¹ Lino Zedekkiya mwana mulombe waJosiya wakeendelezya mbuli mwami kwiinda Jehoyakkini mwana mulombe waJehoyakkimu. Nebbukkadinaeza mwami waBbabbiloni wakali wachita Zedekkiya mwami aatala anyika yaJuda. ² Pesi Zedekkiya, balanda bakwe, abantu benyika tebakaswiilila pe jwi lyaJehova ndyakaambilizya akuboko kwaJelemiya musinsimi. ³ Aboobo mwami Zedekkiya, Jehukkalu mwana mulombe waSyelemiya, aZefaniya mwana mulombe waMaseyiya mupayizi wakatuma mulumbe kuliJelemiya musinsimi. Bakati, ''Tukombele kuli Jehova Leza wesu.'' ⁴ Lino Jelemiya wakalikuza akweenda mukati kabantu, nkaambo takalinabikwa muntolongo pe. ⁵ Lumamba lwaFalo lwakazwa muIjipiti, alimwi baKkaludiyeni bakali kusinkilizya Jelusalemu bakamvwa makani aatala ambabo alimwi bakazwa muJelusalemu. ⁶ Mpawo jwi lyaJehova lyakasika kuliJelemiya musinsimi, kaliti, ⁷ ''Jehova, Leza waIzilayeli, waamba eechi: Mbobu mbotakaambe kumwami waJuda, nkaambo wakakutuma kuti uzoyanduule kulayililwa kulindime, 'Bona, lumamba lwaFalo, lwakaza kuzokugwasya, lwaamba kubweeda kuIjipiti, inyika yalo. ⁸ BKkaludiyeni balabweeda. Bayoolwana muunzi ooyu, kubweza akutenta.' ⁹ Jehova waamba eechi: Mutalyeeni akwaamba kuti, 'Nchobeni baKkaludiyeni balatuleka,' nkaambo tabakoyoyenda pe. ¹⁰ Nikuba kuti mwalimwazunda loonse lumamba lwabaKkaludiyeni bali kumulwana kuchitila kuti muzibbakasa kusyaale biyo baalumi balichiside, balakonzya kubuka akutenta muunzi ooyu.'' ¹¹ Aboobo mpimpawo aawo lumamba lwamaKkaludiyeni mpulwakali lwazwa muJelusalemu mbli lumamba lwaFalo nilwakali buza, ¹² mpawo Jelemiya wakazwa munyika yaJelusalemu kaya kunyika yaBbenjamini. Wakali kuyanda kubweza kampolongondo kanyika nkukooko mukati kabantu bakwe. ¹³ Aawo nakasika amuMulyango waBbenjamini, mulindizi mupati wakaliwo. Zina lyakwe wakali Elayija mwana mulombe waHananiya. Wakambungatila Jelemiya musinsimi akwaamba kuti, ''Ulukuzwa kubaKkaludiyeni.'' ¹⁴ Pesi Jelemiya wakati, ''Tensi kasimpe pe. Nsilikuzwa pe kubaKkaludiyeni.'' Pesi Ilija takaswiilila pe. Wakabweza Jelemiya alimwi wamweeta kuli basilutwe. ¹⁵ Basilutwe bakanyemena Jelemiya. Bakamuuma akumubika muntolongo, yakali ng'anda yaJonatani mulembi, nkaambo bakali biichita ntolongo. ¹⁶ Aboobo Jelemiya wakali wabikwa muntolongo yaansi, oomo mwakakkala kwamazuba miingi. ¹⁷ Mpawo mwami Zedekkiya wakatuma umwi muntu wakakumweeta kung'anda yamwami. Mung'anda yakwe mwami, wakamubuzya chakusisikizya, ''Kuli jwi na lyazwa kuliJehova?'' Jelemiya wakasandula, ''Kuli jwi: Uyoopedekezegwa mujaanza lyamwami waBbabbiloni.'' ¹⁸ Mpawo Jelemiya wakati kuMwami Zedekkiya, ''Ndakakubisizya buti, balanda bako, na bantu aaba kuti mundibike muntolongo? ¹⁹ Balikuli basinsimi bako, aabo bakakusinsimila akwaamba kuti mwami waBbabbiloni takoyokulwana na kulwana nyika eeyi? ²⁰ Pesi swiilila lino, simalelo wangu mwami! Amuleke nkombelezyo zyangu zize kunebo lyangu. Utakandibweedezyi kung'anda yaJonatani sizibi, na kuti ndiyofwida nkuko.'' ²¹ Abbobo Mwami Zedekkiya wakalayilila. Balanda bakwe bakazumina mulubuwa lyabbetekelo lwamulindizi. Wakali kupegwa chibunge chomwe buzuba abuzuba kuzwa kumugwagwa wabasikujika, kusikila chibunge choonse mumuunzi chamana. Aboobo Jelemiya wakakkala mulubuwa lwebbetekelo lwabasikulinda.