¹ Mpawo jwi lyaJehova lyakasika kuliJelemiya lwabili, aawo nakachijalilidwe mulubuwa lwamulindizi, kaliti, ² ''Jehova mubumbi, waamba eechi - Jehova, uubumba kuti ayimike - Jehova ndizina lyakwe, ³ 'Kondiita, alimwi ndiyokusandula. Ndiyochita zintu zipati kulinduwe, zipati nzyotamvwisisisyi pe.' ⁴ Nkaambo Jehova, Leza waIzilayeli waamba eechi aatala amaanda ali mumuunzi ooyu amaanda abaami baJuda aakawida aansi akaambo kamatantilo akwabililidwe apanga, ⁵ 'BaKkaludiyeni bayobuza kuzolwana akuzozuzya mitunta yabantu oobo mbesikajaye mubukali bwangu amukubijilwa kwangu, eelyo nindayokusisa busyu bwangu kuzwa kumuunzi ooyu akaambo kazibi zyabo zyoonse. ⁶ Pesi bona, ndaamba kweeta kusilika akuponesegwa, nkaambo ndiyobaponesya akubetela kuvula, luumuno, akusyomeka. ⁷ Nkaambo ndiyoboozya buvubi bwaJuda aIzilayeli; ndiyobayaka mbuli kumatangunino. ⁸ Mpawo ndiyobasalazya muzwa kuli yoonse milandu njibakachita aatala andime. Ndiyobalekelela yoonse milandu yabo njibakachita aatala andime, alimwi anzila zyabo zyoonse zibakandipapila anzizyo. ⁹ Nkaambo muunzi ooyu uyooba chintu chalukonda, lwiimbo lwakulemeka akulemeka kumanyika woonse aansi atakamvwe zyoonse zintu zibotu nzyeyanda kuyowuchitila. Mpawo bayoyowa akuteketa akaambo kazintu zyoonse zibotu aluumuno ndwenjoowupa.' ¹⁰ Jehova waamba eechi chintu, 'Mubusena oobu mbolikwaamba kuti, ''Nditongo, busena butakwe muntu nikuba munyama,'' mumyuunzi yaJuda, amumigwagwa yaJelusalemu yakaba matongo, iitakwe muntu nikuba munyama, kuyoomvwigwa lubo ¹¹ musabilo walukondo akubotelwa, musabilo wamukwaansa amusabilo wanabwiinga, musabilo wababo baambakuti, eelyo nibayoyeta zipo zyakulumba kuli Jehova, ''Mupe kulumba kuliJehova wamakamu, nkaambo Jehova mubotu, alimwi luyando lwakwe lutamani ndwalyoonse!'' Nkaambo ndiyoboozya buvubi bwanyika mbuli mbubwakabede chiindi,' mbwaamba Jehova. ¹² Jehova wamakamu waamba eechi: 'Mutongo lyabusena oobu, ooko kutakwe muntu nikuba munyama - mumyuunzi yawo yoonse kuyooba bachezezyo lubo ooko beembeli nkubakonzya kuyochezezya mbono zyabo. ¹³ Mumyuunzi iili mutulundu, misena, aNegevu, munyika yaBbenjamini akoonse kuzyunguluka Jelusalemu, amumyuunzi yaJuda, mbono ziyoyinda lubo mumaanza aababo bazibala,' mbwaamba Jehova. ¹⁴ 'Langa! Mazuba ayobuza - ooku nkwaamba kwaJehova - eelyo nindiyochita eezyo nzindakasyomezya ng'anda yaIzilayeli akung'anda yaJuda. ¹⁵ Mumazuba aayo amuchiindi eecho ndiyochita chibunga chisalala kuti chikakomene kuliDeviti, alimwi uyochita bululami abusalali munyika. ¹⁶ Mumazuba aayo Juda uyofutulwa, alimwi Jelusalemu uyopona mulukwabililo, nkaambo eezi nzizyo nzyayowambwa, ''Jehova mbusalali bwesu.''' ¹⁷ Nkaambo Jehova waamba eechi: 'Muntu uuzwa mulusinga lwaDeviti takoyobulika pe kuti akkale echuuno chabwaami bwang'anda yaIzilayeli, ¹⁸ nikuba muntu kuzwa kubapayizi baLevi takoyobulika pe kunembo lyangu kuti akanyampule tununkilizyo twakutenta, kuti atente zipo zyakulya, alimwi kuti akachite zipo zyazilyo choonse chiindi.''' ¹⁹ Jwi lyaJehova lyakaza kuliJelemiya, kaliti, ²⁰ ''Jehova waamba eechi: 'Na mwakonzya kutyola chizuminano changu sikati amansiku kuchitila kuti kutabi limbi sikati amansiku kuzyiindi zyeelede, ²¹ mpawo muyokonzya kutyola chizuminano changu aDeviti mulanda wangu, kuchitila kuti takuchiyoobi limbi lunyungu lutakakkale aachuuno chakwe chabwaami, achizuminano changu abapayizi baLevi, balanda bangu. ²² Mbuli makamu makamu aakujulu mbaatabaliki, ambuli muse wakunkomwe yalwizi mbutakonzyi kweelwa, aboobo ndiyoyuvuzya lunyungu laDevit mulanda wangu alimwi abaLevi aabo bandibelekela.''' ²³ Jwi lyaJelemiya lyakasika kuliJelemiya, kaliti, ²⁴ ''tensi wakalangisisya na eezyo nzibakaamba bantu aaba aawo nibakati, 'Mpuli zibili eezyo Jehova nzyaakasala, lino wazikaka'? Munzila eeyi balangila bantu bangu aansi, kabati tabachili nyika pe kumenso aabo. ²⁵ Ime, Jehova, ndamba eechi, 'Na tendayimika chizuminano chasikati amansiku, akuti na tendalulamika milawu yakujulu aansi, ²⁶ mpawo ndiyokaka lunyungu lwaJekkobbu aDeviti mulanda wangu, akuteeta muntu kuzwa kulimbabo kuti ayendelezye lunyungu lwaAbbulahamu, Ayizekki, aJakkobbu. Nkaambo ndiyoboozya buvubi bwabo akutondeezya luzyalo kulimbabo.'''