¹ Mpawo ijwi lyaJehova lyakaza kulindime, kaliti, ² ''Utalibwezeli mukayintu alimwi utalibedi abana balombe na basimbi mubusena oobo. ³ Nkaambo Jehova waamba eechi kubana balombe abasimbi bazyalwa mubusena oobu, kumanyina babatumbika, alimwi kumawisi bakabachita kuti bazyalwe munyika eeyi, ⁴ Bayoofwa amfwida zyamalwazi. Tabakoyoolilwa na kuwikwa. Banoli mbuli mafumba aatala lyanyika.' ⁵ Nkaambo ijwi lyaJehova lyakaza kulindime, kaliti, 'Utanjili mmung'anda muli kulila. Utayinki kukulila na kukutondezya luzyalo kulimbabo, nkaambo ndakagwisya luumuno lwangu kuzwa kubantu aaba - ooku nkwaamba kwaJehova - alimwi luyando lwangu lwiimvwi nji alimwi abuuya. ⁶ Boonse bapati abaniini bayoofwa munyika eeyi, tabakoyoovwika alimwi takwe utakabalile pe nikuba kuligonka na kunyoola mitwe nkaambo kabo. ⁷ Takwe utakaabe nichiba chakulya mukulila kukubuumbulizya nkaambo kemfwida, alimwimtakwe utakape nkoemki yuumbuluzya kuliwisi na banyina kuti buumbulizigwe. ⁸ Utakiinki kung'anda yapobwe kukukkala ambabokuti ukalye na kunywa.' ⁹ Nkaambo Jehova wamakamu, Leza waIzilayeli, waamba eechi, 'Bona, kunembo lyamenso, mumazuba aako alimwi mubusena oobu, ndaamba kubika mamanino kumusindo wakubotelwa alimwi akumusindo wakusekelela, musindo wasibwiinga alimwi amusindo wanabwiinga. ¹⁰ Mpawo chiyochitika kutiuyowamba woonse mulumbe uuya kubantu aaba, alimwi balowamba kulinduwe, 'Nkaambonzi Jehova nalaya loonse oolu lunyonyooko lupati aatala lyesu? Niinzi mulandu achibi chesu nchitwakabisya kuli Jehova Leza wesu?' ¹¹ Aboobo kowamba kulimbabo, 'Nkaambo basikale bako bakandisiya - ooku nkwaamba kwaJehova - alimwi bakatobela bamwi baLeza alimwi bakakomba bakotama aansi kulimbabo. Bakandisiya alimwi tababambide mulawu wangu. ¹² Pesi inywe lwenu mwandeetela kutalulama kwiingi kwiinda basinsiku benu, nkaambo mubone, awumwi muntu uyobweenda anchiki zyamoyo wakwe uutaluleme; takwe uuswiilila kulindime. ¹³ Nkinkaako njomusowa kuzwa munyika eeyi njimwatakaziba, kutali ndinywe na basikale benu, alimwi muyokomba bamwi baleza nkukooko sikati amansiku, nkaambo nsikoyoopa nichiba choolwe kulindinywe.' ¹⁴ Aboobo, langa, mazuba ayobuza - ooku nkwaamba kwaJehova - chiindi nikutakabule kwaamba kuti, 'Mbuli Jehova mbapona, ooyo wakeeta bantu baIzilayeli kuzwa kunyika yaIjipiti.' ¹⁵ pesi, ''Mbuli Jehova mbapona, wakeeta bantu baIzilayeli kuzwa kunyika yakunyika alimwi kuzwa kumanyika nkwakabamwayide.' Nkaambo njoobaboozya kunyika njindakapa basinsiku babo. ¹⁶ Langa! Ndayita balobi biingi - ooku nkwaamba kwaJehova - kuti bakalobe bantu. Kuzwa kuli eechi njoyita bavwimi biingi kuti bakabavwimine aakati kazilundu atulundu twiingi, alimwi amumpako zyamabwe. ¹⁷ Nkaambo linso lyangu lili aatala anzila zyabo zyoonse; tabakonzyi kusiswa kuzwa kunembo lyangu. Milandu yabo tiikonzyi kusisigwa kuzwa kunembo lyamenso aangu. ¹⁸ Njotalika kubweedezya zyiindulwidwe tubili nkaambo kamilandu yabo alimwi achibi nkaambo kakusofwaazya kwabo nyika yangu amitunta yazikozyanio zyabo zisesemya, alimwi akuzuzya lukono lwangu azikozyanio zyabo zisesemya.'' ¹⁹ Jehova, ulimanguzu aangu alimwi mayubilo aangu, busena bwangu bwakuchijila mubuzuba bwakupenga. Manyika ayoyinka kulinduwe kuzwa kumagozyo aanyika alimwi balaamba, ''Simpe basinsiku besu bakakona lweeno. Takwe nchibalaacho pe; takwe mpindu mulimbabo. ²⁰ Sena bantu balalichitila baleza? Pesi tabali baleza.'' ²¹ Aboobo bona! Ndiyobachita kuti bazibe muli eechi chiindi, njobachita kuti bazibe kuboko kwangu alimwi amanguzu aangu, kuti bazibe kuti Jehova ndizina lyangu.