¹ Aatala abantu ba Aamoni, Jehova waamba boobu, ''Ani Izilayeli taakwe baana na? Takwe na umwi ukonzya kukona kufumbwa chintu mu Izilayeli? Nkaamboonzi Moleki naakkala muGadi, alimwi bantu bakwe bakkala mumadolopo aacho? ² Aboobo langa, mazuba asika, ooku nkwaamba kwa Jehova, aawo nindiyoosiba mweembo wakusungwida kulwisya aKkabba mukati kabantu baAmoni, aboobo chiyooba chitakatidwe alimwi myuunzi yacho iyo wuumpwa amulilo. Nkaambo Izilayeli uyokona aabo bakamukonede, mbawamba Jehova. ³ ''Uyoleema, Sesibboni, nkaambo Aayi uyonyonyoonwa. Amompololole nobana basimbi ba Labba! Amusame chibaki chamasaka. Amulyeeme akuchijana mukunyema, nkaambo Moleki ulatolwa mubwaange, alimwi abapayizi bakwe abazuluzi. ⁴ Nkaambonzi nimutalikankayizyi aatala amisena yenu, misena yenu iizyala michelo nobana basimbi batakwe lusyomo? Nywebo nimusyoma mubuvubi bwenu akwaamba kuti, 'Ngwani utakatulwisye?' ⁵ Amubone, ndaamba kumweetela luyoosyo, ooko nkwaamba kwa Mwami Jehova muleli, luyoosyo luyoozwa kuli boonse bamuzyungulukide. Umwi awumwi wenu uyoopampala. Takukoyooba muntu uswanizya aabo bayobuchija pe. ⁶ Pesi musule lyazeezi ndiyosandula lubo bwaange bwabantu ba Aamoni, ooku nkwaambilizya kwa Jehova.'' ⁷ Aatala a Adomu, Jehova wamakamu waamba boobu, ''Takuchikwe busongo bujanika na muTemani? Inchenjezyo mbotu yamwayiika na kulibaabo bali akumvwiisisiysya? Busongo bwabo bwapungulwa na? ⁸ Amuchije! Mubweede! Mukkale mubulyango munyika, amukkale muDedani. Nkaambo ndikweeta lunyonyooko lwaEsawu aalinguwe muchiindi nchendimupa chisubulo . ⁹ Na basikutebula masansa basika kulindinywe, tebali kusiya kaniini na musule? Anooli basikubba basika mansiku, tebali kunoobba mubayandila na? ¹⁰ Pesi ndazwatununa Isawu waba chinswe. Ndatondeezya zito zyakwe zyakuyubila. Nkikaakotachiyokonzyi kuyuba pe! Bana bakwe, bakulana bakwe, abasimayakilane bakwe bajayigwa, alimwi weenda. ¹¹ Musiye bamuchaala musule. Ndiyobamba buumi bwabo, alimwi bamukabafu benu bayokonzya kusyoma muli ndime.'' ¹² kaambo Jehova waamba boobu, ''Bona, aabo batacheelede kweelede kuti zyakasimpe banywe zimwi munkomeki. Mubonaanga nywebo muleenda biyo kamutajene chisubulo na? Tamuchibuli pe nkaambo nkasimpe muyoonywa. ¹³ Nkaambo ndakakonnkezya ndemwiini ooku nkwaamba kwaJehova, kuti Bboza uyooba chiyoosyo, chisampuuzyo, achimwayuusyo alimwi chintu chakutukwa. Woonse madolopo aayo ayomwayika kwalyoonse. ¹⁴ Naakamvwa makani kuzwa kuli Jehova, alimwi muntu wakatumwa kuzisi zyoonse, 'Amubungane antoomwe akumulwisya. Mulibambile kuya kunkondo. ¹⁵ Nkaambo langa, ndamuchesya kwiinda zisi zyoonse, zisampulwa abantu. ¹⁶ Mukuyoowa kwenu, kulisumpula kwamyooyo yenu kwamweena, nimukkala mutulundu tulamfu kwiindilila kuchitila kuti muyake zikumbo zyenu mujulu mbuli nkwazi. Ndiyomuselezya kuzwa kujulu, ooku nkwaamba kwaJehova. ¹⁷ Edomu uyooba chiyoosyo kuli woonse uyiinda alinjiyo. Kufumbwa muntu uuliboobo uyokankama akusyola nkaambo kalunyonyoono lwakwe. ¹⁸ Mbuli kunyonyoonwa kwaSodomu aGomola aba simabambanwa babo, mbawamba Jehova, ''Taakwe nikuba uumwi uyokkala ooko, takwe muntu uyokkala nkuko pe. ¹⁹ Amulange, uyoyenda mbuli mulavu kuzwa mulusaka lwaJodani kusikila kumachelelo mabotu. Nkaambo ndiyofwambaana kuchita Edomu kuti achije kuzwa kulinchicho, alimwi ndiyobikka umwi uyoosalwa kuti abemweendelezi. Nkaambo ngwani ulimbuli ndime, alimwi ngwani ukonzya ? Ngwaani mwembeli ukonzya kundikazya?'' ²⁰ Aboobo swilila kumabaambe aJehova ngayeeya aatala a Edomu, mabambe aayo ngaapanga aatala abakkala muTemani. Bayobwedezya musule chakumaninsya, nikuba butanga buche. Machelelo aabo ayoba masena amachelelo aabo ayooba matongo. ²¹ Kumuzuzumo wakuwa kwabo nyika ilazungaana. Muzuzumina wakubulikilwa kwabo wamvwika kulwizi lwamatete. ²² Amubone umwi uyojaya mbuli nkwazi, alimwi akujula mababa aakwe aatala aaBboza mubuzuba oobo, myoyo yabasilumamba ba Edomu iyooba mbuli moyo wamwanakazi uuli mumachise akutumbuka.'' ²³ Aatala aDamasikasi: ''Hamati aApadi bayowusigwa bweeme, nkambo bamvwa makani aalunyonyoono. Bakayaaya! Babambuli lwizi loondomoka, lutakonzyi kubatama. ²⁴ Damasikasi tachikwe manguzu. Wabweeda musule kuti achije, nkuyoowa mapenzi amachise abajata, mbuli machise amwanakazi uyanda kutumbuka. ²⁵ Wakakwa biyeni munzi ulumbayizigwa, dolopo lyalukondo lwangu? ²⁶ Nkikaako baalumi bakubusi bayoowa mumigwagwa, alimwi boonse baalumi balwana bayomana mubuzuba oobo, ooko nkwaamba kwaJehova wamakamu.'' ²⁷ Nkaambo ndiyoyasya mulilo aabulambo bwaDamasikasi, alimwi mayubilo aBbeni Hadadi.'' ²⁸ Aatala aKkeda abwami bwaHaza, Jehova waamba eechi kuli Nebbukkadineza (Lino Nebbukkadineza mwami waBbabbiloni wakali kuyanda kulwana masena aaya) ''Buka akulwisya Kkeda akunyonyoona bantu bakujwe. ²⁹ Matente aabo ayobwezegwa, azyoonse zibelesyo zyabo, nkamela zyabo ziyobingwa kunembo lyabo. Alimwi bantu bayowoompolola kulimbabo, ''Ziyoosya zili kumabazu woonse!'' ³⁰ Muchije mwinke kule! Amukkale mumalyango munyika, nimukkala muHaza, ooku nkwaamba kwaJehova, nkaambo Nebbukkadineza mwaami waBbabbiloni ulimukanzide kuli nzyayeeya aatala andinywe. Muchije! ³¹ Mubweede musule! Mubuke! Amulwisye nyika iilyibide, iikkede kabotu,'' mbwaamba Jehova. ''Takwe milyango na makkoma kulimbabo, alimwi bantu beyo balilikkalilide. ³² Nkaambo nkamela zyabo zyoonse ziyooba zyenkondo. Mpawo ndiyomwaya kuguuwo lyoonse aabo bantu bagela zyooko zyamitwe yabo, alimwi ndiyoyeta lunyonyooko alimbabo kuza kumabazu woonse, ooku nkwaamba kwaJehova. ³³ Haza uyooba mbuli luumbu lwabamwaaba, uyooba tongo mukumanininizya. Takwe uyokkala nkuko, taakwe muntu uyokkala ooko.'' ³⁴ Eelindijwi lyaJehova lyakasika kuli Jelemiya musinsimi aatala a Elamu. Eechi chakachitika kumatalikilo akwendelezya kwaZedekkiya mwami waJuda, alimwi wakaamba kuti, ³⁵ ''Jehova wamakamu waamba eechi: Bona, ndaamba kutyola zikombelo zya Elamu, eecho chibapanguzu. ³⁶ Nkaambo ndiyoyeta nguuwo zyone zizwa kumabazu oone amajulu, alimwi ndiyomwaya bantu baElamu kunguwo zyoonse. Taakwe chisi aabo bayomwayigwa kuzwa kuli Elamu nkubatakanbule kusika. ³⁷ Aabobo ndiyoyeta Elamu kunembo lyabasinkondonyina akunembo lyabaabo bayanda kubajaya, nkaambo ndiyoyeeta mapenzi akati kabo, bukali bwakunyema kwangu, ooku nkwaamba kwa Jehova, alimwi ndiyotumizya panga musule lyabo kusikila nkabamane. ³⁸ Mpawo ndiyobika chuuno changu chabwami muElamu akuyobajaya mwami abazuluzi kuzwa nkuko, ooku nkwaamba kwaJehova, ³⁹ alimwi ziyochitika kuti ndiyobweedezya musule bwaange bwaElamu, ooku nkwaamba kwaJehova.''