¹ Aaya ngimakani aali mabbuku eelyo Jelemiya musinsimi ndyakatumizya kuzwa kuJelusalemu kubapati bakasyaala aakati kabaange akubapayizi, basinsimi, alimwi akubantu boonse aabo Nebbukkadineza mbaakagwisya kuzwa kuJelusalemu kusika kuBbabbiloni. ² Eezi zyakachitika musule lyamwami Jehoyikini, baama mukamwami, abeendelezi basilutwe, bazululi baJuda aJelusalemu, alimwi ababezi kabali batandwa kuzwa muJelusalemu. ³ Wakatumizya bbuku eeli ajaanza lyaElasa mwana mulombe waSyapani aGemaliya mwana mulombe waHilikkiya ooyo Zedekkiya, mwami waJuda, ngwakali watuma kuliNebbukkadineza mwami waBbabbiloni. ⁴ Bbuku lyakati, ''Jehova wamakamu, Leza waIzilayeli, waamba eechi kubaange aabo mbindakachita kuti bagwisigwe kuzwa kuJelusalemu kuya kuBbabbiloni, ⁵ 'Muyake maanda alimwi mukkale mulingawo. Mubyale zilili alimwi mulye michelo yazyo. ⁶ Mukwate banakazi muzyale bana balombe abana basimbi. Mpawo mukakwatile bana banu balombe banakazi, alimwi mukape bana banu basimbi kubaalumi. Mukabaleke bakazyale bana balombe abasimbi alimwi bakavule nkuko kuchitila kuti mutakabi bache loko. ⁷ Mukayanduule luumuno lwamuunzi ooyo nkwesikamuchijisizye, alimwi mukambuuzyanie andime kwiimikilila nguwo mbukunga kunooli luumuno lwanu na kawuli muluumuno.' ⁸ Nkaambo Jehova wamakamu, Leza waIzilayeli, waamba eechi, 'Mutalekeli basinsimi bali aakati kanu abasimabibo banu bamweene, alimwi mutakaswiilili maloto aayo anywebo ngimulaawo. ⁹ Nkaambo balikusinsima chalweeno kulindinywe muzina lyangu. Tendakabatuma pe - ooku nkwaamba kwaJehova.' ¹⁰ Nkaambo Jehova waamba eechi, 'Eelyo Bbabbiloni aakumweendelezya kwaminyaka iili makkumi musanu aabili ndiyomugwasya akuchita jwi lyangu bbotu kuti likamuboozya mubusena oobu. ¹¹ Nkaambo mebo lwangu ndilizi makanze ngendaawo andinywe - ooku nkwaamba kwaJehova - mabambe aaluumuno alimwi peepe aantenda, kukumupa lyajunza abulangilizi. ¹² Mpawo muyoyita kulindime, alimwi muyoyinka akuyokomba, mpawo ndiyomuswiilila. ¹³ Nkaambo muyondiyanduula akundijana, mbukunga muyondiyanduula amoyo wanu woonse. ¹⁴ Mpawo ndiyojanwa andinywe - ooku nkwaamba kwaJehova - alimwi ndiyoboozya choolwe chako; Ndiyomubungania kuzwa kumanyika akumasena woonse ooko nkundakamutandilide - ooku nkwaamba kwaJehova - nkaambo ndiyomulela kubusena ooko nkumwakaangilidwe akubikwa mubuzike.' ¹⁵ Mbokunga waamba kuti Jehova watubusizya basinsimi muBbabbiloni, ¹⁶ Jehova waamba eechi kumwami uukkede kuchuuno chabwami bwaDeviti akubantu boonse bakkala mumuunzi ooyo, bananyokwe bakatiinka adinywe mubwaange - ¹⁷ Jehova wamakamu waamba eechi, 'Bona, ndaamba kutumina panga, nzala mpati, adwazi aalimbabo. Nkaambo ndiyobachita kuba mbuli nkuyu zibolede eezyo zinunka zitalyiki. ¹⁸ Mpawo ndiyobatandaania apanga, nzala mpati, amalwazi akubachita chintu chiyoosya kunembo lyamaami woonse aanyika - chiyoosyo, chintu chamatusi akuyobayoba, alimwi chintu chuusisya nsoni aakati kazisi zyoonse ooko nkundakamumwayilide. ¹⁹ Zili boobu nkaambo tebandiswiilila jwi lyangu pe - ooku nkwaamba kwaJehova - ndindakatuma kulimbabo kwiindila mubalanda bangu basinsimi. Ndakabatuma twiingi twiingi, pesi tebakandiswiilila pe - ooku nkwaamba kwaJehova.' ²⁰ Aboobo nywebo lwanu muswiilile kujwi lyaJehova, moonse nimwakazwa mubuzike aabo mbaatuma kuzwa muJelusalemu kuya kuBbabbiloni, ²¹ 'Jehova wamakamu, Leza waIzilayeli, waamba eechi aatala aAhabbu mwana mulombe waKkolayiya aZedekkiya mwamna mulombe waManase, ooyo uusinsima zyakubeja kulindinywe muzina lyangu: Bona, ndaamba kubabika mujaanza lyaNebbukkadineza mwami waBbabbiloni. Uyoobajaya kunembo lyamenso aako. ²² Mpawo lutuko luyowambwa aatala abantu aaba abaange boonse abaange boonse baJuda muBbabbiloni. Lutuko luyowamba kuti: Anoli Jehova wamuchita mbuli Zedekkiya aAhabbu, aabo mwami waBbabbiloni mbaakayoka mumulilo. ²³ Eechi chiyoochitika akaambo kanchito ziwusisya nsoni nzibakachita muIzilayeli aawo nibakachita mamambe abanakazi babasimabambanwa alimwi akwaamba majwi aakubeja muzina lyangu, zintu eezyo nzindakatabaambila pe kuti bakaambe. Nkaambo ndime uuzi; ndime kamboni - ooku nkwaamba kwaJehova.''' ²⁴ ''Aatala aSyemayiya muNehelamu, wamba eechi: ²⁵ 'Jehova wamakamu, Leza waIZilayeli, waamba eechi: Akaambo kakuti wakatumina magwalo muzina lyako kubantu boonse muJelusalemu, kuli Zefaniya mwana mulombe waManaseyiya mupayizi, akubapayizi boonse, akwaamba kuti, ²⁶ ''Jehova wakuchita mupayizi kutali Jehoyiyada mupayizi, kuti ube weendelezya ng'anda yaJehova. Nduwe uuzyotolola bantu boonse aabo bambuula akulibika kuba basinsimi. Mweelede kubabika muzitookesi amumanketani. ²⁷ Aboobo nkaambonzi niwakatakalalila Jelemiya waAnatoti, ooyo uulichita musinsimi kukulwisya ndinywe? ²⁸ Nkaambo wakatumina ndiswe kuBbabbiloni akwaamba kuti, 'Chiyooba chiindi chilamfu. Muyake maanda mukkale mulingawo, alimwi mukabyale zilili akulya michelo yazyo.''''' ²⁹ Zefaniya musinsimi wakabala lugwalo oolu mukumvwakwaJelemiya musinsimi. ³⁰ Mpawo jwi lyaJehova lyakasika kuli Jelemiya, kaliti, ³¹ ''Tumina jwi kulibakazwa mubwaange boonse akwaamba kuti, 'Jehova wamba eechi aatala aSyemayiya muNehelamu: Akaambo kakuti Syemayiya wasinsima kulinduwe aawo nkesimutumide pe, alimwi wakuchita kuti usyome, ³² nkinkaako Jehova waamba eechi: Langa, ndaamba kusubula Syemayiya muNehelamu alunyungu lawkwe. Takwe kuyooba muntu wakukkala aakati kabantu aaba. Takwe nayobona bubotu oobo mbundiyoochitila bantu bangu - ooku nkwaamba kwaJehova - nkaambo wakaamba kupapila Jehova.'''