¹ ''Na mwaalumi waleka mwanakazi wakwe mpawo wazwa kulinguwe akuba mwanakazi wawumbi mwaalumi, ulakonzya lubo na kubweeda kulinguwe? Tikonooli yasofwaala kapati nyika eeyo? Wapona mbuli sibwamu ooy uli aabayandwi biingi; alimwi uyoboola na kulindime? - ooku nkwaamba kwaJehova. ² Nyampula menso aako kusika kule alimwi ulange! Nkubuli na busena ooko nkuwakatachita bumambe? Kumbali anzila mulalindila bayandwi banu, mbuli muAlabbu munkanda. Mubumambe amububi mwasofwaazya nyika. ³ Aboobo lunywaanywa lwamvula alimwi amvula yamiinza teyaboola pe; pesi muli aankumu yasibwaamu; mulakaka kuwusigwa nsoni. ⁴ Lino tensi wiita kulindime na: 'Taata wangu! Mweenzuma waafwifwi kuzwa kubuniini bwangu! ⁵ Sena uyoonyema zyiindi zyoonse? Sena uyookkala kali aabukkali kuyosika kumamanino?' Langa! Eezi nzizyo nziwaamba, pesi ulachita bubi boonse mbokonzya!'' ⁶ Mpawo Jehova wakandaambila kuti mumazuba aaJosaya mwami, ''Mwachibona na eecho chachitwa aIzilayeli utakwe lusyomo? Watanta tulundu toonse alimwi wayinka munsi lyamusamu woonse uli aamatu, ooko wachita mbuli simamambe. ⁷ Ndakati, 'Naamana kuchita zintu zyoonse eezi, ulaboola kulindime,' pesi takaboola pe. Mpawo muchizi wakwe Juda uutasyomi wakabona zintu eezi. ⁸ Aboobo ndakabona kuti munzila iikozyenie Izilayeli uutakwe lusyomo wachita bumambe alimwi ndamutanda akumupa lugwalo lwakulekana aatala anguwe, mwanike wakwe Juda taakayowa pe; wakazwa alakwe aanze waakuchita mbuli simamambe. ⁹ Bwaamu bwakwe bwakaba bwabuyo kulinguwe; wakasofwaazya nyika. Wakachita bumambe aamabwe amisamu. ¹⁰ Mpawo musule lyachechi, mwanike wakwe Juda uutasyomi wakaboola kulindime chamoyo uutamaninide pe, pesi amabejo - ooko nkwaamba kwaJehova.'' ¹¹ Mpawo Jehova wakaamba kuti kulindime, ''Izilayeli utakwe lusyomo wakaliluleme loko kwiinda Juda utakwe lusyomo! ¹² Koya ukakambawuke majwi aaya kulubazu lwanyika. Ukaambe kuti, 'Boola, Izlayeli utakwe lusyomo! - ooko nkwaamba kwaJehova - nsikoyokunyemena pe lyoonse. Mbukunga ndilisyomekede - ooko nkwaamba kwaJehova - nsikoyookkala nkenyemede pe lyoonse. ¹³ Zumina milandu yako, nkaambo wabisizya Jehova Leza wako; waabana nzila zyako abazwakule munsi lyamusamu umwi awumwi uli aamatu! Nkaambo tewakaswiilila jwi lyangu pe! - ooko nkwaamba kwaJehova. ¹⁴ Amuboole, nobantu batakwe lusyomo! - ooko nkwaamba kwaJehova - ndime mulumi wanu! Ndiyokubweza, womwe kuzwa kuchisi alimwi babili kuzwa kumpuli, ndiyomweeta kuZiyon! ¹⁵ Ndiyokupa beembeli bali aamoyo wangu, alimwi bayokweembela chaluzibo achakulangisisya. ¹⁶ Mpawo chiyoochitika kuti mukavule akuzyala michelo munyika mumazuba aayo - ooko nkwaamba kwaJehova - tabachiyowambai limbi kuti, ''Ibbokesi lyachizuminano chaJehova!'' Aaka kaambo takakoyosika limbi kumyoyo yabo na kuyeeyegwa limbi; tachikoyobulwa, alimwi takwe chimbi chiyochitwa.' ¹⁷ Muchiindi eecho bayowamba aatala aJelusalemu, 'Eechi nchuuno chabwaami chaJehova,' alimwi zyoonse zimwi zisi ziyobungana kuJelusalemu muzina lyaJehova. Tabachiyoyendi limbi mukuunduuzya kwamyoyo yabo yabubi. ¹⁸ Mumazuba aayo ng'anda yaJuda iyoyenda ang'anda yaIzilayeli. Bayoyoboloka aantomwe kuzwa kunyika yakulubazu lwakunyika kuyoosika kunyika eeyo njindakapa baIzilayeli mbuli lukono lwabo. ¹⁹ Mbuli ndime ndaamba kuti, 'Mbuli mbeyanda kumubweza mbuli mwana wangu mulombe akumupa nyika mbotu, lukono lubotu loko kwiinda oolo luli mulichimwi chisi!' Ninga ndaamba kuti, 'Uyondiita kuti ''taata wangu''.' Ninga ndaamba kuti tokoyopiluka kunditobela. ²⁰ Pesi mbuli mukayintu utasyomi mulumi wakwe, wanduuzya, ng'anda yaIzilayeli - ooko nkwaamba kwaJehova.'' ²¹ Ijwi lyamvwigwa kumisena, kulila akukombelezya kwabantu baIzilayeli! Nkaambo basandula nzila zyabo; baluba Jehova Leza wabo. ²² ''Amuboole, bantu nimutakwe lusyomo! Ndiyomusilika mubuuzyi!'' ''Amubone! Tuyooza kulinduwe, nkaambo nduwe Jehova Leza wesu! ²³ Nchobeni mabejo azwa kutulundu, muzuzumo uusowesya kuzilundu; nchobeni Jehova Leza wesu ndufutuko lwaIzilayeli. ²⁴ Pesi zikozyanio zifwisya bweeme zyanyonyoona eezyo basikale besu nzibakabelekela - matanga eembono zyabo, bana babo balombe abana babo basimbi! ²⁵ Atulale aansi mukuwusa. Ikaka kuusa kwesu kutuvumbe nkaambo twabisizya Jehova Leza wesu! Swebo tobeni abasikale besu kuzwa kuchiindi chabwanike bwesu kusikila kubuzuba bwasunu, tetwakaswiilila kujwi lyaJehova Leza wesu!''