¹ Zyakachitika mumuntaka uulya, kumatangunino aabweendelezi bwaZedekkiya Mwami waJuda, mumunyaka wane mumwezi wasanu, Hananiya mwana mulombe waAzuli musinsimi, wakali kuzwa kuliGibbiyoni, wakambuula andime mung'anda yaJehova kunembo lyabapayizi abantu boonse. Wakati, ² ''Jehova wamakamu, Leza waIzilayeli, waamba eechi: Ndatyola majogwe aakabikidwe amamwmi waBbabbiloni. ³ Mukati kaminyaka iibili ndiyoboozya kuli boobu busena zyoonse zibelesyo zyamung'anda yaJehova eeyo Nebbukkadineza Mwami waBbabbiloni njakabweza kuzwa kubusena oobu akwiitola kuBbabbiloni. ⁴ Mpawo ndiyoboozya kuli boobu busena Jehoyikini, mwana mulombe waJehoyikimu, mwami waJuda, alimwi boonse bazike baJuda bakatumidwe kuBbabbiloni - ooku nkwaamba kwaJehova - nkaambo ndiyotyola jogwe lyamwami waBbabbiloni.'' ⁵ Aboobo Jelemiya musinsimi wakambiila Hananiya musinsimi kunembo lyabapayizi aabantu boonse bakiimvwi mung'anda yaJehova. ⁶ Jelemiya musinsimi wakati, ''Anoli Jehova wachita eechi! Anoli Jehova wazuzikizya majwi ngiwakasinsima akuboozya kuli boobu busena zibelesyo zyang'anda eeyi yaJehova abazike boonse kuzwa kuBbabbiloni. ⁷ Nikubaboobo, amuswiilile kujwi ndyendikwaambilizya kukumvwa kwanu akukumvwa kwabantu boonse. ⁸ Basinsimi bakaliwo kunembo lyangu anduwe kuzwa chiindi abalabo bakasinisma aatala amanyika miingi alimwi aatala amaami mapati, aatala ankondo, nzala mpati, adwazi. ⁹ Aboobo musinsimi uusinsima kuyooba luumuno - na jwi lyakwe lyazooba kasimpe, mpawo liyoozibinkana kuti nchoonzyo musinsimi wakatumwa aJehova.'' ¹⁰ Pesi Hananiya musinsimi wakabweza jogwe kuzwa munsingo yaJelemiya musinsimi alimwi wakalityola. ¹¹ Mpawo Hananiya wakambuula kunembo lyabantu alimwi wakati, ''Jehova waamba eechi: Mbuli mbuboobu, mukati kaminyaka iibili ndiyotyola kuzwa kunsingo yenyika ayimwi jogwe lyakabikwa aaNebbukkadineza mwami waBbabbiloni.'' Mpawo Jelemiya musinsimi wakayinkilila kunembo mulweendo. ¹² Nkali Hananiya musinsimi watyola jogwe kuzwa munsingo yaJelemiya musinsimi, jwi lyaJehova lyakasika kuliJelemiya, kaliti, ¹³ ''Koya ukaambile Hananiya alimwi ukatedi, 'Jehova waamba eechi: Wakatyola jogwe lyachisamu, pesi ndiyochita lyabutale.' ¹⁴ Nkaambo Jehova wamakamu, Leza waIzilayeli waamba eechi: Ndabika jogwe lyabutale yenyika zyoonse kuti zibelekele Nebbukkadineza mwami waBbabbiloni, alimwi bayomubelekela. Alubo ndamupa banyama bamusokwe mumyuunda kuti abeendelezye.'' ¹⁵ Zitobela Jelemiya musibsimi wakaambila Hananiya musinsimi kuti, ''Swiilila Hananiya! Jehova taakutuma pe, pesi webo lwako nduwe wachita bantu kuti basyome mumabejo. ¹⁶ Aboobo Jehova waamba eechi: Langa, ndaamba kukutanda kuzwa munyika. Uyoofwa mumunyaka uno, mbuli kuti wakaamba bupandusi aatala aJehova.'' ¹⁷ Mumwezi wamusanu ayibili wamunyaka ooyo, Hananiya musinsimi wakafwa.