¹ Ijwi lyakasika kuliJelemiya kuzwa kuliJehova musule aakugwisigwa kwaNebbuzaladani silutwe wabalindizi bamwami kuLama. Wakakujana Jelemiya ulaangidwe amanketani aakati kaboonse baange bamuJelusalemu abaJuda bakatolwa mubuzike bwaBbabbiloni. ² Silutwe mupati wabalindizi wakabweza Jelemiya akwaamba kuti kulinguwe, ''Jehova Leza wako nguwakaamba lunyonyooko oolu aatala abusena oobu. ³ Aboobo Jehova walweeta. Wachita mbuli mbaakambide, mbuli kuti nywebo mwakmubisizya chakumulwisya alimwi temwakaswiilila jwi lyakwe pe. Nchenchicho chintu eechi nchinchachitika kulindinywe nobantu. ⁴ Pesi lino langa! Ndakwaangununa sunu kuzwa kumanketani aakali kumaboko aako. Kuti kazili zibotu kumenso aako kwiinka anduwe kuBbabbiloni, kweza, alimwi ndiyokuvuba. Pesi kuti kazitali zibotu mumenso aako kwiinka andime kuBbabbiloni, mpawo utachiti oobo. Langa munyika yoonse iilikunembo lyako. Koya nkwiili mbotu akululama kunembo lyako kuti wiinke.'' ⁵ Eelyo Jelemiya naakatasandula, Nebbuzaladani wakati, ''Koya kuGedaliya yomwana mulombe waAyikkamu mwana mulombe waSyapani, ooy mwami waBbabbiloni ngwakabika kukweendelezya myuunzi yaJuda. Kakkale anguwe aakati kabantu na koya kufumbwa kukubotela mumenso aako kwiinka.'' Silutwe mupati wabalindizi bamwami wakamupa chakulya achipo, alimwi mpawo wakamuleka wayinka. ⁶ Aboobo Jelemiya wakayinka kuGedaliya mwana mulombe waAhikkamu, kuMizipa. Wakakkala anguwe aakati kabantu oobo bakasyeede musule munyika. ⁷ Lino bamwi basilutwe bempi yabasilumamba babaJuda bakachili kumbali lyanyika - bo abantu aabo - bakamvwa kuti mwami waBbabbiloni wabika Gedaliya mwana mulombe waAhikkamu kuti ayendelezye nyika. Alubo bakamvwa kuti wamubika kuti ayendelezye baalumi, banakazi, abana bakali bachete kwiindilila munyika, aabo bakatatolwa kuBbabbiloni pe. ⁸ Aboobo bakayinka kuliGedaliya kuMizipa. Aaba baalumi bakali Isimayeli mwana mulombe waNetaniya; Johanani aJonatani, bana balombe baKkaliya; Selayiya mwana mulombe waTanumeti; bana balombe baIfayi muNetofatayi; aJazaniya mwana mulombe waMakatayiti - bo abaalumi babo. ⁹ Gedaliya mwan mulombe waAhikkamu mwana mulombe waSyapani wakapa chikonke kulimbabo akubaalumi babo alimwi wakati, ''Mutayowi kubelekela basilutwe babaKkaludiyeni. Amukkale munyika alimwi mubelekele mwami waBbabbiloni, alimwi ziyomweendela kabotu. ¹⁰ Langa, ndikukkala muMizipa kuswaanana aabaKkaludiyeni bakaza kulindiswe. Aboob mutebule wayini, amichelo yamayinza, amafuta alimwi mwaabambe muzilondwedo zyanu. Mukakkale mumyuunzi njimwakakkala.'' ¹¹ Mpawo boonse baJuda muMowabbu, aakati kabantu baAmoni, abali muIdomu, amunyika yoonse bakamvwa kuti mwami waBbabbiloni wazumizya aabo bakasyaala muJuda kuti bakkale, kuti wasala Gedaliya mwana mulombe waAhikkamu mwana mulombe waSyapani kuti abeendelezye. ¹² Aboobo boonse baJuda bakaboola kuzwa kumasena woonse nkubakali bamwayilwa. Bakaboola kunyika yaJuda, kuli Gedaliya kuMizipa. Bakatebula wayini amichelo yamayina mubwiing loko. ¹³ Johanani mwan mulombe waKaliya aboonse basilutwe babasilumamba bakunyika iilikumbali bakaza kuliGedaliya kuMizipa. ¹⁴ Bakati kulinguwe, ''Ulizi na kuti Bbalisi mwami wabantu baAmoni wakatuma Isimalyeli mwana mulombe waNetaniya kuti azokujaye?'' Pesi Gedaliya mwana mulombe waAhikkamu taakabasyoma pe. ¹⁵ Aboobo johanani mwana mulombe waKkaliya wakambuula chakusisikizya kuligedaliya kuMizipa alimwi wakati, ''ndizumizye kuti ndiinke ndikajaye Isimayeli mwana mulombe waNetaniya. Tawo pe utakandiyeeyele. Nkaambonzi nayelede kukujaya? Nkaambonzi kuzumizya baJuda boonse aaba bakabunganisigwa kulinduwe kuti bamwayikizyanie abasyeede baJuda banyonyoonwe?'' ¹⁶ Pesi Gedaliya mwana mulombe waAhikkamu wakati kuliJohanani mwana mulombe waKkaliya, ''Utachiti eechi chintu, nkaambo ulikwaamba mabejo aatala aIsimayeli.''