¹ Zedekkiya wakajisi myaaka ilimakkumi abili awumwi yakuzyalwa nakatalika kwendelezya; wakendelezya kwamyaaka ilikkumi awumwi muJelusalemu. Izina lyabanyina bakali Hamutalu; bakali mwana musimbi waJelemiya kazwa kuLibbina. ² Wakachitide zibi loko mumenso aJehova; wakachita zyoonse zyakali zyachitwa a Jehoyyakkimu. ³ Kwinda mukunyema kwaJehova, zyoonse eezi zyakachitika muJelusalemu amuJuda, kusikila wazobatanda kunembo lyakwe. Mpawo Zedekkiya wakazobapapila mwami waBbabbiloni. ⁴ Zyakachitika kuti mumwaaka wamusanu ayine wakweendelezya kwamwami Zedekkiya, mumweezi wakkumi, alimwi mubuzuba bwakkumi mumweezi, Nebbugadineza, mwami waBbabbiloni, wakasika abasilumamba bakwe kuzolwisya Jelusalemu. Bakakkala kabalane anjiyo, alimwi bakayaka lubaya lwakwizyunguluka. ⁵ Eelyo dolopo lyakazyungulukwa kuyosikila mumwaaka wakkumi awumwi wakwendelezya kwamwami Zedekkiya. ⁶ Mubuzuba bwamusanu aane bwamumwezi wane inzala yakali yaluma mudolopo zyakuti tekwakachilikwe chakulya pe chabantu bamunyika eeyo. ⁷ Alimwi cdolopo bakalinjilila, alimwi baalumi boonse basikulwana bakachija alimwi bakazwa mudolopo mansiku kumulyango oyo wakali akati kamalambo aabili, kumbali lyachilili, nekuba kuti baKkaludiya bakali bakali zyungulukide dolopo lyoonse. Eelyo bakalanzya kubbazu lyaku Alabba. ⁸ Pesi basilumamba babaKkaludiya bakatobela simwami alimwi bakakumutola Zedekkiya mumimpata yaMulonga Jodani aafwiifwi aJelikko. Boonse basilumamba bakwe bakamumwayika. ⁹ Bakakumujata mwami alimwi bakakumweeta kumwami waBbabbiloni kuLibbula munyika yaku Hamati, ooko nkwakakumubetekela. ¹⁰ Mwami waBbabbiloni wakajaya banabalombe baZedekkiya mumenso aakwe, alimwi kuLibbula wakazojaya alimwi boonse beendelezi baJuda. ¹¹ Mpawo wakamunonkoola menso Zedekkiya, wasikumwaanga anketani, mpawo bakamweeta kuBbabbiloni. Mwami wakuBbabbiloni wakamubikka muntolongo kuyosikila mubuzuba bwakufwa kwakwe. ¹² Lino mwamweezi wamusanu, mubuzuba bwakkumi mumweezi, oyo wakali munyaka wakkumi amusanu ayine wakwendelezya kwaNebbugadineza, mwami waBbabbiloni, Nebbuzaladani wakaza kuJelusalemu. Nguwakali mupati wabalindizi bamwami alimwi kali mulanda wamwami wakuBbabbiloni. ¹³ Wakawumpa ng'anda yaJehova; ng'anda yamwami, alimwi amaanda woonse amuJelusalemu; alimwi ang'anda mpati loko mudolopo yakawumpwa. ¹⁴ Kukwamba bulambo bwakazyungulukide Jelusalemu, basilumamba boonse bakuBbabbiloni aabo bakali amupati wabo bakakolomona bulambo boonse. ¹⁵ Kukwamba bantu bafwaba loko, abamwi bantu abo bakasyeede mudolopo, aabo bakalyaabide kale kumwami waBbabbiloni, abamwi boonse basikubeza, Nebbuzaladani, mupati wabasitabilila, wakabweza bamwi babo kubuzike. ¹⁶ Pesi Nebbuzaladan, mupati wabasikutabilila, wakabasiya bamwi babantu bafwabisya bamunyikakuti balime myuunda yamasansa.i ¹⁷ Kukwamba minkulu yamukuba eeyo yakali yang'anda yaJehova, amayake, antomwe amikuba mipati yazisambilo itegwa ''Muyaba'' eeyo yakali mung'anda yaJehova, baKkaludiya bakazityolola mutumpanzi alimwi bakiitola yoonse mikuba kubwedezya kuBbabbiloni. ¹⁸ Mipika, mafosyolo, zibikilo zyamalampi, mitiba, azimwi zyoonse zilongo zyamukuba eezyo mupayizi nzyakali kubelesya muntempele, baKkaludiya bakazibweza binkaazyo. ¹⁹ Mitiba antomwe azitentelo zyatununkilizyo, zibikilo, mipika, zibikilo zyamalampi, inkaye amitiba yakapangidwe angolide, azeezyo zyakapangidwe ansiliva, mupati wabasikukwabilila wakazibweza zyoonse winkaazyo. ²⁰ Myimiima yobile, mikuba iibili mipati yakazibinkene akuti ''Miyaba,'' alimwi amikuba ilikkumi ayibili yabasipule bakali kunsi lyazyimikililo, ezyo zintu Solomoni nzyakapangide kung'anda yaJehova, zyakajisi mukuba mwiingi ooyo wakali kulema. ²¹ Myimiima yakali kkumi atutatu tukokola kulampa awumwi, alimwi mundando umwi awumwi wakali kkumi atubili tukokola. Umwi wakalenchinya zyatunwe tone akucheya. ²² Muulwi wamukuba wakali ajulu lyanchicho. Mulwi wakali musanu tukokola mubulamfu, wakananikide mapomegilanayiti kachizyungulukide. Choonse chakapangidwe amukuba. Eeyiimwi myimiima amapomegilanayiti ayo akali kukozyania amataanzi. ²³ Chamba kuti kwakali makumi musanu aane amusanu akamwi kumbali lyamulwi, amapomegilanayiti alimwaanda aajulu ayayo akazyungulukide. ²⁴ Mupati wabasikukwabilila wakamutola muntolongo Selayiya, mupayizi mupati, antomwe a Zefaniya, mupayizi wabili, antoomwe abasikulinda milyango. ²⁵ Kuzwa kudolopo wakabika muntolongo umwi kapokola oyo wakali kwendelezya basilumamba, antomwe abaluumi bali musanu ababili aabo bakali kulaya mwami, bakajanikide mudolopo. Alimwi wakabikka muntolongo mupati wabasilumamba wakali kulanga zyakunjizigwa kwabaalumi mumpi, kubikilizya abalimakumi musanu akkumi lyomwe lyabaalumi balemekwa kuzwa munyika eyo bakajanika mudolopo. ²⁶ Mpawo Nebazaladani, mupati wabasikutabilila, wakababweza akubeeta kumwami waBbabbiloni kuLibbula. ²⁷ Mwami wakuBbabbiloni wakabajaya kuLibbula munyika yaHamati. Munzila njiyeeyi, Juda wakazwa munyika eeyi waya mubuzike. ²⁸ Aaba mbibakali bantu Nebbugadineza mbakatola mubuzike: mumwaka wamusanu ayibili, 3,023 maJuda. ²⁹ Mumwaka wakkumi amusanu ayitatu yaNebbugadineza wakatola 832 bantu kuzwa kuJelusalemu. ³⁰ Mumwaka wamakkumi aabili ayitatu waNebbugadineza, Nebbuzaladani, mupati wabasikutabilila mwami, wakatola 745 bantu baJuda mubuzike. Boonse bantu bakatolwa mubuzike bakali mweelwe usika ku 4,600. ³¹ Zyakazochitika musule mumwaka wamakkumi aatatu amusanu ayibili yabuzike bwaJehoyiyakkimu, mwami waJuda, mumwezi wakkumi ayibili, mubuzuba bwamakumi aabili amusanu bwamumweezi, Awelu Madukku, mwami waBbabbiloni wakangununa Jehoyiyakkimu mwami waJuda kuzwa muntolongo. Eezi zyakachitika mumwaka Awelu Madukku nakatalika kwendelezya. ³² Wakambula kabotu anguwe alimwi wakamupa chuuno chakali kulemekwa kapati kwiinda zimwi zyabaami mbakali aabo muBbabbiloni. ³³ Awelu Madukku wakagwisya Jehoyiyakkimu zisamo zyamuntolongo, alimwi Jehoyiyakkimu wakalya twiingi atebuli lyamwami kwabuumwi bwakwe boonse, ³⁴ alimwi achaabilo cheelede chazyakulya chakali kupegwa mazuba woonse abuumi bwakwe kusikila kulufu.