzumizya aabantu, mbuli chisozi, aalimwi bayobusya inkondo yakulila aatala anduwe.'' ¹⁵ Wakachita nyika kwiinda kunguzu zyakwe; wakabikka busena munyika kwiinda mubusongo bwakwe. Kwiinda mukumvwisisisya kwakwe wakatandabika majulu. ¹⁶ Eelyo nakazumina, ngakwaaba kuvuta kwamaanzi kumajulu, nkaambo ngaweta sikunkwe kuzwa kumamanino aanyika. Ulachita lulabi lwamvula akutola aanze luuwo kuzwa kuchibambilo chakwe. ¹⁷ Woonse muntu waba sichinguni kaatakwe luzibo. Woonse mufuzi wabutale wawusigwa bweeme kwiinda kuzikozyanio zyakwe. Nkaambo zikozyanio zyankakata zyakwe nzyabiyo, aakutaba abuumi mulinzizyo. ¹⁸ Taazikwe lugwasyo pe, milimu yabasikunonga; bayofwidilila kuchiindi chachisubulo chabo. ¹⁹ Pesi Leza, chaabilo chaJakkobbu, taachilimbuli eezi, nkaambo mubumbi wazintu zyoonse. Izilayeli mukowa walukono lwakwe; Jehova wamakamu ndizina lyakwe. ²⁰ Uuli nkoli yankondo yangu, chilwisyo changu chamunkondo. Anduwe ndopwachuula zisi akuyomwaya maami. ²¹ Andime njopwachuula mabbiza abasikwagada; anduwe njopwachuula nkalaki abazyeenzya baabo. ²² Anduwe ndopwachuula mwaalumi amwanakazi; anduwe njopwachuula bapati bapati abaniini. Anduwe njopwachuula basinkondo balombe abanakalindu ²³ Anduwe njopwachuula beembeli abutanga bwabo; anduwe njoopwachuula basikulimya ankamu zyabo. Anduwe ndopwachuula bendelezi ababeleki baabo. ²⁴ Nkaambo mumenso aako ndobbadalila Bbabbiloni abaabo bakkede muKkasidi akambo kazibi zyoonse eezyo nzibakachita muZiyoni, aaya malayilile aJehova. ²⁵ Langa, ndayiminana anduwe, chilundu chalunyonyooko , aaya malayilile aJehova, aayo aanyonyoona nyika yoonse. Ndotandabika janza lyangu kulwisya nduwe, akukunkulisya aansi kuzwa kumabwe akolomokede, akukuchita chitondeezyo aatala lyachilundu. ²⁶ Aboobo takwepe nibayobweza niliba bbwe kuti bakayasye chooko nikuba ntalisyo. Nkaambo uyooba umwayisigilwe kwalyoonse, aaya malayilile aJehova. ²⁷ Sumpula chitondeezyo aajulu aanyika. Lizya mweembo aajulu azisi. Yiita zisi zimulwane: Alalati, Miini, aAsyikenazi. Sala muzuluzi kuti amulwane. Yeeta mabbiza alimbuli chisoozi. ²⁸ Bambila zisi kuti zimulwiisye. Baami babaMedesi abazuluzi bakwe. Boonse babelesi bakwe aanyika zyoonse munsi abwendelezi bwakwe. ²⁹ Nkaambo nyika iyoteketa akuyooba akupengeleka kapati, mbulikuti mabambe aJehova achinkilila kunembo kukulwisyania aBbabbiloni, kuchitila kuti inyika yaBbabbiloni iibe nyika isowedwe eeyo iitakwe bakkede mulinjiiyo. ³⁰ Basilumamba baleka kulwana; bakkala muziyubilo zyabo. Inguzu zyabo zyakachilwa; bababanakazi, myuunzi yakwe yawuumpwa, minsende yamilyango yakwe yamwayika. ³¹ Mutumwa wachijaana kuyowambila kuli uumbi mutumwa, alimwi sikuchijana wabuzya uumbi sikuchijaana kuti akaambile mwami waBbabbiloni kuti dolopo lyakwe lyatolegwa kuzwida kumatalikilo kuyosikila kumajinkilo. ³² Aboobo zizubukilo aajulu amulonga zyakatolwa, sinkondonyina ulokutenta matete alimwi baalumi basikulwana baBbabbiloni babula maanu. ³³ Nkaambo Jehova wamakamu, Leza waIzilayeli waamba oobo: mwana musimbi waBbabbiloni uulimbuli lubuwa lwakupolela chaba chindi chaku muwisizya aansi. Muchiindi chinini chindi chakutyola chiyoosika kuli nguwe. ³⁴ Nebbugadineza mwami waBbabbiloni wakandikwaamuna chakufwambaana, wakendelezya mukubula maanu alimwi wakandichita kuti ndibe mooto itakwe chintu. Mbuli chiyoosyo wakandimena, wakazuzya buta bwakwe azyakulya zyangu zinono alimwi mpawo akundiswida. ³⁵ Ooyo ukkala muZiyoni uyoowamba kuti, 'Aanoli mulandu wachitwa aalinduwe anyama yangu ibe aliBbabbiloni. Jelusalemu uyowamba kuti, 'Anooli bulowa bwangu bwaba abantu bakkede muKkasidi.' ³⁶ Nkikaako Jehova uwaamba oobu: Langa, ndaamba kubuzya makani aanu akweeta chisubulo kulinduwe. Nkaambo njoyumya maanzi aBbabbiloni akuchita tusensa twakwe kuti tukayuminine. ³⁷ Bbabbiloni uyooba malwi amabwe alundikidwe, akuba sempa lyabamwaaba, chiyoosyo, chintu chili mbuli kufootas kwanzooka, ooko kutakwe bantu bakkede. ³⁸ BaBbabbiloni bayovuluma aamwi mbuli twana twabalavu. Bayokuluma mbuli twana twabalavu. ³⁹ Eelyo bayopya mumyo abatavu, njobachitila pobwe; njobakozya kuchitila kuti bakabotelwe, eelyo akuyoowona ng'onzi zitamani alimwi akutayobuka pe, aaya makani aJehova, ⁴⁰ njoobatola aansi mbuli tubelele tuya kukujayigwa, mbuli bagutu abasipule bempongo. ⁴¹ Wajatwa biyeni Bbabbiloni! Aboobo kutembawulwa kwanyika yoonse kwamwayigwa. Wamwayuulwa biyeni Bbabbiloni akuba busena bumwayidwe akati kamanyika. ⁴² Lwizi lwamubbizya aliBbabbiloni! Wavumbwa akuvuluma kwamayuwe aawo. ⁴³ Madolopo aakwe taachikkaliki pe, inyika yachimpayuma akuba munkanda, inyika itachikwe sikwikkala, alimwi takwe muntu pe uyiinda. ⁴⁴ Aboobo njosubula Bbeeli muBbabbiloni; Njoboozya kuzwa mumulomo wakwe eecho nchaakamena, alimwi inyika tazikoyoza pe kulinguwe azipo. Malambo aBbabbiloni ayomwayika. ⁴⁵ Muzwe akati kakwe, nobantu bangu. Amulivune buumi bwenu umwi awumwi kuzwa kubukkali bwalunyemo lwangu. ⁴⁶ Mutazumizyi myoyo yenu kukuyosegwa na kuti kuyoowa makani aayo alikumvwigwa munyika, nkaambo makani aayosika mumwaaka. Kunembo ayaaya mumunyaka uuza kuyooba makani, alimwi lupyopyongano luyooba munyika. Mwendelezi uyoyiminana amwendelezinyina. ⁴⁷ Nkiikaako, langa mazuba ayosika eelyo ninjosubula zibezwa zyamizimu yaBbabbiloni. Inyika yakwe yoonse iyowusa, alimwi boonse bakwe bafundidwe bayowida akati kakwe. ⁴⁸ Mpawo majulu aanyika, zyoonse eezyo zilimulinguwe ziyokondwa aajulu aBbabbiloni. Nkaambo basikumwaya bayooza kulinguwe kuzwa kulubazu lwakunyika, amalayilile aJehova. ⁴⁹ Mbuli Bbabbiloni mbaachita bajayidwe baIzilayeli kuwa, aboobo boonse bajiidwe bamunyika yakwe bayoowa muBbabbiloni. ⁵⁰ Bafutuki kuzwa kupanga, mweende muye kule! Mutakkalilili pe. Mwiite Jehova kuti amuyeeye kuzwa kule: Amuzibye Jelusalemu asike akumuyeeya. ⁵¹ Twaba amawuse, nkaambo twakamvwa matusi: bubi bwatuvumba masyu eesu, nkambo bazwakule banjila busena busalala bwang' anda yaJehova. ⁵² Nkikaako, langa, mazuba ayoosika, aya malayilile aJehova, elyo ndayopenzya zikozyanio zibezedwe, alimwi bantu balichiside bayotongawuka munyika yakwe. ⁵³ Nkaambo nikuba kuti Bbabbiloni wiinka akusumpuka kaya kumajulu na kyumya mayubilo akwe malamfu, basikumwaya kulinguwe, aya malayilile aJehova. ⁵⁴ Kukwiila kwalunyonyoono kwasika kuzwa kuBbabbiloni, kuwa kupati kuzwa kunyika yabaKkasidi. ⁵⁵ Nkaambo Jehova ulokumwaya Bbabbiloni. Ulokuchita kuti koompolola kwajwi kufwidilile. Basinkondonyina bavuluma mbuli mayuwe amaanzi miingi, chikwaala chabo chakomenesya loko. ⁵⁶ Nkaambo basikumwaya baza kukumulwisya, kukulwisya Bbabbiloni, alimwi basilumamba bakwe bajatwa. Maata aabo atyokoka, nkaambo Jehova nguLeza ubwedezya bulumbu; Nchobeni uyobwedezya luliyo oolu. ⁵⁷ Nkaambo njochita mwana wamwami musimbi , busongo bwakwe, abeendelezi, abasilumamba bakwe bakakolwe, alimwi bayowona mung'onzi zitamani akutayobuka pe, aaya malayilile amwami Jehova wamakamu ndizina lyakwe. ⁵⁸ Jehova wamakamu uwamba oobu, malambo mapati aBbabbiloni ayodilisigwa chakumaninina, alimwi milyango yakwe milamfu iyowumpwa. Mpawo bantu banooza kuligwasya lwakwe bayobeleka chabuyo: zyoonse eezyo manyika ngizyeenzya kumuchitila ziyowumpwa.'' ⁵⁹ Eeli ndijwi eelyo Jelemiya musinsimi ndyakalayilila Seliya mwana mulombe waNeliya mwana mulombe waMaliseliya eelyo nakiinka aZedekkiya mwami waJuda kuBbabbiloni mumunyaka wane mubwendelezi bwakwe. Lino Seliya wakali silutwe wankambe mpati loko. ⁶⁰ Nkaambo Jelemiya wakali walemba mulugwalo aatala azyonse zyalunyonyooko oolo azyoonse aliBbabbiloni, aaya majwi woonse aayo akalembedwe aatala aBbabbiloni. ⁶¹ Jelemiya wakati kuli Seliya, ''Eelyo mwayoyinka kuBbabbiloni, mpawo muyobona alimwi muyobala majwi aaya chakongololesya. ⁶² Mpawo uyowamba kuti, 'Jehova, iwebo lwako waamba kuti uyomwaya busena oobu, alimwi kuti takwe pe muntu naba munyama uyopona mulimbubo alimwi uyooba tongo kwalyoonse.' ⁶³ Mpawo eelyo wakumaninsizya kubala lugwalo oolu, waanga bbwe alindulo akuyoluwalila akati aalindulo akuyoluwalila akati kuYufuleti. ⁶⁴ Wamba kuti, 'Bbabbiloni uyobbila mbuboobu. Tukoyonyampuka pe kalunyonyooko oolo ndundokuseka aatala anguwe, alimwi bayoowa''' Jelemiya majwi aakwe amanina aawa.