¹ ''Fwambaana kwiinda mumigwagwa yaJelusalemu; yanduula kumababzu aachisi chakwe alubo. Mpawo ulange alimwi uyeeye aatala acheechi: Na wakonzya kujana mwaalumi naba womwe ulikulichita uululeme alimwi ulikuweezya kupona chakusyomeka, ndiyolekelela Jelusalemu. ² Nekuba balaamba, 'Mbuli Jehova mbapona,' nikuba boobo balikukonka zyakubeja.'' ³ Jehova, sa menso aako taalangi busyomesi na? Ulabawuma bantu pesi tabamvwi kuchisa pe. Wakabazunda kumaninide, pesi bachikaka kutambula lulayo. Bachita masyu aabo kuti ayume kwiinda bbwe, nkaambo balakaka kusanduka. ⁴ Aboobo ndakati, ''Nchobeni bantu aaba mbachete. Mbafubafuba, nkaambo tabazi nzila zyaJehova, nikuba mbeta zyaLeza wabo. ⁵ Ndiyoyinka kubantu bayandika akwaambilizya mulumbe kuzwa kuli Leza, nkaambo balizizi nzila zyaJehova, imbeta zyaLeza wabo.'' Pesi boonse bakatyola jogwe lyabo aantomwe; bakadunsula nketani zyakabaangide kuliLeza. ⁶ Aboobo mulavu wamulusaka uyobalwana. Wumpe uuzwa kuAlabbu uyobajaya. Siluwe uyonyoona chisi chabo. Ooyo uuzwa muchisi uyonyoonwa. Nkaambo milandu yabo yavula. Nchito zyabo zyakutasyomeka zyayindilila. ⁷ Nkaambonzi neyelede kulekelela bantu aaba? Bana babo balombe bakandisiya akukonka azitali baleza. Ndakabasanina bakuta pesi bakachita mamambe akweenda kabali biingi kuya kung'anda zyabasibwaamu. ⁸ Bakali mabhiza aasantukide. Bakali kweendeenda kabayanda cheembela. Umwi awumwi mwaalumi wakali kuswenenena mwanakazi wamweenzinyina. ⁹ Aboobo nsyeelede kubeempya na - ooku nkwaamba kwaJehova - alimwi nsyeelede kubweedezya na kuchisi chili boobu? ¹⁰ Koya aakati kamyeenya yamisaansa yakwe wiijaye. Pesi utakamaninsizyi pe kubajaya. Kkwezuula misaansa yabo mbukunga misaansa eeyo tiizwi kuliJehova pe. ¹¹ Nkaambo ng'anda zyaIzilayeli aJuda zyakanduuzya kumaninide - ooku nkwaamba kwaJehova. ¹² Bakaamba zyakubeja aatala aJehova kabati, ''Takwe nchatakachite pe; takwe bubi butakaze kulindiswe alimwi tatukoyobona panga na nzala. ¹³ Basinsimi bayooba luuwo, ijwi talili mulimbabo pe, aboobo leka nzibabamba zikachitike kulimbabo.'' ¹⁴ Aboobo Jehova, Leza wamakamu waamba eechi, ''Akaambo kakuti mwaamba eechi, bona, ndaamba kubika ijwi lyangu mumulomo wako. Linoli mbuli mulilo, alimwi bantu aaba banoli mbuli chisamu! Nkaambo uyobalya. ¹⁵ Amubone! ndaamba kweeta chisi chizwa kule kuti chizomulwane, ng'anda yaIzilayeli - ooku nkwaamba kwaJehova - chisi chitamani, chisi chachiindi! Nchisi chili aamuaka ngotazi pe, nikuba kumvwisisisya nzibaamba. ¹⁶ Inkomo yatunta ilimbuli kabanda katajalidwe pe. Boonse mbaasilumamba. ¹⁷ Bayoolya butebuzi bwako, achikkafu chako. Bayonyonyoona bana banu balombe abasimbi. Bayoolya mbelele zyako abutanga bwako. Bayoolya misaansa amikuyu yako. Bayopasula madolopo aako aayakilidwe oomo mobikide lusyomo lwako. ¹⁸ Pesi nikuba muliwayo mazuba - ooku nkwaamba kwaJehova - nsikwe muzeezo wakukunyonyoona kumaninidepe. ¹⁹ Eelyo aawo webo Izilayeli aJuda nimuyowamba kuti, 'Nkaambonzi Jehova Leza wesu naakachita zyoonse zintu eezi kulindiswe?' mpawo iwe, Jelemiya uyowamba kuti kulimbabo, 'Mbuli mbumwakasiya Jehova alimwi mwabelekela baleza bazwakule munyika yanu, aboobo muleelede kubelekela bazwakule munyika iitensi yenu.' ²⁰ Muzyaambe eezi kun'anda yaJakkobbu alimwi mukachizibye muJuda. Katedi, ²¹ 'Mumvwe eechi, nobafubafuba, nimutakwe kumvwisisisya; nimuli aamenso pesi tamuboni pe, alimwi muli aamatwi pesi tamumvwi pe. ²² Tamundiyowi na - ooku nkwaamba kwaJehova - na kukankama kunembo lyabusyu bwangu? Ndakabika mugaano wamuse wanzaania lwizi, nimbeta yiinkilila nembo njitasotoki pe - nikuba lwizi lulazula akuunguluka, pesi talusotoki kale pe. Nikuba mayuwe aalo avuuma akoondomoka, taazubuki kale pe. ²³ Pesi bantu aaba ali aamoyo wabuchuundwe. Ulachengunuka mukupapa akutakata. ²⁴ Nkaambo tabaambi mumyoyo yabo pe, ''Ngatuyowe Jehova Leza wesu, ooyo weeta mvula - mvula ntaanzi ayakumamanino - muchiindi cheelede, kutulondweda chiindi chakutebula cheelede.'' ²⁵ Zibi zyanu zyakakachizya zibotu kuti zisike kulindinywe. ²⁶ Nkaambo balajanika abantu bangu. Baleebela mbuli muntu uubwatilila kujata tuyuni; balateya kakole alimwi bacha bantu. ²⁷ Mbuli zongo lizwide tuyuni, ng'anda zyabo zizwide lweeno. Aboobo balakomena kapati alimwi baba banoti. ²⁸ Bakaneneya; balang'ayimina muzyiimo zibotu. Bakazubuka kuzwa kubwaange bwazibi zyonse. Tabaswiilili zyaamba bantu, na chipa kuti ube muchaala. Balazwidilila nikuba tabapede bululami kuli baabo babula. ²⁹ Nsyeelede kubapa chisubulo na akaambo kazintu eezi - ooku nkwaamba kwaJehova - alimwi nsikoyolibwedezezya na aanyika iili boobu? ³⁰ Zintu zibi ziyoosya zyakachitika munyika. ³¹ Basinsimi balasinsima chalweeno, alimwi bapayizi batonga aanguzu zyabo beni. Bantu bangu baziyanda munzila eeyi, pesi niinzi chiyochitika kumamanino?'''