¹ Ijwi lyakasika kuliJelemiya kuzwa kuliJehova, kaliti, ² ''Nyampuka uye kung'anda yamubumbi, nkaambo ndiyochita kuti ukamvwe jwi lyangu nkukooko.'' ³ Aboobo ndakayinka kung'anda yamubumbi, alimwi bona! Mubumbi wakali kubeleka aavili lyamubumbi. ⁴ Pesi kalongo nkakali kubumba kuzwa kubulongo kakabija mujaanza lyamubumbi, aboobo wakabweedezya bulongo alimwi wabumba kambi kalongo, alimwi wakabumba kalongo aako kuba chintu cheebesi kumenso aakwe. ⁵ Mpawo ijwi lyaJehova lyakasika kulindime, kaliti, ⁶ ''Nsikonzyi na kuti nchite mbuli ooyo mubumbi andinywe, nong'anda yaIzilayeli? - ooku nkwaamba kwaJehova. Amubone! Mbuli bulongo mujaanza lyamubumbi, - mbubo mbumubede mujaanza lyangu, nong'anda yaIzilayeli. ⁷ Kuli chimwi chiindi ndilakonzya kwaamba chimwi aatala achisi na abwaami, kuti ndiyochigwisya aanze kuchizavuula, na kuchinyonyoona. ⁸ Pesi nan chisi eecho nchindakaambila makani aayo chasanduka kuzwa kububi bwacho, mpawo ndiyoyivuna kuzwa kuntenda nzindakabambide kweeta aatala anchicho. ⁹ Kuli chimwi chiindi ndakonzya kwaamba chintu aatala achisi na abwaami, kuti ndiyochiyaka na kuzikila. ¹⁰ Pesi na chachita bubi kumenso angu kwiinda mukutaswiilila jwi lyangu, mpawo ndiyoyimikizya bubotu oobo mbundakabambide kubachitla. ¹¹ Aboobo lino, ambila bantu baJuda abaabo bakkede muJelusalemu alimwi waambe kuti, 'Jehova waamba eechi: Bona, ndaamba kubumba lunyonyooko aatala andinywe. Ndaamba kuchita mabambe aatalaandinywe. Amusanduke, awumwi kuzwa kunzila yakwe mbi, aboobo nzila zyako anchito zyako ziyokweetela bubotu.' ¹² Pesi bayowaamba kuti, ' Eezi tazibeleki. Tuyochita mbuli mumabambe esu.Awumwi wesu uyochita eecho chiyandwa amoyo wakwe mubi, uutaswiilili nzyuuyanda.' ¹³ Nkinkaako Jehova waamba eechi, 'Buzya manyika kuti ngwani utanaamvwa chintu chili mbuli cheechi? Nakalindu waIzilayeli wakachita nchito iiyoosya. ¹⁴ Sa lume muLebbanoni luyosiya tulundu tamabwe kumabazu aato? Sena tulonga twamuzilundu tuzwa kule twakamwayigwa, ooto tulonga tutontola? ¹⁵ Nikuba boobo bantu bangu bandiluba. Bakapa zipo kuzitoombe zitagwasyi pe alimwi zyakachitwa kuba zilebyo munzila zyabo; bakasiya nzila zyabo zyachiindi beenda munzila niini. ¹⁶ Nyika yabo iyooba chiyoosyo, chintu chiyoosya kapati. Woonse muntu wiinda mulinjiyo uyotilimuka alimwi akateketesye mutwe wakwe. ¹⁷ Ndiyobamwaya kunembo lyabasinkondonyina mbuli luuwo lwaKujwe. Ndiyobafutatila, peepe busyu bwangu, mubuzuba bwalunyonyooko lwabo.''' ¹⁸ Aboobo bantu bakati, ''Muboole, atwambuule aatala aJelemiya, mbukunga mulawu tukoyofwidilila pe kubapayizi nikuba luchenjezyo luzwa kubaalumi basongo naaba majwi kuzwa kuubasinsimi. Muboole, atumulwane amajwi eesu alimwi tatukaswiilili limbi kumajwi ngayowamba.'' ¹⁹ Swiilila kulindime, Jehova, alimwi uswiilile kujwi lyabasinkondoma. ²⁰ Sena lunyonyooko luzwa kulimbabo lukabe mpindu yangu na nchobeni yakuba mubotu kulimbabo? Nkaambo bakandisyida dindi. Koyeeya mbundakiima kunembo lyako nkewamba aatala abukkale bwabo, kuchita bukali bwako kuti buzwe kulimbabo. ²¹ Nkinkaako pa bana babo kunzala mpati, alimwi ukabape kujaanza lyabaabo babelesya panga.Aboobo leka banakazi babo bafwidwe babe bamukabafu, alimwi baalumi babo bajayigwe, baalumi babo baniini bakajayigwe apanga munkondo. ²² Muleke koompolola kwakupenzegwa kukamvwigwe kuzwa mumaanda aabo, mbuli mboyeta basikubajata chakufwambaana aatala ambabo. Nkaambo bakasya dindi lyakundijatya aandilyo alimwi basisa tukole twakujata mawulu angu. ²³ Pesi webo, Jehova, ulaazi mabambe aabo woonse aatala andime aakundijaya. Utalekeleli milandu azibi zyabo. Utazimaazyi zibi zyabo kuzwa kukinduwe. Pesi, ngabakazundwe kunembo lyako. Balwane muchiindi chabukali bwako.