¹ Ijwi lyaJehova lyakaza kulindime kaliti, ² ''Koya ukaambe mukuswiilila kwaJelusalemu. Ukatedi, ''Jehova waamba eechi: ndayeya muchibela chako chizuminano chabusyomesi chabukubusi bwako, luyando lwako kuchiindi nitwakajatanisigwa, niwakandiyanduula munkanda, nyika itakwe niyakabyedwe. ³ Izilayeli yakalisalilidwe Jehova, kabalwabalwe kabutebuzi bwakwe! Boonse bakalya kuzwa kukabalwebalwe bakali aamulandu; ntenda zyakabawida - aaya malayilile aJehova''' ⁴ Swiilila jwi lyaJehova yoong'anda yaJakkobbu, nywebo moonse nobamukowa yang'anda yaIzilayeli. ⁵ Jehova waamba eechi, ''Niinzi bamawuso ncjibakajana kachili chibu kulindime, chakabachita kuti beendele kule kzwa kukunditobela? Zyakuti bakatobela zikozyanio zitagwasyi alimwi abalabo bakaba batagwasyi beni? ⁶ Tebakaamba pe kuti, ''Ulikuli JEhova ooyo wakatugwisya kuzwa kunyika yaIjipiti? Ulikuli Jehova ooyo wakatuzulwidwa kuya mukanda, munyika yabaAlabba amalindi, munyika yachimpayuma amudima uusiya mbi, nyika iitakwe wiinda mumo alimwi iitakwe uukkala mumo?' ⁷ Pesi ndakamweeta kunyika yaKkamelu, kuyoolya muchelo wayo azimwi zintu zibotu! Eelyo aawonimwakaza mwakasofwazya nyika yangu, mwakachita lukono lwangu lwabachisesemyo! ⁸ Mupayizi tensi wakaamba kuti, 'Ulikuli Jehova?' abalabo basyabusongo basimilawu tebakaba aamakani andime pe! Beembeli bakandibisizya. Basinsimi bakasinsima Bbaalaakweendela zintu zitakwe mpindu. ⁹ Aboobo ndiyomupa mulandu - ooku nkwaamba kwaJehova - alimwi ndiyopa mulandu kubana balombe babana benu balombe. ¹⁰ Mukazubukile mutala eeliya lyaKkitimu alimwi mukalange. Mukatume batumwa kuya kuKkeda akuyoyandulisisya akubona na kwakali kwaba chintu chili boobu mumazuba akiinda. ¹¹ Sena chisi chakali kwiinzanisya baleza, nikuba kuti tebakali baleza? Pesi bantu bangu bakiinzanisya bulemu bwabo kuzintu zitabagwasyi. ¹ . ¹² Mukankame, nomajulu, akaambo kacheechi! Amukatilimuke akuyowa aaya malayilile aaJehova. ¹³ Nkaambo bantu bangu bandibisizya zibi zibili: Bakasiya tusensa twamanzi abuumi alimwi bakalisyida mikala beni, mikala ifwide iitachikonzyi kubamba manzi. ¹⁴ Sena Izilayeli muzike? Wakazyalilwa mumunzi wasimalelo wakwe na? Aboobo nkamboonzi naaba chisaato? ¹⁵ Balavu baniini bakamuvulumina. Bakachita kuyowa kupati akuchita nyika yakwe yaba chiyoosyo. Myuunzi yakwe yakamwayigwa tatichikwe bayikkala pe. ¹⁶ Abalabo bantu baMemfisi abaTapanesi bayokulula kapapa kako. ¹⁷ Sena temwakalichitila oobo na nimwakasiya Jehova Leza wanu, nakali kumuzulwida mukati kanzila? ¹⁸ Akkako nkaambonzi nimutobelezya nzila iiya kuIjipiti akuyonywa manzi aaSyiholi? Nkaambonzi nimutobelezya nzila iiya kuAsiliya akuyonywa manzi aaMulonga Yufuletisi? ¹⁹ Bubi bwanu bulamukalalila, alimwi kutasyomeka kwanu kulamusubula. Aboobo amuyeeye aatala anchicho akumvwisisisya kuti nchibi alimwi kulalula aawo nimusiya Jehova Leza wanu, alimwi akutandiyowa - ooku nkwaamba kwaMwami Jehova wamakamu. ²⁰ Nkaambo ndakatyola jogwe lyako eelyo ndiwakali aalyo mazuba achiindi; ndakadunsula bwaange kuzwa kulinduwe. Wakaamba kuti, 'Nsikoyoobeleka!' mbukunga wakavundama mukalundu kalamfu aansi kamusamu woonse uli aamatu, webo simamambe. ²¹ Ndakakubyala mbuli muchelo musale, kuzwa kunseke iizulide mbotu. Mpawo walisandula buti kuba musaansa uunyongene uutakwe lugwasyo. ²² Nkaambo nikuba walisanzya lwako mwini mumulonga na kusamba ansipa nkali, bubi bwako ndibbata kunembo lyangu- ooku nkwaamba kwaMwami Jehova. ²³ Kujana ulaamba biyeni kuti, 'Nsisofweede pe! Tendakatobela baBbaala pe'? Langanziwakachita mumimpata! Yeesesya nziwakachita - uli nkamela nzyazi iizyatuuka kuchijaanaoku akoku, ²⁴ mbong'olo yamusokwe iizibide munkanda, mukusantuula kwayo kinunkizya muuwo! Ngwani uunga ulijalisya nkosya yayo? Takwe ng'enze zilimvwa kuyanda kwiitobela; kuchiindi chakusantuzya balayijana. ²⁵ Mweelede kukakila ndyato zyanu kuyooba zitasami amagoyooyo aanu kuba aanyota! Pesi mwakaamba kuti, 'Tazikwe bulangilizi! Pe, ndilayanda bamazwakule akubatobela!' ²⁶ Mbuli bweeme bwa mubbi naajanwa, aboobo ng'anda yaIzilayeli iyofwisigwa bweeme - nbo abaami babo, bana babo balombe baami, bapayizi babo abasinsimi! ²⁷ Aaba mbimbabo baamba kuti kumusamu, 'Nduwe taata wangu,' akubbwe, 'Nduwe wakandizyala.' Nkaambo masule aabo ngaandilanga peepe masyu aabo. NIkubaboobo muchiindi chamapenzi balaamba kuti, 'Buka alimwi utuvune!' ²⁸ Pesi balikuli baleza mbimwakalibumbila? Ngababuka na kabayanda kumufutula muchiindi chamapenzi, bkaambo zikozyanio zyanu zileelene amyuunzi yanu kuvula, Juda! ²⁹ Aboobo nkaambonzi nimundipa mulandu wakuchita chitaluleme? Moonse mwandibisizya - ooku nkwaamba kwaJehova. ³⁰ Ndakasubula bantu bako chabuyo. Tebali kutambula pe lulayo. Ipanga lyako lyakalya basinsimi bako mbuli mulavu unyonyoona! ³¹ Nywebo nobezyalane eeli! Amuswiilile kujwi lyangu, ijwi lyaJehova! Sena ndakali nkanda kuliIzilayeli? Na nyika yamudima uusiya mbi? Nkaambonzi bantu bangu ninga balaamba kuti, 'Tuleke tupimpile, tatukoyooza limbi kulinduwe'? ³² Sena nakalindu kujana waluba nchoko zyakwe, nabwiinga zizwaato zyakwe? Pesi bantu bangu bakandiluba kwamazuba aatabaliki! ³³ Mulalomya kubamba nzila zyanu kukuyanduula luyando. Mwakayisya nzila zyanu nikuba kubanakazi basizibi. ³⁴ Bulowa bwakali buumi kubaluleme, bantu bachete bakajanika aazisamo zyanu. Bantu aaba tebakajanikana pe munchito zyabubbi. ³⁵ Pesi waamba kuti, 'Tandikwe mulandu pe; nchobeni lunyemo lwakwe lwakazwa kulindime.' Pesi langa! Ndiyooselusizya lubeta aalinduwe nkaambo waamba kuti, 'Ntandibisizye pe.' ³⁶ Nkaambonzi ulawubya kusanduka kwanzila zyako? Alubo uyonyemesegwa aIjipiti mbuli mbuwakanyemesegwa aAsiliya. ³⁷ Alimwi uyoozwa ooko kowuside, kojisi kumutwe wako, nkaambo Jehova wabakaka aabo mbosyoma, aboobo tokoyoogwasigwa ambabo.''