¹ Chibi chaJuda chililembedwe achilembyo chabutale chili aandomo ya dayimondi. Chililembedwe aachilembelo chamyoyo yabo alimwi aameja aazipayililo zyabo. ² Nikuba bana babo baliziyeede zipayililo zyabo amasamu aAsyela aakabikidwe kumbali lyamisamu yakali kukomena aajulu lyatulundu tulamfu. ³ Chilundu changu munyika iikwazeme, buvubi bwako azibikilo zyako zyoonse ndiyozipa mbuli chipo, aantomwe amasena aako malamfu, akaambo kachibi nchiwakachita kumasena woonse. ⁴ Uyosweekelwa lukono oolo ndundakakupa. Ndiyokwaaba kuli basinkondonyokwe kunyika eeyo njotazi pe, nkaambo wanamatizya mulilo mubukali bwangu, ooyo utakayake kwalyoonse.'' ⁵ Jehova wati, '''Muntu uusyoma mubantu ulitukidwe, ulachita munguzu zyanyama yakwe pesi ulapilusya moyo wakwe kuzwa kuliJehova. ⁶ Nkaambo uyooba mbuli chiteyo chiniini chamuAlabba alimwi takoyobona chimwi chintu chibotu kachisika. Uyookkala mubusena bujisi mabwe munkanda, munyika iitazyali itakwe bantu bakkala mumo. ⁷ Pesi muntu uusyoma muliJehova ulilongezegelwe, nkaambo Jehova ngomutabilizi wakwe. ⁸ Nkaambo unoli mbuli musamu uubyalidwe kumbali lyamanzi, miyanda yawo iyotandabalila mukalonga. Tukoyoyowa kupya puumina niliyosika, nkaambo matu aawo alikamweemvwe lyoonse. Tukalikataazyi pe mumunyaka wachimpayuma, alimwi tuukoyoleka kuzyala muchelo. ⁹ Moyo ulijisi lweeno lupati kwiinda zintu zyoonse. Ulachiswa; ngwani uunga ulumvwisisisya? ¹⁰ Ndime Jehova ooyo uulingula kwiinda mumiyeeyo, uusunka moyo. Ndiyopa kuli wumwi awumwi muntu kwiindila munzila zyakwe, akwiindila munchito zyamichelo yakwe. ¹¹ Kwale uukonkola majwi ngaakatania pe. Umwi ukonzya kuba muvubi mububi, pesi eelyo chibeela chachiindi chamazuba aakwe chaakumana, oobo buvubi bwakwe buyomusiya, alimwi kumamanino uyooba chifubafuba.'' ¹² ''Busena bwatempele yesu nchuuno chabulemu, chakasumpulwa kuzwa kumatalikilo. ¹³ Jehova mbulangilizi bwaIzilayeli. Boonse bakutakata ndiyobabika mubweeme; aabo bali munyika baboola kuzwa kulinduwe bayoolembwa munyika, nkaambo baleka Jehova, kasensa kamaanzi aabuumi. ¹⁴ Kondiponia, Jehovva, alimwi ndiyopon! Ndivune, alimwi ndiyovunwa. Nkaambo ulilwiimbo lwangu lwakutembawula. ¹⁵ Bona, balikuti kulindime, 'Lilikuli jwi lyaJehiva? Ngalize!' ¹⁶ Mbuli ndime, tensi ndakachija pe kuzwa kuba mweembeli uukutobela. Tensi ndakeemuzya buzuba bwalunyonyooko pe. Ulikwizi kwaamba kwangu kwakazwa mumulomo wangu. Kwakachitwa mubuliwo bwako. ¹⁷ Utandibedi chiyoosyo. Ulichiyubilo changu mubuzuba bwamapenzi. ¹⁸ Ikaka aabo basikundoongelezya ngabakawusigwe nsoni, pesi mebo nditawusigwi nsoni. Ngabayoosegwe, pesi mebo nditayowesegwi. Tumina buzuba bwantenda aata;la lyabo alimwi kobanyonyoona alunyonyooko lwiindulwidwe tubili.'' ¹⁹ Jehova wakaamba eechi kulindime: ''Koya alimwi ukiimikile kumulyango wabantu ooko baami baJuda nkubanjilila akuzwida, mpawo akumilyango yoonse yaJelusalemu. ²⁰ Kabaambile kuti, 'Amumvwe jwi lyaJehova, nobaami baJuda alimwi moonse nimukkala muJelusalemu nimunjila kumilyango eeyi. ²¹ Jehova waamba eechi: ''Muchenjele nkaambo kabuumi bwanu alimwi mutakabwezi mukuli mubuzuba bwaSabata kukweeta kumilyango yaJelusalemu. ²² Mutakeeti mukuli kuzwa kung'anda mubuzuba bwaSabata. Mutachiti kufumbwa mulimu, pesi mukabambe izuba lyaSabata, mbuli mbundakalayilila basikale banu kuti bachite.''' ²³ Tensi bandiswiilila na kundimvwa, pesi bayayumya mikosi yabo kuti batandimvwi na kuntambulalulayo lwangu. ²⁴ Ziyochitika kuti na mwandiswiilila chakasimpe - ooku nkwaamba kwaJehova - akutayeta mukuli kumilyango yamunzi ooyu mubuzuba bwaSabata pesi anikuti mubambe buzuba bwaSabata kuliJehova akutachita mulimu mubuzuba oobo, ²⁵ mpawo baami, bana babaami, alimwi abaabo bakkala aachuuno chabwaami bwaDeviti bayooza kumilyango yachisi munkalaki amabbiza, bo abazululi babo, baalumi baJuda abaabo bakkala muJelusalemu, alimwi muunzi ooyu uyokkalwa kwalyoonse. ²⁶ Bayoosika kuzwa kuzisi zyaJuda alimwi akuzwa kuli zizyungulukide Jelusalemu, kuzwa kunyika yaBbenjamini amumakuti, kuzwa muzilundu amuNegevu, kabeeta zipo zyakutenta azipayizyo, zipo zyazilyo atununkilizyo, zipo zyakulumba kung'anda yaJehova. ²⁷ Pesi kuti temwandiswiilizya - kukubamba zuba lyaSabata akutabweza mikuli milemu akutanjila milyango yaJelusalemu mubuzuba bwaSabata - mpawo ndiyoyasya mulilo mumilyango yawo, alimwi uyosyukuta zikwabilizyo zyaJelusalemu, alimwi tukoyozimwa pe.''