¹ Eeli ndijwi lyakasika kuliJelemiya aatala abantu boonse baJuda. Lyakasika mumunyaka wane waJowakkimu mwana mulombe waJosaya, Mwami waJuda. Nguwakali munyaka mutaanzi waNebbukkadineza, Mwami waBbabbiloni. ² Jelemiya musinsimi wakoompolola eezi kubantu bamuJuda aboonse bakkala muJelusalemu. ³ Wakati, ''Kwaminyaka iili makkumi obilwe ayitatu, kuzwa mumunyaka wakkumi ayitatu yaJosaya mwana mulombe waAmoni, Mwami waJuda, kuyosika buzuba obuno, jwi lyaJehova lyakali kusika kulindime alimwi ndakalyaamba twiingi kulinduwe, pesi tewakaswiilila pe. ⁴ Jehova wakatuma b oonse balanda bakwe basinsimi twiingi loko, pesi takwe niwakaswiilila pe na kuchenjeka kutwi kuti umvwe. ⁵ Basinsimi aaba bakati, 'Umwi awumwi mwaalumi ngasanduke kusiya nzila zyakwe zyabubi akukunyongana kwanchito zyakwe akubweeda kunyika Jehova njaakapa muzyiindi kuli basikale banu akulindinywe, mbuli chipo chalyoonse. ⁶ Aboobo mutatobeli bambi baleza akubakomba nikuba kubakotamina, alimwi mutamunyemyi amilimu yamaboko anu kuti atamunyonyooni.' ⁷ Pesi temwakandiswiilila pe - ooku nkwaamba kwaJehova - aboobo mwandimyemya amilimu yamaboko anu kukukunyonyoona. ⁸ Aboobo Jehova wamakamu waamba eechi, 'Akaambo kakuti temwakaswiilila majwi aangu, ⁹ amubone, ndaamba kutuma malayilile aakubungika bantu boonse bakuNyika - ooku nkwaamba kwaJehova - aNebbukkadineza mulanda wangu, Mwami waBbabbiloni, akubeeta kuti balwisye nyika eeyi abantu bakkala mulinjiyo, akubalwisyania azisi zyoonse zimuzyungulukide. Nkaambo ndiyobasala akubabika kumbali kuti bakanyonyoonwe. Ndiyobasandula bakabe chiyoosyo, kuba chintu chakukonkomoka akuba chisampawuzi chitamani. ¹⁰ Ndiyobika mamanino kumusabilo wakusekelela akubotelwa, musabilo wasikukwata asikukwatwa, kuvuuma kwamaziyo amumuni walampi. ¹¹ Mpawo yoonse nyika eeyi oiyooba chisampawulo achiyoosyo alimwi aaya manyika ayobelekela Mwami waBbabbiloni kwaminyaka iii makkumi musanu aabili. ¹² Mpawo kuyochitika musule lyaminyaka iili makkumi musanu aabili kuti ndiyosubula Mwami waBbabbiloni achisi eecho, nyika ya baKkaludiya - ooku nkwaamba kwaJehova - nkaambo kazibi zyabo akuchita matongo aatagoli. ¹³ Mpawo ndiyobweza woonse majwi aangu aalangene aambabo ngindakaamba , azyoonse zilembedwe mubbuku eeli zyakasinismwa aJelemiya aatala azisi zyoonse. ¹⁴ Nkaambo alubo manyika miingi miingi abaami biingi bayochita bazike kuzwa kumanyika aaya. Ndiyobabwedezezya akaambo kanchito zyabo amilimu yamaanza aabo.''' ¹⁵ Nkaambo Jehova, Leza waIzilayeli, wakaamba eechi kulindime, ''Bweza nkomeki yabukali yawayini kuzwa mujaanza lyangu akuchita manyika woonse ngenjokutuma kulingawo kuti akanywe. ¹⁶ Nkaambo bayoonywa alimwi bayodadalika akweema chakupenga kunembo lyapanga ndelikutuma aakati kabo.'' ¹⁷ Aboobo ndakabweza nkomeki kuzwa mujaanza lyaJehova, alimwi ndakachita kuti manyika aayo Jehova ngakandituma kulingawo anywe: ¹⁸ Jelusalemu, madolopo aaJuda, baami abasilutwe - kwaachita kuti abe matongo akuba chintu chiyoosya, chisesemyo chakutuka, mbuli mbabede sunu obuno. ¹⁹ Zimwi zisi azilazyo zyakayinywa. Falo Mwami waIjipiti, bazike bakwe abasilutwe abantu bakwe; ²⁰ boonse bantu bamikowa iivwelengene abaami boonse banyika yaUzi; boonse baami banyika yaFilisitiya - Asyikeloni, Gaza, Ekkiloni, abakasyaala baAsyidodi; ²¹ Idomu aMowabbu abantu baAmoni. ²² Baami baTaya aSidoni, baami bamunkomwe kuli lumwi lubazu lwalwizi, ²³ Dedani, Tema, aBuzi aantomwe aboonse balinyoola masusu mumbali lyamitwe yabo, abalabo bakayinywa. ²⁴ Boonse baami baAlabbiya abaami bamikowa iivweleene bakkala munkanda; ²⁵ boonse baami baZimuli, Elamu, abaami boonse baMedisi; ²⁶ boonse baami bakuNyika, bali afwiifwi abali kule - umwi awumwi amukulana wakwe akufumbwa bwaami boonse bwamunyika buli munsi aazuba, boonse bakiinywa nkomeki yakazwa mujaanza lyaJehova. Kumamanino, Mwami waBbabbiloni uyoonywa kuzwa kunkomeki eeyo. ²⁷ Jehova wakati kulindime, ''Lino waambe kuti kulimbabo, 'Jehova wamakamu, Leza waIzilayeli, waamba eechi: Munywe mukolwe, mpawo muluke, muwide aansi, mutabuki kunembo lyapanga ndyendikutuma aakati kanu.' ²⁸ Mpawo chiyochitika kuti bakakake kunywa kuzwa munkomeki iili mujaanza lyako, uyooti kulimbabo, 'Jehova wamakamu waamba echi: 'Nchobeni mweelede kunywa kuzwa kulinjiyo. ²⁹ Nkaambo bona, ndaamba kweeta lunyonyooko aatala adolopo eelyo lyiitwa muzina lyangu, alimwi nywebo nobeni muyofutuka na kuchisubulo eecho? Tamukoyofutula, nkaambo ndikwiita panga lyakulwisya boonse bakkala munyika eeyi! - ooku nkwaamba kwaJehova wamakamu.' ³⁰ Weelede kusinsima zintu eezi aatala ambabo, akwaamba kut kulimbabo, 'Jehova uyovuluma kuzwa kumajulu alimwi uyowompolola ajwi lyakwe kuzwa kuchikalilo chakwe chisalala, uyovuluma changuzu aatala abakwe; alimwi uyowompolola, mbuli balyatuuka masaansa kuli boonse bapona aatala anyika. ³¹ Muzuzumo wankondo uyondondoma kumamanino aanyika, nkaambo Jehova wapa mulandu munyika, aboobo weeta lubeta aatala anyama yoonse, alimwi basizibi uyobabikila panga - ooku nkwaamba kwaJehova. ³² Jehova wamakamu waamba eechi, 'Bona, lunyonyooko luyobuzwa kuchisi kaluya kuchisi, alimwi muuwo mupati ulikutalika kumatalikilo aanyika. ³³ Mpawo aabo nakajayigwa aaJehova muleelyo zuba bayovula kuzwa kumamanino aanyika kuyosika kumamanino aanyika; tabakoyolilwa pe, kubungikwa, na kuvwikwa. Bayooba mbuli mafumba aang'ombe aajulu aanyika. ³⁴ Mulyeeme, nobeembeli, alimwi moompololole lugwasyo! Mubumbuluke mulusuko, inywe nobazululi babutanga, nkaambo mazuba akujayigwa kwanu asika; muyomwayisigwa aawo nimuyoowa mbuli kalongo kabotu. ³⁵ Takwe kwakuyubila pe kubeembeli, takwe kwakufutukila pe kubazululi babutanga. ³⁶ Mvwa kulila kwabeembeli akweema kwabazululi babutanga, nkaambo Jehova ulikunyonyoona machezezyo aabo. ³⁷ Aboobo machezezyo aaluumuno ayonyonyooka akaambo kabukali bwaJehova buyoosya. ³⁸ Mbuli mulavu muniini, wasiya busena bwakwe mpalala, nkaambo nyika yabo yaba chiyoosyo akaambo kakunyema kwamudyaamizi, kaambo kabukali bwakwe.'''