¹ Eeli ndejwi lyakasika kuliJelemiya kuzwa kuliJehova mumunyaka wakkumi waZedekkiya mwami waJuda, mumunyaka wakkumi amusanu ayitatu waNebbukkadineza. ² Kuli eecho chiindi, mpi yamwami waBbabbiloni yakali zyungulukilide Jelusalemu, alimwi Jelemiya musinsimi wakalaangidwe mulubuwa lwamulindizi kung'anda yamwami waJuda. ³ Zedekkiya mwami waJuda wakali wamubika muntolongo akakwaamba kuti, 'Nkaambonzi nosinnsima akwaamba kuti, 'Jehova waanab eechi: Langa, ndaamba kutaliza kupa chisi eechi mujaanza lyamwami waBbabbiloni, alimwi uyoyitola. ⁴ Zedekkiya mwami waJuda takoyoochija pe kuzwa kujaanza lya baKkasidi, nkaambo nchobeni uyoopegwa mumaanja aamwami waBbabbiloni. Mulomo wakwe uyowambuula kumulomo wamwami, alimwi menso aakwe ayoobona menso amwmai. ⁵ Uyootola Zedekkiya kuBbabbiloni, alimwi uyosyaala nkuko kusikila nkamaninsyanie aawe -ooku nkwaamba kwaJehova. Nikuba mwalwisyania abaKkaludi, tamukoyoozwidilila pe.''' ⁶ Jelemiya wakati, ''Ijwi lyaJehova lyakandisikila kalyaamba kuti, ⁷ 'Langa, Hanamelu mwana mulombe waSyalumi wusolenzi uyobuza kuinduwe alimwi uyoti, ''Ula muunda wangu ooyo uli muAnatoti ube wako, nkaambo cheelelo chakuula chili kulinduwe.''''' ⁸ Mpawo, mbuli kwaamba kwaJehova, Hanamelu, mwana mulombe wataatalenzi wangu, wakaza kulindime mulubuwa lwamulindizi, alimwi wakati kulindime, ''Ula muunda uuli muAnatoti munyika yaBbenjamini, nkaambo cheelelo chalukono nchichako, alimwi cheelelo chakuula chili kulinduwe. Lyuulile.'' Mpawo ndakaziba kuti eeli ndijwi lyaJehova. ⁹ Aboobo ndakawula muunda muAnatoti kuzwa kuliHanamelu, mwana mulombe wataatalenzi wangu, alimwi ndakamweelela mweelo kulinguwe wansiliva, masyekeli kkumi amusanu aabili mubulemu bwawo. ¹⁰ Mpawo ndakalemba mubbuku alimwi ndalijala, alimwi lyakali aabakamboni balyo bakapa bukamboni. Mpawo ndakeela nsiliva aazipimyo. ¹¹ Chitobela ndakabweza eezyo zyakali zyawulwa zyakajalidwe, nkenjobutobelezya malayilile amilawo, alubo kulizitajalidwe. ¹² Ndakapeda bbuku lyakajalidwe kuliBbalukki mwana mulombe waNeliya mwana mulombe waMaseyi kunembo lyaHanamelu, mwana wataatalenzi wangu, alimwi abakamboni bakalemba mubbuku lijalidwe, akunembo lyabaJudi boonse bakakkede mubbetekelo lyalubuwa lwamulindizi. ¹³ Aboobo ndakaapa malayilile kuliBbalukki kunembo lyabo. Ndakati, ¹⁴ ''Jehova wamakamu, Leza waIzilayeli, waamba eechi: Bweza malembe aaya, aantomwe alugwalo lwakuula lujalidwe aamwi magwalo aatajalidwe atondeezya kuuzizyania alimwi waabike muchimywido chabulongo kuchitila kuti akakkale kwachiindi chilamfu. ¹⁵ Nkaambo ''Jehova wamakamu, Leza waIzilayeli, waamba eechi: Maanda, myuunda, amyuunda yamasaansa ziyowulwa lubo munyika eeyi.'' ¹⁶ Nindakapa Bbalukki mwana mulombe waNeliya lugwalo lwakuula, ndakakomba kuliJehova akuti, ¹⁷ ''Maawe, Mwami Jehova! Langa! Webo olike wakalenga majulu anyika kwiinda munguzu zyako mpati akuboko kwako kusumpwidwe. Takwe nchowamba chikukachila pe kuchichita. ¹⁸ Ulatondeezya luyando lwako lutasanduki pe kuli bali zyuulu alimwi akutula bantu bali aamilandu muzibelo zyabana babo. Nduwe Leza mupati uli eenguzu; Jehova wamakamu ndizina lyako. ¹⁹ Ulimupati mubusongo alimwi ulimupati kampatila munchito, nkaambo menso aako alijulikide kunzila zyoonse zyabantu, kukupa muntu woonse kwiindila mumiyeeyo anchito zyakwe. ²⁰ Wakachita zitondeezyo azigambyo munyika yaIjipiti. Kusika mubuzuba oobu oomu muIzilayeli alimwi aakati kamisyobo yoonse, wakachitya kuti izina lyako lizibikane. ²¹ Nkaambo wakagwisya bantu bako Izilayeli kuzwa munyika yaIjipiti azitondeezyo alimwi azigambyo, aluboko lileenguzu, jaanza lisumpwidwe, alimwi akuyoosya kupati. ²² Mpawo wakabapa nyika eeyi - eeyo njiwakakonkezya kuli basikale babo kuti uyoyipa kulimbabo - nyika ikunka malili abuchi. ²³ Aboobo bakanjila akwiivuba. Pesi tebakaswiilizya pe ijwi lyako na kupona mukuswiilizya mulawu wako. Takwe pe nzibakachita kuli zeezyo nziwakabalayilila kuti baachite, aboobo wakeeta ntenda zyoonse eezi aalimbabo. ²⁴ Langa! Lubaya luzyungulukide lwasikila aajulu lyanyika kuti bayijate. Nkaambo akaambo kapanga, nzala mpati, adwazi,muunzi waabwa mumaanza abaKkaludiyeni aabo balikuulwana. Nkambo eezyo nziwakaamba kuti zizochitika zilokuchitika, alimwi, bona, ulikweebela. ²⁵ Mpawo webo lwako wakati kulindime, ''Lyuulile muunda ansiliva alimwi ube aabakamboni anguwo, nikuba oyu muunzi upedwe mumaanza aabaKkaludiyeni.'' ²⁶ Ijwi lyaJehova lyakasika kuliJelemiya, kaliti, ²⁷ ''Langa! Ndime Jehova, Leza wamisyobo yoonse. Mpuchili na chintu chiyumu nchiinga ndakachilwa kuchita? ²⁸ Nknkaako Jehovawaambaeechi, 'Bona, ndamba kupa muunzi ooyu mujaanza lyabaKkaludiyeni aNebbukkadineza, Mwami waBbabbiloni. Uyochijata. ²⁹ BaKkaludiyeni balikulwana muunzi ooyu bayooza akuwutenta muunzi ooyu, aantomwe amaanda aawo bantu ngibakali kukombela Bbaalu akutila zipo zyakunywakuli bamwi baleza kuchitila kuti bandinyemywe. ³⁰ Nkaambo bantu baIzilayeli aJuda nchobeni mbantu bakali kuchita bubi kunembo lyamenso aangu kuzwida kubwanike bwabo. Bantu baIzilayeli nchobeni bakandibisizya anzibakachita amaanza aabo - ooku nkwaamba kwaJehova. ³¹ Jehova waamba kuti muunzi ooyu wakaba chinyemyo chabukali bwangu akunyema kuli aabukali kuzwida buzuba oobo nibakachiyaka. Chakali mbubo kusikila buzuba bwasunu. Aboobo ndiyochigwisya kuzwa kunembo lyabusyu bwangu ³² akaambo kabubi bwabantu baIziayeli aJuda, zintu nzibakachita kuti bandinyemye - lwabo, baami babo, bana balombe babaami, bapayizi, basinsimi, amuntu woonse muJuda abakkede muJelusalemu. ³³ Bakanditondeezya masule aabo peepe masyu aabo, nikuba ndakali ndabayisya changuzu. Ndakeezya kubayisya, pesi takwe naba womwe wakaswiilizya kuti atambula kululamikwa. ³⁴ Babika zileza zyabo zisesemya aajulu mung'anda eeyo yiitwa muzina lyangu, kukwiisofwaazya. ³⁵ Bakayakila Bbaala masena malamfu muMumpata wa Bbeni Hinomu kuchitila kuti babike bana babo balombe abasimbi mumulilo kuchitila Molekki. Takwe nindakabalayilila pe. Takwe nichakaba mumizeezo yangu pe kuti bayelede kuchita chintu chisesemya oobu alimwi akuchita Juda kuti abisye.' ³⁶ Aboobo lino nkinkaako, ime, Jehova, Leza waIzilayeli, waamba eechi aataa amuunzi ooyu, muunzi ngolikwaamba kuti, 'Ulipedwe mujaanza lyamwami waBbabbiloni kwiinda mupanga, nzala mpati, adwazi.' ³⁷ Bona, ndaamba kubabungania kuzwa kunyika zyoonse nkundakabatandilide mubukali bwangu, kubijilwa amukunyema kupati. Ndaamba kubaboozya kubusena oobu akubakonzezya kuti bakkale mulukkwabililo. ³⁸ Mpawo bayooba bantu bangu, alimwi ndiyoba Leza wabo. ³⁹ Ndiyobapa moyo uumwi anzila iimwi yakundilemeka mazuba woonse kuchitila kuti zikababotele alunyungu lwabo musule lyabo. ⁴⁰ Mapwo ndiyopangana chizuminano chitamani ambabo, chakuti nsikoyooleka kuchita bubotu kulimbabo. Ndiyobika lulemyo mumyoyo yabo kuchitila kuti batakazwi kulindime. ⁴¹ Mpawo ndiyobotelwa kuchita bubotu kulimbabo. ndiyobabika chakusyomeka munyika eeyi amoyo wangu woonse abuumi bwangu boonse. ⁴² Nkaambo Jehova waamba eechi, 'Mbuli mbundeeta lunyonyooko lupati oolu aabantu aaba, aboobo ndiyoyeta aalimbabo zyoonse zintu zibotu eezyo nzindakaamba kuti ndiyobachitila. ⁴³ Mpawo myuunda iyowulwa munyika eeyi, njimulikwaamba kuti, ''Eeli nditongo lyanyika, nyika itakwe muntu na munyama. Yakapegwa mumaanza aabaKkaludiyeni.'' ⁴⁴ Bayowula myuunda ansiliva alimwi bayoolemba mumabbuku aajalidwe. Bayobungania bakamboni munyika yaBbenjamini, iizyungulukide Jekusalemu amyuunzi yaJuda, mumyuunzi iili aatulundu amumasena aalimumisena, amumyuunzi yaNegevu. Nkaambo ndiyobaboozezya buvubi bwabo - ooku nkwaamba kwaJehova.'''