¹ Kumatalikilo aabweendelezi bwaJehoyikkimu mwana mulombe waJosaya, eeli jwi lyakaza kuzwa kuliJehova, kaliti, ² ''Jehova waamba eechi: Ima mubbetekelo lyang'anda yangu akwambuula aatala amyuunzi yoonse yaJuda iiza kuzokomba mung'anda yangu. Ambilizya majwi woonse ngindakamulayilila nywebo kuti mwawambe kulimbabo. Mutafwiinsyi kufumbwa jwi! ³ Akubekuti bayoswiilizya, kuti awumwi muntu uyoswiilizya akusanduka kuzwa kunzila zyakwe mbi, aboobo ndiyosungwala aatala alunyonyooko ndwedikubamba kuyotola kulimbabo akaambo kanchito zyazibi zyabo. ⁴ Aboobo baambile kuti, 'Jehova waamba eechi: Na temwaswiilizya ndime kuti mweende mumulawu wangu ooy ngundakabika kunembo lyanu - ⁵ na temwaswiilizya majwi aabalanda babasinsimi bangunaabo mbendikutuma kulindinywe kwalyoonse - pesi temwakaswiilila pe! - ⁶ eelyo ndiyochita ng'anda eeyi mbuli Syilo; ndiyosandula muunzi ooyu kuba chituko kunembo lyamasi woonse aanyika.''' ⁷ Bapayizi, basinsimi, aboonse bantu bakamumvwa Jelemiya kaikwaambilizya majwi aayo mung'anda yaJehova. ⁸ Aboobo zyakachitika kuti eelyo Jelemiya nakamana kwaambilizya zyoonse eezyo Jehova nzyakali wamulayilila kuti aambile bantu boonse, bapayizi, basinsimi aboonse bantu bakamukwempa akwaamba kuti, ''Nchobeni uyoofwa! ⁹ Nkaambonzi nosinsima muzina lyaJehova akwaamba kuti eeyi ng'anda iyooba mbuli Syilo alimwi kuti iyooba tongo, itakwe bantu bakkala mulinjiyo?'' Nkaambo boonse bantu bakabungana kukulwisya Jelemiya mung'anda yaJehova. ¹⁰ Mpawo basilutwe baJuda bakamvwa majwi aaya alimwi bakayinka kuzwa kung'anda yaMwami kuya kung'anda yaJehova. Bakabika mulyango wakubbuda kuMulyango Mupya wang'anda yaJehova. ¹¹ Bapayizi abasinsimi bakambuula kuli basilutwe akubantu boonse. Bakati, ''Kuliluzi kuti mwaalumi ooyu afwe, nkaambo wasinsima aatala amuunzi ooyu, mbuli mbuwamvwa amatwi aako nomwini!'' ¹² Aboobo Jelemiya wakambuula kuli basilutwe boonse akubantu boonse, wakati, ''Jehova wandituma kuti ndisinsime aatala eng'anda eeyi amuunzi ooyu, kwaamba majwi woonse ngimwamvwa. ¹³ Aboobo lino, mubotezye nzila zyanu anchito zyanu, alimwi mukaswiilile kujwi lyaJehova Leza wanu kuchitila kuti akatebunune lunyonyooko ndwawamba aatala andinywe. ¹⁴ Mebo ndemwini - langa kulindime! - ndili mujaanza lyako. Ndichitile chibotu alimwi chiluleme mumenso aako. ¹⁵ Pesi mweelede kuziba kuti nchobeni na mwandijaya, nkokwaamba kuti mulikweeta bulowa butakwe kampenda aalindinywe alimwi aamuunzi ooyu abantu bakkala mulinguwo, nkaambo Jehova chakasimpe wandituma kulinduwe kwaamba majwi woonse kumatwi aanu.'' ¹⁶ Mpawo basilutwe abantu boonse bakati kubapayizi akubasinsimi, ''Tachiluzi kuti ooyu mwaalumi afwe, nkaambo waamba makani kulindiswe muzina lyaJehova Leza wesu.'' ¹⁷ Mpawo baalumi kuzwa kubapati benyika bakanyampuka alimwi bambuula kumbungano yoonse yabantu. ¹⁸ Bakati, ''Mikka Mosyeti wakalikusinsima mumazuba aaHezekkiya Mwami waJuda. Wakambuula kubantu boonse bamuJuda akwaamba kuti, 'Jehova wamakamu waamba eechi: Ziyoni uyooba muunda ulimidwe, Jelusalemu uyooba dantaala lyazibi, alimwi chilundu chatempele chiyooba chisakasaka.' ¹⁹ Sena Hezekkiya Mwami waJuda aboonse bamuJuda bakamujaya? Sena takayowa Jehova akukombelezya busyu bwaJehova kuchitila kuti Jehova atebunune lunyonyooko aatala ndwakali waamba aatala ambabo? Aboobo tuyochita zibi zipati na aatala amawumi esu?'' ²⁰ Pesi kwakali umwi mwaalumi wakasinsima muzina lyaJehova - Uliya mwana mulombe waSyemayiya kuzwa kuKkiliyati Jelimu - alakwe wakasinsima aatala amuunzi ooyu anyika eeyi, kazuminana amajwi aJelemiya. ²¹ Pesi eelyo Mwami Jehoyikimu abasilumamba abasilutwe nibakamvwa jwi lyakwe, mpawo mwami wakeezya kumujaya, pesi Uliya wakamwa alimwi wakayowa, aboobo wakachija waya kuIjipiti. ²² Mpawo Mwami Jehoyikimu wakatuma baalumi kuya kuIjipiti - Elinatani mwana mulombe wa Akibba abaalumi kuya muIjipiti kutobela Uliya. ²³ Bakabweza Uliya kuzwa muIjipiti akumweeta kuliJehoyikimu, Mwami. Mpawo Jehoyikimu wakamujaya apanga akutumina chituni chakwe kumaanda aabantu biyo. ²⁴ Pesi jaanza lyaAhikamu mwana mulombe waSyapani wakali aaJelemiya, aboobo taakapedekezegwa mujaanza lyabantu kuti ajayigwe.