¹ ''Muchiindi eecho - ooku nkwaamba kwaJehova - ndiyooba Leza wamikowa yoonse yaIzilayeli alimwi bayooba bantu bangu. ² Jehova waamba eechi, ''Bantu aabo bakafutuka kupanga bajana choolwe muchimpayuma; ndiyoyinka kuyoopa kulyookezya kuli Izilayeli.'' ³ Jehova wakaboneka kulindime mazuba ayinda akundaambila kuti, ''Ndakakuyanda, Izilayeli, aluyando lutamani. Aboobo ndakweeta afwiifwi andime akusyomeka kwachizuminano. ⁴ Ndiyokuyakulula lubo kuti ukayakikane, nakalindu Izilayeli. Uyobweza lubo tuntimbwa twako alimwi uyoyinka koyobuzyana chakubotelwa. ⁵ Uyobyala lubo masaansa aazilundu zyaSamaliya; balimi bayobyala akuyobelesya kabotu michelo. ⁶ Nkaambo buzuba buyosika aawo balindizi bali muzilundu zyaIfulemu nibayowamba kuti, 'Amubuke, ngatweende kuliJehova Leza wesu.' ⁷ Nkaambo Jehova waamba eechi, ''Moompolole chakukondwa akaambo kaJakkobbu! Moompolole mukubotelwa akaambo kabasimwaami bamasi. Kutembawulwa ngakukamvwigwe. Tedi, 'Jehova wavuna bantu bakwe, bantu baIzilayeli bakasyaala. ⁸ Langa, ndaamba kubaboozya kuzwa kubbazu lyakuNyika. Ndiyobabungania kuzwa kumasena aanyika aali kule. Boofu azimuumu banoli aakati kabo. Banakazi mamitide abaabo baamba kutumbuka banoli aakati kabo. Mbunga mpati iyoboola ooko. ⁹ Bayooboola kabalila; ndiyobazulwida aawo nibachita nkombyo zyabo. Ndiyobachita kuti bakayinke kutulonga twamaanzi munzila iibulungusene. Tabakoyolebwa pe mulinjiyo, nkaambo ndiyooba wisi waIzilayeli, alimwi Ifulemu uyooba mwana wangu mutaanzi/.' ¹⁰ ''Mumvwe jwi lyaJehova, nomanyika. Mukaambe munkomwe zilikule. Nomanyika mweelede kuti, 'Ooyo wakasansaania Izilayeli ulikumubungania akumubamba mbuli mweembeli ulikubungania mbelele zyakwe.' ¹¹ Nkaambo Jehova wakavuna Jakkobbu alimwi wakamufutula kujaanza lyakajisi nguzu kwiinda zyakwe. ¹² Mpawo bayosika akubotelwa aajulu lyaZiyoni. Masyu aabo ayomweka akaambo kabubotu bwaJehova, aatala lyazilyo awayini mupya, aatala lyamafuta abana babutangu amatanga. Nkaambo buumi bwabo buyooba mbuli muunda watiliilwa, alimwi tabakoyomvwa kunyema lubo pe. ¹³ Mpawo banakalindu bayokondwa akuzyana, alimwi baniini abapati banoli aantomwe. Nkaambo ndiyosandula kulila kwabo kuba kusekelela. Ndiyobafwida nsoni alimwi ndiyochita kuti bakabotelwe kwiinda kuusa. ¹⁴ Mpawo ndiyozuzya mawumi aabapayizi mubwiingi. Bantu bangu bayolizuzya abubotu bwangu - ooku nkwaamba kwaJehova.'' ¹⁵ Jehova waamba eechi: ''Jwi lyamvwigwa muLama, kulila akubizuuka. Ngu Lakkelu uli kulila bana bakwe. Wakaka kuumbulizigwa aatala ambabo, nkaambo tabachiponi pe.'' ¹⁶ Jehova waamba eechi, ''Jata jwi lyako kuzwa kukulila amenso aako kuzwa kumisozi; r kuli mpindu kumilimu yako - ooku nkwaamba kwaJehova - bana bako bayoboola kuzwa kunyika yasinkondonyokwe. ¹⁷ Muli bulangilizi kuli lyejunza lyako - ooku nkwaamba kwaJehova - lunyungu lwako luyoboola mumigaano yabo.'' ¹⁸ ''Nchobeni ndakamvwa Ifulemu kali kulila, 'Wakandipa chisubulo, alimwi ndakapegwa chisubulo mbuli kanamani katakwe luzibo. Ndiboozye alimwi ndiyoboozegwa, nkaambo nduwe Jehova Leza wangu. ¹⁹ Nkaambo nindakazwa kulinduwe ndakaba aabweeme; nkezwa kukuba aaluzibo, ndakawuma chibelo changu. Ndakaba aansoni akufwisigwa bweeme, nkaambo ndakabweza mulanda wabukubusi bwangu.' ²⁰ Sena Ifulemu tensi mwana wangu na muyandisi? Tensi muyandisi wangu na, mwana wangu mulombe mubotu? Nkaambo nikufa ndaamba bubi aatala anguwe, nikubaboobo nchobeni ndichinomuyeeya. Munzila eeyi moyo wangu uchimuyanda. Nchobeni ndiyomufwida nsoni - ooku nkwaamba kwaJehova.'' ²¹ Kalibikile zikkwaankwani zyamugwagwa. Libikile mpa zyakululamika. Bika mizeezo yako munzila iiluleme, nzila njoyelede kutobela. Boola, nakalindu waIzilayeli! Boola kumyuunzi yako eeyi. ²² Kukabe lili kolikuzungaana, mwana musimbi utakwe lusyomo? Nkaambo Jehova walenga chintu chpya aanyika - mwanakazi wazyunguluka mwaalumi singuzu. ²³ Jehova wamakamu, Leza waIzilayeli, waamba eechi, ''Eelyo nindayokweeta bantu kunyika yabo, bayowamba eechi munyik yaJuda amyuunzi yawo, 'Anoli Jehova wakulongezya, nobusena busalala ooko nkwakkala, nocjilundu chisalala.' ²⁴ Nkaambo Juda amyuunzi yakwe yoonse bayokkala aatomwe nkukooko, mbuli balimi abeembeli. ²⁵ Nkaambo ndiyochita aabo bakatede kuti bakanywe, alimwi ndiyozuzya aabo bawizukide.'' ²⁶ Musule lyacheechi ndakabuka, alimwi ndakananzelela kuti ng'onzi zyangu zyakali kubukulusigwa. ²⁷ ''Langa, mazuba ayobuza - ooku nkwaamba kwaJehova - eelyo nindiyobyala ng'anda zyaIzilayeli aJuda ambuto yamuntu ambuto yabanyama. ²⁸ Muchiindi chiinda, ndakali kubalanga kuchitila kuti nkabanobbole akuyobadelwiida aansi, kubazunda, kubanyonyoona, akuyoobeetela ntenda. Pesi mumazuba ayobuza, ndiyobabamba, kuchitila kuti nkabayake akubabyala - ooku nkwaamba kwaJehova. ²⁹ Mumazuba aayo takwe naba womwe uutakaambe limbi kuti, 'Mataata balya masaansa aapanyuka, pesi meno aabana akaba aabuye.' ³⁰ Nkaambo awumwi muntu uyoofwa muzibi zyakwe; woonse uulya masaansa aapanyukide meno akwe ayooba aabuye. ³¹ Langa, mazuba ayobuza - ooku nkwaamba kwaJehova - eelyo nendjoyimika chizuminano chipya ang'anda yaIzilayeli ang'anda yaJuda. ³² Tachikoyooba mbuli chizuminano nchindakasimpa amataata aabo mumazuba aayo ngindakabagwisya aluboko lwabo kubagwisya kuzwa munyika yaIjipiti, nkaambo bakatyola chizuminano changu, nikuba ndakali mulumi kulimbabo - ooku nkwaamba kwaJehova. ³³ Eechi nchechizuminano nchesikasimpe ang'anda yaIzilayeli musule lyamazuba aaya - ooku nkwaamba kwaJehova. Ndiyobika mulawu wangu mulimbabo alimwi ndiyowulemba aamyoyo yabo, nkaambo ndiyooba Leza wabo, alimwi bayooba bantu bangu. ³⁴ Mpawo awumwi muntu tachiyoyiisyi simabambanwa wakwe pe, na muntu kuyiisya mukulana wakwe kati, 'Ziba Jehova!' Nkaambo boonse bayondiziba, kuzwa kumuniini kusika kumupati loko - ooku nkwaamba kwaJehova - nkaambo ndiyobalekela zibi zyabo akutaziyeeya limbi.'' ³⁵ Jehova waamba eechi, nguwe uuchita zuba kuti libalame sikati alimwi ulachita kuti mwezi anyenyeezi zibalangale mansiku. Nguwe uuchita lwizi kuti lweende kuchitila kuti mayuwe aalo avuume - ooku nkwaamba kwaJehova. ³⁶ ''Luzutu kuti na zintu eezi zyamwayuuka kuzwa kumenso aangu - ooku nkwaamba kwaJehova - lunyungu lwaIzilayeli talukoyoyimikila lyoonse kuba nyika kunembo lyangu.'' ³⁷ Jehova waamba eechi, ''Luzutu na chakonzeka kweeleka bulamfu bwakujulu, alimwi luzutu na ntalisyo yanyika yajanika, ndiyokaka loonse lunyungu lwaIzilayeli akaambo kakuti kanzibakachita - ooku nkwaamba kwaJehova.'' ³⁸ ''Langa, mazuba ayobuza - ooku nkwaamba kwaJehova - eelyo muunzi niwuyoyakulwidwa ndime, kuzwa kuNgaze yaHananelu kusika kuMulyango waChooko. ³⁹ Mpawo ntambo yakweelesya inochiya kunembo, mane kusikila kuchilundu chaGaleti akuzyunguluka Gowa. ⁴⁰ Mumpata woonse wamitunta adota, alimwi amyuunda yoonse iichitilidwe zyakutanta kuyosika kuMumpata waKkidiloni uulikule mbuli chooko chaMulyango waMabbiza waKujwe, iyosalilwa kuli Jehova. Muunzi tawukoyondandamwidwa kujulu na kuzundwa limbi, kwalyoonse.''