¹ Jehova wakaamba eechi, ''Mwiinke alimwi mukawule zibikilo zyazilongo kumubumbi nkamuli aabazuluzi babantu abapayizi. ² Mpawo mwiinke kuMumpata wa Bbeni Hinoni kuMulyango waZilongo Zifwide, mpawo ooko mukaambe majwi ngesikamwaambile. ³ Mukatedi, 'Mumvwe jwi lyaJeova, nobami baJuda animukkala muJelusalemu! Jehova wamakamu, Leza waIzilayeli waamba eechi, ''Bona, ndaamba kweeta lunyonyooko aabusena oobu, alimwi matwi aaboonse bamvwa eechi ayooyowa. ⁴ Ndiyochita eechi nkaambo bakandikaka akubisizya busena oobu. Mubusena oobu balapayilila kulibaleza bambi mbibakatezi pe. Bo abasikale babo, alimwi abaami baJuda bazuzya busena oobu abulowa butakwe mulandu pe. ⁵ Bayaka masena mapati aaBbaala kuti bawumpe bana babo balombe mumulilo mbuli zipayizyo zyakutenta - eecho nchindakatabalayilila pe na kwaamba, nikuba kuyeeya mumizeezo yangu pe. ⁶ Nkinkaako, bona, mazuba ayobuza - ooku nkwaamba kwaJehova - eelyo busena oobu nibutakachiyoyitwi limbi kuti Tofeti, Mumpata waBbeni Hinoni, nkaambo unoli wafa Mumpata wakuJayila. ⁷ Mubusena oobu ndiyochita mabambe aJuda aJelusalemu aabuyo. Ndiyobachita kuti bakajayigwe apanga kunembo lyabasinkondonyina akuluboko lwabaabo bayanduula mawumi aabo. Mpawo ndiyopa mitunta yabo mbuli chakulya kutuyuni twamujulu abanyama bamusokwe baansi. ⁸ Mpawo ndiyochita muunzi ooyu tongo chintu chiyoosya, nkaambo woonse wiinda mpawo uyoyosegwa akumuyasa kazyeendelana abulwazi boonse. ⁹ Ndiyoachita kuti bakalye nyama zyabana babo balombe abasimbi; awumwi muntu uyoolya nyama yasimabambanwa wakwe mukuyowa amukulila kweetwa aalimbabo abasinkondonyina abaabo bayanduula mawumi aabo.''' ¹⁰ Mpawo uyopwaya chibikilo chachilongo kumenso aabaalumi bakeenda aanduwe. ¹¹ Uyowamba kuti kulimbabo, 'Jehova wamakamu waamba eechi: Ndiyochita chintu eechi chikozyenie kubantu aaba akuchisi eechi - ooku nkwaamba kwaJehova - mbuli Jelemiya mbwakapyachula chibikilo chabulongo kuchitila kuti chitakabumbululwi lubo pe. Bantu bayovwika bantu bafwide muTofeti kusikila kukabulike busena busyeede bwakuvwikia bafu. ¹² Eechi nchincho nchindiyochita kubusena oobu akulibaabo bakkala mulimbubo nindiyochita chisi eechi mbuli Tofeti - ooku nkwaamba kwaJehova - ¹³ aboobo nga'nda zyaJelusalemu alimwi azyabaami baJuda ziyooba mbuli Tofeti - zyoonse nga'anda zili aatululi ooko basizibi nkubakombela nyenyeezi zyakujulu alimwi nkubatila zipo zyakunywa kulibamwi baleza.''' ¹⁴ Mpawo Jelemiya wakeenda kuzwa kuTofeti, ooko Jehova nkwakamutuma kuti akasinsime. Wakiimikila mulubuwa lwang'anda yaJehova alimwi wakati kubantu boonse, ¹⁵ ''Jehova wamakamu, Leza waIzilayeli, waamba eechi, 'Bona, ndaamba kweeta lunyonyooko loonse ndundakaamba aatala achisi eechi amadolopo aawo woonse, mbuli kuti bakayumya nsingo zyabo alimwi tebakaswiilila kumajwi aangu pe.'''