¹ Maawe kubeembeli aabo banyonyoona akumwaya mbelele zyamachezezyo aangu - ooku nkwaamba kwaJehova.'' ² Nkinkaako Jehova, Leza waIzilayeli waamba eechi aatala abeembeli balikweembela bantu bakwe, ''Mwakamwaya butanga bwangu akububingila kule.Temwakabubamba pe. Aboobo ndaamba kumupa chisubulo akaambo kabubi mbumwakachita - ooku nkwaamba kwaJehova. ³ Mebo lwangu ndiyobungania zyakasyaala zyabutanga bwangu kuzwa kumanyika ooko nkundakazibingilide, alimwi ndiyoziboozya kumachelelo, nkuziyoozyala michelo akuvula. ⁴ Mpawo ndiyobusya beembeli aalinzizyo alimwi bayozyembela kuchitila kuti zitakayoosegwi limbi na kumwayisigwa. Takwe yazyo itakasweeke pe- ooku nkwaamba kwaJehova. ⁵ Bona, mazuba alasika - ooku nkwaamba kwaJehova - aawo nensikabusizye Devit mutabi wabaluleme. Uyoyendelezya mbuli mwami; uyoochita chabusongo akuchita bululami abusalali munyika. ⁶ Mumazuba aakwe Juda uyoovunwa, alimwi Izilayeli uyoopona mulukwabililo. Mpawo eeli ndezina ndyayoyitwa: Jehova mbululami bwesu. ⁷ Nkinkaako bona, mazuba alasika - ooku nkwaamba kwaJehova - nibatakwe kuyowamba limbi kuti, 'Mbuli Jehova mbapona, ooyo wakagwisya bantu baIzilayeli kuzwa munyika yaIjipiti.' ⁸ Pesi bayowamba kuti, 'Mbuli Jehova mbapona, wakagwisya akuzulwida kubweeda kwalunyungu lwang'anda yaIzilayeli kuzwa kulubazu lwakuNyika zyoonse ooko nkubakabingilildwe.' Mpawo bayopona kunyika yabo abalike.'' ⁹ Aatala abasinsimi, moyo wangu ulityokede mukati, alimwi mafuwa angu woonse alateketa. Ndaba mbuli muntu uukoledwe, muntu wakazundwa wayini, nkaambo kaJehova amajwi akwe aasalala. ¹⁰ Nkaambo nyika ilizwide abasimamambe. Akaambo kazeezi nyika yayuma. Myuunda yabwizu munkanda yayuma. Nzila zyabasinsimi aaba nzyabubi; nguzu zyabo tazili kubeesegwa munzila ilinjenjiyo pe. ¹¹ Nkaambo boonse basinsimi abapayizi bakasofwazigwa. Ndakajana bubi bwako mung'anda yangu! - ooku nkwaamba kwaJehova - ¹² nkinkaako nzila yabo iyooba mbuli busena butyezemuka mumudima. Bayotontolwa aansi. Bayowida mulinjiyo. Nkaambo ndiyoleta ntenda aalimbabo mumunyaka wachisubulo chabo - ooku nkwaamba kwaJehova. ¹³ Nkaambo ndakabona basisnsimi muSamaliya nkabachita zitalomene pe: Bakali kusinsima aBbaala akuleesya bantu bangu baIzilayeli. ¹⁴ Aakati kabasinsimi muJelusalemu ndakabona zintu ziyoosya: Balachita mamambe alimwi baleenda mulweeno. Balayumya maanza aabasimuchita zibi; takwe naba womwe uzwa kukuchita zibi zyakwe. Boonse baba mbuli Sodomu kulindime alimwi aabo bakkala oomo mbuli Gomola!'' ¹⁵ Nkinkaako Jehova wamakamu waamba eechi aatala abasinsimi, ''Langa, ndaamba kubachita kuti balye masenda akunywa maanzi aali aamusamu uujaya, nkaambo kusofwaala kweendelela kuzwa kubasinsimi baJelusalemu kusika kunyika yoonse.'' ¹⁶ Jehova wamakamu waamba eechi, ''Mutaswiilili kumajwi aabasinsimi basinisima kulindinywe. Bakamweena! Balikwaambilizya zilengano zizwa mumiyeeyo yabo beni, peepe kuzwa kumulomo waJehova. ¹⁷ Balikwaamba lyoonse kulibaabo batandipi bulemu, 'Jehova waamba kuti kuyooba luumuno lwanu.' Nkaambo woonse uyobweenda mukunduuzya kwamoyo wakwe waamba kuti, 'Ntenda tikoyosika pe aalindinywe.' ¹⁸ Pesi wakiimvwi mumbungano yaJehova? Ngwani uubona alimwi uumvwa jwi lyakwe? Ngwani uuswiilila jwi lyakwe akulimvwa? ¹⁹ Bona, kuli mvula yaguwo iyobuzwa kuliJehova! Bukali bwakwe bulikuzwa, anchinsyamoyo ilikuungawunga. Ilikuungawunga aatala lyamitwe yabasizibi. ²⁰ Kunyema kwaJehova takukyobweeda kusikila kukachite aluleta bube bwamakanze aamoyo wakwe. Mumazuba aamamanino, muyochimvwisisisya. ²¹ Tendakabatuma pe basinsimi aaba. Bakayubunuka biyo. Tendakaamba chintu kulimbabo, pesi bachiyobusinsima. ²² Nkaambo nsinga bakayima mumbungano yamuswangano wangu, balikunochita kuti bantu bangu bamvwe jwi lyangu; balikunochita kuti bantu bangu basanduke kuzwa kumajwi aabo mabi akunchito zyabo zinyongene. ²³ Sena tensi ndime Leza na alike uuli afwiifwi - ooku nkwaamba kwaJehova - alimwi Leza uutali kule? ²⁴ Sena umwi nga ulayuba mubusena busitikide bwakuti nsikonzyi pe kumubona? - ooku nkwaamba kwaJehova - alimwi tandizuzyi julu anyika na? - ooku nkwaamba kwaJehova. ²⁵ Ndamvwa eecho nchibalikwaamba basinsimi, aabo bakalikusinsima lweeno muzina lyangu. Bakaamba kuti, 'Ndakalota! Ndakalota!' ²⁶ Kuyoosika lili eezi kazilikuchitika, basinsimi basinsima mabejo kuzwa mumyoyo yabo? ²⁷ Balikubamba kuti balubye bantu bangu izina lyangu amaloto aayo ngibalikwaamba, umwi awumwimkulisimabambanwa wakwe, mbubo bmuli basikale babo mbubakaluba zina lyangu mukuyandisya zina lyaBbaala. ²⁸ Musinsimi uulota, ngaambe loto. Pesi ooyo ngundaambila chintu mumuleke abandike jwi lyangu chamasimpe. Ani busweezyo bulachitaanzi kuzilyo? - ooku nkwaamba kwaJehova - ²⁹ Sena jwi lyangu talili mbuli mulilo na? - ooku nkwaamba kwaJehova - alimwi mbuli nsando iipwaya bbwe kuba zimpanzi? ³⁰ Aboobo bona, ndilakazyania abasinsimi - ooku nkwaamba kwaJehova - kufumbwa umwi uuba majwi kuzwa kuli umwi muntu akwaamba kuti azwa kulindime. ³¹ Bona, ndilalwisyania abasinsimi - ooku nkwaamba kwaJehova - babelesya ndimi zyabo kusinsima zyaambo. ³² Bona, ndilalwisyania abasinsimi balota zyalweeno - ooku nkwaamba kwaJehova - mpawo basikwawamba munzila eeyi iisowa bantu bangu alweeno akulidunda. Ndilalwisyania ambabo nkaambo tendakabatuma pe nikuba kubalayilila. Aboobo nchobeni takwe nibatakabagwasye pe bantu aaba - ooku nkwaamba kwaJehova. ³³ Eelyo bantu aaba, na musinsimi, na mupayizi nayomubuzya kuti, 'Nguuli mukuli waJehova?' muyowamba kuti kulimbabo, 'Nduwe mukuli, alimwi ndiyokusowela aanze' - ooku nkwaamba kwaJehova. ³⁴ Mbuli basinsimi, bapayizi abantu balikwaamba kuti, 'Ooyu mukuli waJehova' ndiyomupa chisubulo muntu ooyo ang'anda yakwe. ³⁵ Mwiinkilila aanembo kwaamba, umwi awumwi muntu kuli simabambanwa wakwe alimwi umwi awumwi muntu kumukulana wakwe, 'Jehova wasandula kutyeni? alimwi 'Jehova walayililaanzi?' ³⁶ Pesi tamweelede kwambuula limbi aatala a 'mukuli waJehova,' nkaambo mukuli ndijwi lyawumwi awumwi mwaalumi, alimwi mwakasandula majwi aaLeza muumi, Jehova wamakamu, Leza wesu. ³⁷ Ncheechi nchutakaambe kumusinsimi, 'Ninsandulo nzi Jehova njaakupa?' na 'Watyeni Jehova?' ³⁸ Pesi na mwaamba kuti, 'Mukuli waJehova,' eechi nchicho nchaamba chaJehova: 'Akaambo kakuti mwaamba majwi aaya, 'Mukuli waJehova,' eelyo nindakamutuma, kamuti, 'Tamukoyowamba kuti, ''Mukuli waJehova,''' ³⁹ nkinkaako, amubone, ndaamba kubweza akukusowa kuzwa kulindime, aantomwe amuunzi ngundakakupa abasikale bako. ⁴⁰ Mpawo ndiyobika bweeme butamani achitusi aalinduwe chitakwe nichiyoolubwa pe.'''