¹ Eeli ndijwi lyakasika kuli Jelemiya musinsimi aatala amaasi. ² Nkambo ka Ijiputi: ''Eechi chilatala aampi ya Falo Nekko, mwami wa Ijiputi oyo wakaliku Kkakkemisyi kumbali lya Mulonga Ufuletesi. Eeyi njiyakali mpi eyo Nebbukkadineza mwami wa Bbabbiloni njakazunda mumwaaka wa Josiya, mwami wa Juda: ³ Amubambe ntobo ziniini antobo mpati, mpawo mwiinke kunembo kuyolwana. ⁴ Amubikke maanisi amabbiza; mwawange amabbiza akwimikila angowani zyanu; musyobole masumu akusama zibaki zyankondo. ⁵ Niinzi nchendilikunbona aano? Bazuzigwa akuyoowa akuchija, nkaambo basilumamba babo bazundwa. Bachijila lwangunuko akutachebuka musule pe. Buyoofu nkobuli konse konse -- aya malayilile a Jehova -- ⁶ basiluno tabakonzyi kuchija pe, alimwi basilumamba tabaloboki pe. Balalebwa mulubazu lwakunyika akuwida kumbali aa Mulonga Ufuletesi. ⁷ Ngwani oyo ubuka mbuli Nayile, oyo ujisi maanzi ayumaana kujulu aansi mbuli milonga? ⁸ Ijiputi ulabuka mbuli Nayile, mbuli milonga yameenda aayo abuka akuwa, Ijiputi waamba kuti, 'Ndiyotonta akuvumba nyika. Ndiyomwaya myunzi ababo bakkede mumo. ⁹ Amutante kujulu, nomabbiza. Ngamunyeme, nonkalaki. Basilumamba ngabazwe, Kkusyi a Puti, baalumi bali aluzibo antobo, alimwi Ludimu, baalumi bali aluzibo kukugobesya tunta twabo. ¹⁰ Buzuba oobo buyoba buzuba bwa Mwami Jehova wamakamu, bwakuliya nkoto, alimwi uyoliyila basinkondonyina. Ipanga liyolya akukkuta. Liyonywa bulowa bwabo likazule. Nkambo kuyooba chipayizyo ku Mwami Jehova wamakamu kulubazu lwanyika yakunyika kumbali a Mulonga Ufuletesi. ¹¹ Tanta ku Giliyadi mpawo ukabweze munsamu wakusilika, mwana musimbi nakalindu wa Ijiputi. Tavchigwasyi kuti ulibike munsamu wakusilika mabbona. Tokwe notaponesegwe pe. ¹² Maasi akamvwa azyalusampawuko lwako. Nyika yazuzigwa akukwila kwako, nkambo silumamba walebwa atala aasilumamba; boonse bawida aamwi.'' ¹³ Eeli ndijwi eelyo Jehova ndyakaambila Jelemiya musinsimi akulwisya nyika ya Ijiputi: ¹⁴ ''Amuzibye mu Ijiputi, alimwi muchiluule mu Migidolu, Memfisi amu Tapanihesi. 'Amunyampuke akulibambila, nkambo ipanga liyolya aabo bamuzyungulukide.' ¹⁵ Nkamboonzi basinguzu bako nibatungumana aansi aanyika? Tabakwe kuyoyimikila, nkambo Imebo, nde Jehova ndakaba chindila aansi. ¹⁶ Wakayungizya mweelwe wabaabo balebwa. Umwi awumwi silumamba wakaamba aatala awumwi uutobela. Baamba kuti, 'Mubuke. Atweendekumunzi.'Atubwede kubantu besu, kunyika yabuzyalwe bwesu. Atusiye panga eeli lilikutuumina ansi.' ¹⁷ Bakazibya nkukooko, kuti, 'Falo mwami wa Ijiputi ngusikuyowela biyo, umwi oyo wakalekela chiindi chakwe kwiinda.' ¹⁸ Mbuli mbwendipona -- mbwawamba Mwami, uli azina lya Jehova wamakamu -- umwi uyosika mbuli Chilundu Tabba a Chilundu Kkamelu kumbali lyalwizi. ¹⁹ Amulibambile kunyampuka zintu zyamubuzike, nywebo nomukkede mu Ijiputi. Nkaambo Memfisi uyosowegwa, uyoba tongo akubula umwi uyokkala mumo. ²⁰ Ijiputi ning'ombe mpwizi mbotu, pesi muzimbwa ulasika kuzwa kulubazu lwakunyika. Iyobuza. ²¹ Basilumamba babbadalwa mali mukkati kakwe bali mbuli mupule wang'ombe uneneesegwe, pesi alubo bayobweeda akuchija. Tabakwe nibayoyimikila aamwi pe, nkambo buzuba bwalunyonyooko lwabo bulasika atala ambabo, chindi chalusubulo lwabo. ²² Ijiputi wafoota mbuli nzoka akuyalalika, nkambo basinkondonyina bamusikila. Bamwiinkila mbuli basikutema zisamu atuleba. ²³ Baypgonkelansi lusaka--aya malayilile a Jehova -- nikuba kuti lusinkide loko. Nkambo basinkondo bayooba biingi loko kwinda nsoozi, kabatabaliki pe. ²⁴ Mwana musimbi wa Ijiputi uyofwinsigwabweeme. Uyopegwa mujanza lyabantu bazwa kulubazu lwakunyika.'' ²⁵ Jehova wamakamu, Leza wa Izilayeli waamba kuti, ''Bona, Mebo ndaamba kusubula Amoni waku Tebbesi, Falo, Ijiputi abaleza bakwe, baami bakwe a Falo abaabo basyoma mulimbabo. ²⁶ Ndabapeda mujanza lyabamwi aabo balanguula buumi bwabo, mpawo mujanza lya Nebbukkadineza mwami wa Bbabbiloni abalanda bakwe. Mpawo kwiinda kwazeezi Ijiputi uyokkaligwa mbuli mumazuba akayinda -- aya malayilile aa Jehova. ²⁷ Pesi webo, nomulanda wangu Jakkobbu, utayoowi pe. Utakankami, Izilayeli, nkambo boona, ndaamba kukubwedezya kuzwa kule, alimwi lunyungu lwako kuzwa kunyika zyabuzike bwabo. Eelyo Jakkobbu uyobweeda, alimwi uyojana lumuno mpawo uyokwabililwa, alimwi takukwe nikuyoba sikumuyosezya pe. ²⁸ Webo, nomulanda wangu Jakkobbu, utayowi pe -- aaya malayilile a Jehova -- nkambo ndili ayebo, aboobo ndiyoyeta lunyonyooko luzulide aatala amasi woonse ooko nkundaka mumwayisizya pesi tandikwe nenjomunyonyoona chakumaninina pe. Pesi ndiyomupa chisubulo chakululama akutamusiya kamutasubwidwe pe.''