¹ Lino zyakachitika mumunyaka wane waJehoyakkimu mwana mulombe waJosaya mwami waJuda, kuti eeli jwi lyakasika kuli Jelemiya kuzwa kuli Jehova, alimwi wakati, ² ''Libwezele bbuku alimwi ulembe majwi woonse ngindakakwaambila aatala aIzilayeli aJuda, anyika imwi ayimwi. Kochita eezi kulizyoonse nzindakakwaambila kuzwa kumazuba aaJosiya kusika mubuzuba oobuno. ³ Amwi bantu baJuda balikuyoswiilila kulunyonyooko loonse ndwebambide kweeta aalimbabo. Amwi umwi awumwi walikuyosanduka kuzwa kunzila yakwe mbi, kuti nkabalekelele milandu yabo azibi zyabo.'' ⁴ Mpawo Jelemiya wakayita Bbalukki mwana mulombe waNeliya, alimwi Bbalukki wakalemba mubbuku, mbuli kukwaamba kwaJelemiya, woonse majwi aaJehova aakambuulwa kulinguwe. ⁵ Chakatobela Jelemiya wakapa malayililo kuliBbalukki. Wakati, ''Ndilimuntolongo alimwi tandikonzyi kwiinka kung'anda yaJehova. ⁶ Aboobo weelede kwiinka akuyobala kuzwa kubbuku eelyo ndiwakalemba kuzwa kukwambuula kwangu. Mubuzuba bwakulyiimya kulya, weelede kubala majwi aJehova mukuswiilila kwabantu mung'anda yakwe, alimwi mukuswiilila kwaJuda woonse wakazwa kumyuunzi yabo. Kawaambe majwi aaya kulimbabo. ⁷ Amwi nkombelezyo zyabo zyaluse zilasika kunembo lyaJehova. Amwi wumwi awumwi muntu walikuyooleka nzila yakwe yabubi, mukuti bukali akunyema kwaJehova oobo mbwawamba aatala abantu aaba mbukali.'' ⁸ Aboobo Bbalukki mwana mulombe waNeliya wakachita eezyo zyoonse Jelemiya musinsimi nzyaakamulayilila kuti achite. Wakabala chakoompolola majwi aJehova mung'anda yaJehova. ⁹ Zyakachitika mumunyaka wasanu amwezi mamusanu ayine yaJehoyakkimu mwana mulombe waJosaya, mwami waJuda, kuti boonse bantu bamuJelusalemu abantu boonse bakaza muJelusalemu kuzwa kumyuunzi yaJuda bakaambilizya kulyiimya kulya kunembo lyaJehova. ¹⁰ Bbalukki wakabala cvhakoompolola majwi aJehova mung'anda yaJehova, kuzwa kung'anda yaGemaliya mwana mulombe waSyapani mulembi, kulubuwa lwabbetekelo lulikujulu, kumulyango wakunjila mung'anda yaJehova. Wakazichita eezi mukuswiilila kwabantu boonse. ¹¹ Lino Mikkayiya mwana mulombe waSyapani wakamvwa majwi woonse aJehova mubbuku. ¹² Wakiinka kung'anda yamwami, kung'anda yamulembi. Langa, boonse basilutwe bakalikkede nkuko: Elisyama mulembi, Delayiya mwana mulombe waSyemayiya, Elimnata mwana mulombe waAkibba, Gemaliya mwana mulombe waSyapani, aZedekkiya mwana mulombe waHananiya, abasilutwe boonse. ¹³ Mpawo Mikkayiya wakazyaamba kulimbabo majwi woonse ngakali wamvwa Bbalukki kalikwabala chakoompolola mukuswiilila kwabantu. ¹⁴ Aboobo basilutwe boonse bakatuma Jehudi mwana mulombe waNetaniya mwana mulombe waSyelemiya mwana mulombe waKkusyi, kuli Bbalukki. Jehudi wakati kuliBbalukki, ''Bweza bbuku mujaanza lyako, ibbuku ooko nkuwazwaakubala mukuswiilila kwabantu, alimwi koza.'' Aboobo Bbalukki mwana mulombe waNeliya wakabweza bbuku mujaanza lyakwe akuya kuli basilutwe. ¹⁵ Mpawo bakati kulinguwe, ''Kkala aansi ubale eechi mukuswiilila kwesu.'' Aboobo Bbalukki wakabala bbuku. ¹⁶ Zyakachitika kuti eelyo nibakamvwa majwi aaya, umwi awumwi muntu wakalanga wakali aafwiifwi anguwe mukuyowa alimwi bakati kuliBbalukki, ''Nchobeni tweelede kuyowamba majwi aaya woonse kumwami.'' ¹⁷ Mpawo bakabuzya Bbalukki, ''Twaambile, wakalemba biyeni majwi aaya kuzwa kukwaambuula kwaJelemiya?'' ¹⁸ Bbalukki wakati kulimbabo, ''Wakaambuula majwi aaya woonse kulindime, alimwi ndakalemba amulende mubbuku eeli.'' ¹⁹ Mpawo basilutwe bakat kuliBbalukki, ''Koya, kalisise lwako, alimwo aJelemiya, alakwe. Kakutakabi utakazibe ooko nkumutanobede.'' ²⁰ Aboobo bakabikabbuku mung'anda yaElisyama mulembi, alimwi bakayinka kumwami mulubuwa lwabbetekelo akwaamba zyoonse mwami kamvwide. ²¹ mpaqwo mwami wakatuma Jehudi kuti akeete bbuku. Jehudi wakalibweza kuzwa kung'anda yaElisyama mulembi. Mpawo wakalibala mwami abasilutwe bakwe boonse bakayimvwi afwiifwi anguqwe kabamwide. ²² Lino mwami wakalikkedde mung'anda yempeyo mumwezi wamusanu ayine, alimwi munchina wakutentelezya wakali kuyaka kunembo lyakwe. ²³ Zyakachitika kuti aawo Jehudi nkali wabala mindando iitatu na ine, mwami uyolidunsula akafulo akuliwaalila mumulilo mulichakutenteezya kusikila bbuku lyoonse lyamana. ²⁴ Pesi na mwami nikuba umwi wabalanda bakwe bakamvwa majwi aaya woonse bakayoowa kapati, nikuba kudabula zisamo zyabo. ²⁵ Elinata, Delayiya, aGemaliya bakali baambila mwami chakumusisimpizya kuti atatenti pe bbuku, pesi takwe nakabaswiilizya pe. ²⁶ Mpawo mwami wakalayilila Jelahimelu waluzubo lwakwe, Selayiya mwana mulombe waAziliyeli, aSyelemiya mwana mulombe waAbbudiyeli kuti baange Bbalukki mulembi aJelemiya musinsimi, pesi Jehova wakali wabasisa. ²⁷ Mpawo jwi lyaJehova lyakasika kuli Jelemiya kali mwami watenta bbuku amajwi Bbalukki ngakali walemba kukwaambuula kwaJelemiya, kati ²⁸ ''Bweeda, bweza limbi bbuku lyako, alimwi ukalembe mulindilyo woonse majwi akali mubbuku lyakutanguna, eelyo Jehoyakkimu mwami waJuda ndyakatenta. ²⁹ Mpawo weelede kwaamba eechi kuli Jehoyakkimu mwami waJuda: 'Wakatenta bbuku eeliya kowamba kuti, ''Nkaambonzi niwakalemba mulindilyo, 'Mwami waBbabbiloni nchobeni uyosika akuyonyonyoona nyika eeyi, nkaambo uyonyonyoona boonse bantu abanyama kuzwa kulinjiyo'?''''' ³⁰ Nkinkaako Jehova wakaamba eechi aatala anduwe, Jehoyakkimu mwami waJuda: ''Takwe walunyungu lwako uyookkala aachuuno chabwaami chaDeviti. Mbuli nduwe, mutunta wako uyosowelwa aantundubwi mukupya kwazuba amumpeyo yamansiku. ³¹ Nkaambo ndiyokusubula webo, lunyungu lwako, abalanda bako akaambo kamulandu wanu moonse. Ndiyoleta aalindinywe, aali boonse bakkala muJelusalemu, alimwi aamuntu woonse muJuda zyoonse ntenda nzindakamukonga anzizyo, pesi nzimwakatachenjekezezya kutwi pe kulinzizyo.'' ³² Aboobo Jelemiya wakabweza limbi bbuku alimwi wakapa Bbalukki mwana mulombe waNeliya mulembi. Bbalukki wakalemba kuzwa kumulomo waJelemiya woonse majwi akali mubbuku lyakatentwa aJehoyakkimu mwami waJuda. Lubo, majwi miingi aafanana akayungizigwa mubbuku eeli.