¹ Jehova wakanditondeezya chimwi chintu. Bona, zizuma zyobile zyankuyu zyakabikwa kunembo lyang'anda yaJehova. (Chilengano eechi chakachitika musule lyaNebbukkadineza ,mwami waBbabbiloni, kali wabweza akutola mubuzike Jewoyakki mwana mulombe waJewoyakkimu, mwana mulombe waJuda, basilutwe baJuda, babezi abafuzi bazwa muJelusalemu akubaboozya muBbabbiloni.) ² Nkuyu zyakali muchizuma chomwe zyakali mbotu loko, mbuli nkuyu ntaanzi kubizwa, pesi nkuyu zyalkali muchizuma chimwi zyakali mbi loko aboobo tezyakali kulyika pe. ³ Jehova wakati kulindime, ''Ulikubonaanzi, Jelemiya?'' Ndakati, ''Ninkuyu. Nkuyu mbotu loko ankuyu mbi loko tazyiliki pe.'' ⁴ Mpawo jwi lyaJehova lyakaza kulindime, kaliti, ⁵ ''Jehova, Leza waIzilayeli waamba eechi: Njoolanga buzike bwaJuda nkaambo nimpindu yabo, mbubonya mbuli eezyo nkuyu mbotu, bazike aabo mbindakatuma kuzwa kubusena oobo kusika kunyika yaKkalidiyo. ⁶ Njoobika menso angu kuli mbabo nkaambo mbabotu akubalondola munyika eeyi. Ndiyobayaka akutabanyonyoona pe. Ndiyobabyala alimwi nsikoyobanonkola pe. ⁷ Mpawo ndiyobapa moyo wakuziba ndime, nkaambo ndime Jehova. Bayooba bantu bangu ambebo ndiyooba Leza wabo, aboobo bayoboola kulindime amyoyo yabo yoonse. ⁸ Pesi mbuli nkuyu mbi, eezyo mbi loko kukuzilya - eechi nchenchicho nchaamba Jehova - ndiyochita muli yeeyi nzila aZedekkiya, mwami waJuda, abasilutwe bakwe, aboonse bamuJelusalemu aabo bakasyaala munyika eeyi na bakayinka kuyokkala munyika yaIjipiti. ⁹ Ndiyobachita kuba chintu chiyoosya, lunyonyooko, kubusyu bwamaami woonse ali aanyika, kuusigwa akuba chiiyo chatusimpi, kusampawulwa akutukwa mumasena woonse nkwesikabatandile. ¹⁰ Ndiyotuma panga, nzala amalwazi aakati kabo, mane lumwi bakanyonyooke kuzwa kunyika eeyo njindakabapa abamawisi aabo.''