¹ Kumatangunino aabweendelezi bwaZedekkiya mwana mulombe waJosaya, Mwami waJuda, eeli jwi lyakasika kuliJelemiya kuzwa kuliJehova. ² Nzezi Jehova nzyakaamba kulindime, ''Lichitile zikkeyi ajogwe. Kazizwaate munsingo yako. ³ Mpawo ukazitumizye kumwami waIdomu, mwami waMowabbu, mwami wabantu baAmoni, mwami waTaya, akumwami waSidoni. Kazitumizye aluboko lwabiiminizi babaami aabo baza kuJelusalemu kuliZedekkiya mwami waJuda. ⁴ Pa malyilile kulimbabo aabasimalelo babo alimwi utedi, ''Jehova wamakamu, Leza wesu, waamba eechi: Eezi nzizyo nzimweelede kwaamba kuli basimalelo banu, ⁵ Mebo ndemwini ndakapanga nyika anguzu zyangu aluboko lwangu lunyampwidwe. Alubo ndakapanga bantu abanyama aanyika, alimwi ndipa kuliwoyo weelede mumenso angu. ⁶ Aboobo lino, mebo lwangu ndikupa manyika aaya woonse mujaanza lyaNebbukkadineza, MwamiwaBbabbiloni, mulanda wangu. Alubo, ndikupa zyoonse zipona mumyuunda kulinguwe kuti zikamubelekele. ⁷ Nkaambo woonse manyika ayomubelekela, mwana wakwe mulombe, muzikulu wakwe wachaalumi kuyosika kukusika kwachiindi chanyika yakwe. Mpawo manyika miingi abaami bapati bayomuzunda. ⁸ Aboobo nyika abwaami butabelekeli Nebbukkadineza, Mwami waBbabbiloni, awoyo utayandi kubika mukosi wakwe munsi lyajogwe lyaMwami waBbabbiloni - ndiyosubula nyika eeyo apanga, nzala mpati, adwazi - ooku nkwaamba kwaJehova - kusikila ndayinyonyoona ajaanza lyangu. ⁹ Abobo mutaswiililzyi basinsimi banu, bang'anza banu, basimabibo banu, basikubonisigwa banu abasondi banu, aabo bakali kwaambula kulindinywe kabati, 'Mutabelekeli mwami waBbabbiloni.' ¹⁰ Nkaambo balikusinsimazyalweeno kulindinywe kuchitila kuti bamutandile kule anyika yanu, nkaambo ndiyomutanda, alimwi muyoofwa. ¹¹ Pesi nyika iibika nsingo yayo munsi lyajogwe lyaMwami waBbabbiloni akumubelekela, ndiyoyilekela kuti ikalyokezye munyika yayo - ooku nkwaamba kwaJehova - limwi bayolima akuchita myuunzi mulinjiyo.''''' ¹² Abobo ndakambuula kuli Zedekkiya Mwami waJuda akupa mulumbe ooyu, ''Mubike nsingo zyanu munsi lyejogwe lyaMwami waBbabbiloni akumubelekela abantu bakwe, alimwi muyopona. ¹³ Nkaambonzi nimutakafwe - nywebo abantu banu - apanga, anzala mpati, adwazi, mbuli mbundakaamba aatala amanyika aakaka kubelekela mwami waBbabbiloni? ¹⁴ Mutaswiilizyimajwi aabasinsimi bambuula kulinduwe kabati, 'Mutabelekeli mwami waBbabbiloni,' nkaambo balikusinsima mabejo kulindinywe. ¹⁵ 'Nkaambo tendakabatuma pe - ooku nkwaamba kwaJehova - nkaambo balikusinsima lweeno muzina lyangu kuchitila kuti ndikamutande alimwi muyooloba, moonse nywebo abasinsimi balikusinsima kulindinywe.''' ¹⁶ Ndakazyaamba eezi kubapayizi akubantu boonse akwaamba kuti, ''Jehova waamba eechi: Mutaswiilili kumajwi aabasinsimi banu basinsima kulindinywe kabati, 'Amulange! Zilongo zyang'anda yaJehova zilikuboozegwa kuzwa kuBbabbiloni lino!' Balikusinsima mabejo kulindinywe. ¹⁷ Mutabaswiilizyi. Mweelede kubelekela Mwami waBbabbiloni alimwi mupone. Nkaambonzi muunzi ooyu nutakabetongo? ¹⁸ Na kabali basinsimi, alimwi kuti ijwi lyaJehova nchobeni lyakabasikila, ngabakombelezye Jehova wamakamu kuti atatumizyi kuBbabbiloni zibelesyo zyakasyaala mung'anda yakwe, mung'anda yaMwami waJuda aJelusalemu. ¹⁹ jehova wamakamu waamba eechi aatala aminsende, chibikilo chipati chizibinkene aakuti, ''Lwizi'' achikalilo chacho, azimwi zibelesyo zyoonse zyakasyaala mummunzi - ²⁰ zibelesyo eezyo Nebbukkadineza Mwami waBbabbiloni nzyakatabweza pe aawo nakabweza Jehoyikini, Mwami waJuda, mwana mulombe waJehoyikimu, Mwami waJuda, kuya mubuzike kuzwa muJelusalemu kuya kuBbabbiloni aantomwe abalemekeka baJuda aJelusalemu. ²¹ Jehova wamakamu, Leza waIzilayeli, waamba eechi aatala azintu zisyaala mung'anda yaJehova, ng'anda yamwami waJuda, aJelusalemu, ²² 'Bayoyetwa kuBbabbiloni, alimwi bayokkala nkukooko kusika kubuzuba mbwebambide kuti nkabazide - ooku nkwaamba kwaJehova - mpawo ndiyobeeta akubaboozezya kubusena oobu.'''