¹ Ijwi lyakasika kuliJelemiya kuzwa kuliJehova mumazuba aaJehoyakkimu mwana mulombe waJosaya mwami waJuda, kaliti, ² ''Koya kumpuli yabaLekkabbu akwambuula ambabo. Mpawo ukabeete kung'anda yangu, muli imwi yamaanda ooko, alimwi ukabape wayini kuti bakanywe.'' ³ Aboobo ndakabweza Jazaniya mwana mulombe waJelemiya mwana mulombe waHabbaziniya abakulana bakwe, boonse bana bakwe balombe, alimwi ampuli yoonse ya baLekkabayi. ⁴ Ndakababtola kung'anda yaJehova, mumaanda aabana balombe baHanani mwana mulombe waIgidaliya, muntu waLeza. Maanda aaya akali kumbali lyang'anda yaazululi, yakali aatala lyang'anda yaMaseyiya mwana mulombe waSyalumi, sikulinda kumulyango. ⁵ Mpawo ndakabika ndido ankomeki zyazwide wayini kunembo lyabaLekkabbayi alimwi ndakati kulimbabo, ''Munywe wayini.'' ⁶ Pesi bakati, ''tatukoyoonywa pe kufumbwa wayini, nkaambo sikale wesu, Jonadabbu mwana mulombe waLekkabbu, wakatulayilila, 'Mutakanywi wayini, nywebo nikuba lunyungu lwanu, lyoonse. ⁷ Alubo, mutakayaki pe kufumbwa ng'anda, kubyala kufumbwa mbuto, na kubyala myuunda yamasaansa; eezi tensi zyenu pe. Nkaambo muleelede kukkala mumatente mazuba anu woonse, kuchitila kuti mukapone mazuba miingi munyika ooko nkumupona mbuli bazwakule.' ⁸ Twakalemeka jwi lyaJonadabbu mwana mulombe waLekkabbu, sikale wesu, mulizyoonse nzyakatulayilila, kuti tutanywi wayini mumazuba esu woonse, swebo, banakazi besu, bana besu balombe, abana besu basimbi. ⁹ tatukoyooyaka maanda aakukkala, alimwi tatukoyooba amyuunda yamasaansa, muunda, nikuba mbuto njitutanoli aayo. ¹⁰ Twakakkala mumatente alimwi twakalemeka akuchita zyoonse eezyo Jonadabbu sikale wesu nzyakatulayilila. ¹¹ Pesi aawo Nebbukkadineza mwami waBbabbiloni nakalwana nyika, twkati, 'Sika, tweelede kuya kuJelusalemu tukayube kuzwa kuli basilumamba babaKkaludiyeni abaAlameni.' Aboobo tulimukukkala muJelusalemu.'' ¹² Mpawo jwi lyaJehova lyakasika kuliJelemiya, kaliti, ¹³ ''Jehova wamakamu, Lea waIzilayeli, waamba eechi, 'Koya ukaambe kubantu baJuda ababo bakkala muJelusalemu, ''Sena tamukoyotambula kululamikwa akuswiilila kumajwi angu? - ooku nkwaamba kwaJehova. ¹⁴ Majwi aJonadabbu mwana mulombe waLekkabbu aayo ngakapa kubana bakwe balombe mbuli mulayizyo, kuti batanywi pe kufumbwa wayini, wakabambwa kusikila mubuzuba oobu. Bakalemeka mulayizyo wasikale wabo. Pesi mbuli ndime, mebo lwangu ndakali kusungwaala kumwaambila, pesi tamundiswiilili pe. ¹⁵ Ndakamutumina balanda bangu boonse, basinsimi. Ndakasumgwaala mukubatuma kuti baambe, 'Amuleke umwi awumwi muntu asanduke kuwa kunzila yakwe yabubi akuchita milimu mibotu; kutakabi umwi uutakeende mukutobela baleza bambi akuyobakomba. Pesi, muboole kunyika njindakamupa abasikale banu.' Nikubaboobo temwakandiswiilila na kuchenjeka kulindime. ¹⁶ Nkaambo lunyungu lwaJonadabbu mwana mulombe waLekkabbu lwabamba malayilile aabasikale babo aayo ngakabapa, pesi bantu aaba bakaka kuswiilila kulindime.''' ¹⁷ Aboobo Jehova, Leza wamakamu alimwi Leza waIzilayeli, waamba eechi, 'Langa, aajulu lyaJuda azyoonse zipona muJelusalemu, ndiyoyeta lunyonyooko loonse ndundakaamba aatala ambabo nkaambo ndakambuula kulimbabo, pesi tebakandiswiilila pe; ndakabayita pesi tebakandiswiilila pe.''' ¹⁸ Jelemiya wakti kumpuli yabaLekkabbayi, ''Jehova wamakamu, Leza waIzilayeli, waamba eechi: Mwakaswiilila kumilayizyo yaJonadabbu sikale wanu aimwi mwakibamba yoonse - mwakatobelezya zyoonse nzyakamulayilila - ¹⁹ aboobo Jehova wamakamu, Leza waIzilayeli, waamba eechi, 'Kunoli umwi muntu lyoonse uyoozwa kulunyungu lwaJonadabbu mwana mulombe waLekkabbu uutakandibelekele.'