¹ Ijwi lyakasika kuliJelemiya kuzwa kuliJehova, eelyo Nebbukkadineza mwami waBbabbiloni ampi yakwe yoonse, aantomwe amaami aanyika, bweendelezi boonse bwakali munsi lyamanguzu aakwe, abantu babo boonse bakabusya nkondo aatala aJelusalemu amyuunzi yakwe yoonse, kabati: ² ''Jehova, Leza waIzilayeli waamba eechi: Koya ukaambe kuliZedekkiya mwami waJuda akwaamba kuti kulinguwe, 'Jehova waamba eechi; Langa, ndaamba kupedekezya muunzi ooyu mujaanza lyamwami waBbabbiloni. Uyowutenta. ³ Tamukoyoochija pe kuzwa kujaanza lyakwe, nchobeni muyojatwa akuyoopedekezegwa mujaanza lyakwe. Menso anu ayolanga menso amwami waBbabbiloni; uyowambuua kalangene andinywe mwazoyinka kuBbabbiloni.' ⁴ Swiilila kujwi lyaJehova, Zedekkiya mwami waJuda! Jehova waamba eechi aatala anduwe, 'Tokoyojayigwa epanga pe. ⁵ Uyofwa muluumuno. Mbuli mudilwe lyakupya kwabasikale bako, baami bakaliwo chiindi, bayotenta mubili wako. Bayooti, ''Maawe, simalelo!'' Bayokulila. Lino ndambuula - ooku nkwaamba kwaJehova.''' ⁶ Aboobo jelemiya musinsimi wakaamba kuliZedekkiya mwami waJuda woonse majwi aaya muJelusalemu. ⁷ Impi yamwami waBbabbiloni yakabusya nkondo nkondo aatala aJelusalemu abaabo boonse bakasyeede bamyuunzi yaJuda: Lachisi aAzekka. Eeyi myuunzi kiili myuunzi iikwabililidwe. ⁸ Ijwi lyakasika kuliJelemiya kuzwa kuliJehova musule lyaMwami Zedekkiya kali wapanga chizuminano abantu boonse ba muJelusalemu, kukwaamba lwaangunuko kulimbabo, ⁹ kuti umwi awumwiaangununo bazike bakwe baHebbulu, boonse baalumi abanakazi, aboobo umwi wakeelede kuchita muzike muJuda, ooyo wakali mukulana wakwe. ¹⁰ Aboobo boonse bazululi abantu boonse bakanjila muchizuminano chakuti umwi awumwi muntu weelede kwaangununa bazike bakwe baalumi abanakazi kutibatakabi bazike limbi. Bakaswiilila alimwi bakabaangununa. ¹¹ Pesi musule lyazeezi bakasandula miyeeyo yabo. Bakababoozya aabo bazike mbibakali baangununa. Bakabaangila kuti babe bazike lubo. ¹² Aboobo ijwi lyaJehova lyakasika kuliJelemiya, kaliti, ¹³ ''Jehova, Leza waIzilayeli waamba eechi, ''Mebo lwangu ndakapanga chizuminano abasikale banu mubuzuba mbundakabagwisya kuzwa munyika yaIjipiti, kubagwisya kuzwa mung'anda yabuzike. Mpimpawo mpundakaamba kuti, ¹⁴ ''Kumamanino aaminyaka yoonse iili musanu ayibili, awumwi muntu weelede kwaangununa mukulana wakwe, muHebbulunyina ooyo wakalisambala kulindinywe akubeleka minyaka iili musanu awumwi. Mukamutande mulwaangunuko.'' Pesi basikale banu tebakandiswiilila pe na kuchenjekezya matwi aabo kulindime. ¹⁵ Lino nywebo lwanu nobeni mwakasanduka akutalika kuchita ziluleme mumenso aangu. Mwakaambilizya lwaangunuko, umwi kulisimabambanwa wakwe, alimwi mwakapanga chizuminano kunembo lyangu mung'anda eeyo yiitwa azina lyangu. ¹⁶ Pesi mwakafutata akusofwaazya zina lyangu; mwakachita kuti awumwi muntu aboozye bazike bakwe baalumi abanakazi, aabo mbimwakalimwaangununa kuti biinke nkubayanda. Mwakabaangila kuti babe bazike banu lubo.' ¹⁷ Nkinkaako Jehova waanba eechi, 'Nywebolwanu temwakandiswiilila pe. Mwakeelede kwaambilizya lwaangunuko, moonse, kubakulana benu akubaIzilayeli nyokwe. Aboobo langa! Ndaamba kwaambilizya lwaangunuko kulindinywe - ooku nkwaamba kwaJehova - lwaangunuko lwapanga, dwazi, anzala mpati, nkaambo ndiyomuchita chintu chiyoosya mumenso aamaami woonse aali munyika. ¹⁸ Mpawo ndiyobelekana aabantu bakatyola chizuminano changu, aabo bakatabamba majwi aachizuminano nchibakatalika kunembo lyangu nibakaanzania mupule weng'ombe muzimpanzi zyobile akwiinda aakati kazipmpanzi zyawo, ¹⁹ mpawo bazululi baJuda aJelusalemu, bapalulwe abapayizi, abantu boonse banyika bakeenda aakati kazimpanzi zyamupule weng'ombe. ²⁰ Ndiyobapedekezya mujaanza lyabasinkondonyina amujaanza lyabaabo bali kuyanduula mawumi aabo. Mibili yabo iyooba chilyo chabayuni bakujulu abanyama bamusokwe bali aanyika. ²¹ Aboobo ndiyoopedekezya Zedekkiya mwami waJuda abazululi bakwe mujaanza lyabasinkonyina amujaanza lyabaabo bayanduula buumi bwabo, amujaanza lyabasilumamba bamwami waBbabbiloni ooyo wabuka kukumulwaisya. ²² Bona, ndaamba kupa malayilile - ooku nkwaamba kwaJehova - akuyobaboozya kumuunzi ooyu kuzobusya nkondo aatala anguwo akubweza, akutenta. Nkaambo ndiyosandula myuunzi yaJuda kuba matongo oomo mutakabule basikuyookkala.'''