¹ ''Na wabweeda, Izilayeli - ooko nkwaamba kwaJehova - zyeelede kuba kulindime kuti ubweede. Na wagwisya zintu zyako ziyoosya kuzwa kunembo lyangu akutayoozwa lubo kulindime limbi, ² weelede kuba akasimpe, uusalala alimwi uululeme eelyo nokonka, 'Mbuli Jehova mbwapona.' Mpawo zisi ziyolilongezya mulinguwe, alimwi mulinguwe bayopa bulemu.'' ³ Nkaambo Jehova waamba eechi kuliwumwi awumwi muntu muJuda amuJelusalemu: 'Lima nyika yako nomwini alimwi utabyali pe aakati kamaamvwa. ⁴ Mukalipalule kuiJehova, alimwi mukagwisye ndomo zyamyoyo yanu, nobaalumi baJuda abakkede muJelusalemu, lumwi bukali bwangu bulabbaluuka mbuli mulilo alimwi kawutenta kakutakwe ukonzya kuuzima, nkaambo kabubi bwanchito zyanu. ⁵ Muzibye muJuda alimwi muchite kuti zimvwigwe muJelusalemu. Amwaamba kuti, ''Lizya mweembo munyika.'' Waambe, ''Mubungane. Atweende kumyuunzi iibayilidwe.'' ⁶ Nyampula ndembela yachitondeezyo akuyitondeka kuZiyoni, alimwi chijila kumayubilo! Utakkali nkaambo ndiyobweeta lunyonyooko kuzwa kulubazu lwa Nyika, akuwa kupati. ⁷ Mulavu ulikuzwa musaka lyakwe alimwi umwi utakanyonyoone zisi ulikubambila. Ulikusiya busena bwakwe kukweeta nkondo munyika yako, kusandula myuunzi yanu akuba matongo, kakutakwe naba womwe uyofutuka. ⁸ Nkaambo kacheechi livumbe achivumbyo chesaka, ulile akweema. Nkaambo bukali bwanguzu zyaJehova tabubweeda musule pe kuzwa kulindiswe. ⁹ Mpawo ziyochitika muzuba eelyo - ooko nkwaamba kwaJehova - kuti myoyo yamwami abasilutwe bakwe iyoofwa. Bapayizi bayooyowa abasinsimi bayokankama.''' ¹⁰ Aboobo ndakati, ''Ikaka! Mwami Jehova inchobeni wakamaninsya kweena bwantu aaba aJelusalemu akwaamba kuti, 'Kuyooba luumuno lwako.' Kakuli panga lilikuuma akulwisya buumi bwabo.'' ¹¹ Muchiindi eechi zinowambuulwa aatala abantu aaba aJelusalemu, ''Luuwo lutenta kuzwa muntandabale zyankanda luyochita nzila yalo kumwana musimbi wabantu bangu. Tuukoyopupulula na kubasalazya. ¹² Luuwo luli aanguzu mpati kwiinda oolu luyoosika kwiinda mukulayilila kwangu, alimwi ndiyoopa chisubulo aatala ambabo. ¹³ Bona, ulikulwana mbui mayoba, alimwi nkalaki zyakwe zili mbuli mvula yaguwo. Mbongolo zyakwe zili aaluno kwiinda nsika. Maawe kulindiswe nkaambo tuyonyonyonwa! ¹⁴ Salazya moyo wako kuzwa kububi, Jelusalemu, kuchitila kuti mukafutulwe. Kuyooba chiindi chilamfu buti kuti mizeezo yako ikabisye? ¹⁵ Nkaambo ijwi lilikuleta twaambo kuzwa kuli Dani, alimwi lunyonyooko luyobuza lulikumvwigwa kuzwa kuzilundu zyaIfulemu. ¹⁶ Chita zisi kuti ziyeeye aatala acheechi: Bona, ambilizya kuliJelusalemu kuti basikusinkilizya bayobuza kuzwa kunyikakunyika yakule kuzowompolola munkondo aatala amyuunzi yaJuda. ¹⁷ Bayooba mbuli mulindizi wamuunda wakalimwa uzyungulukide, kuzwa naakandipandukila - ooko nkwaamba kwaJehova - ¹⁸ mayeeyelo amilimo yako nzizyachita zintu eezi kulinduwe. Eechi nchisubulo chako. Kuyoobija biyeni! Chiyowuma moyo wako lwawo. ¹⁹ Moyo wangu! Moyo wangu! Ndili mumapenzi mumoyo wangu. Moyo wangu tuukkalinkene pe. Takwe niinga nduumuna pe nkaambo ndamvwa kulila kwanyeele, nchenjezyo yankondo. ²⁰ Lunyonyooko lutobela lunyonyooko nkaambo nyika yoonse yaba matongo. Chakufwambaana matente angu amwayigwa, zisitikizyo zyangu mukayindi. ²¹ Kuyooba lili kuti nkabone bubotu? Sena ndiyoomvwa na kulila kwanyeele? ²² Nkaambo kabufubafuba bwababntu bangu - tabandizi pe. Nzizeenwa zyabantu alimwi tabakwe kumvwisisisya pe. Bali aaluzibo lwakuchita bubi, pesi tabazi pe kuchita bubotu. ²³ Ndakabona nyika. Amubone! Teyakali kulangika alimwi kitakwe chintu pe. Nkaambo tekwakali mumuni pe wamajulu. ²⁴ Ndakalanga kuzilundu. Amubone, bakali kukankama, alimwi toonse tulundu twakali kuteketa. ²⁵ Ndakalanga. Amubone, takwe wakali wo pe, alimwi tuyuni twakujulu twakali twawuluka. ²⁶ Ndakalanga. Amubone, myuunda yamichelo yakaba nkanda amyuunzi yoonse yakawisigilwa aansi kunembo lyaJehova, kunembo kwalunyemo lwakwe.'' ²⁷ Ncheechi nchaamba Jehova, ''Yoonse nyika iyooba matongo pesi nsikoyoyimwaya chakumaninina pe yoonse. ²⁸ Akaambo kachizato eechi, nyika iyoolila, majulu aali aajulu ayosizigwa. Nkaambo ndaamba makanze angu; nsikoyobweeda musule pe; nsikoyooleka pe kuzichita. ²⁹ Munzi umwi awumwi uyochija kuzwa kumuzuzumo wakupenzegwa akumpumba yabasilumamba abasitunta bali aatunta; bayochijila mulusaka. Munzi umwi awumwi uyotanta mumasena aali aamabwe. Myuunzi iyotakatwa nkaambo takwe uyoyikkala pe. ³⁰ LIno koli wanyonyonwa oobu, uyochita biyeni? Nkaambo nikuba wazwaata chizwaato chamanyemanyenge, kulibotezya anchoko zyako zyangolide, akuchita menso aako kuti aboneke kali mapati amusila, mwaalumi wakali kumweemuzya uyokukaka. Ani kuti balikweezya kubweza buumi bwako. ³¹ Aboobo ndakamvwa musabilo wakulila, kubulikilwa mbuli kutubukwa kwamwana mutaanzi, musabilo wamwana musimbi waZiyoni. Ulikufwetuuka kuyoya. Ulakwazamuna maboko aakwe, 'Maawe kulindime! Ndilikuwizuuka akaambo kabajayi aaba.'''