¹ Mpawo wakati kulindime, ''Nikuba kuti Mozesi na Samiyele waliimvwi kunembo lyangu, tendalikukonzya kale pe kubafwida luzyalo bantu aaba. Bagwisye kuzwa kunembo lyangu kuti beende. ² Kuyochitika kuti bakaambe kuti kulinduwe, 'Tuye kuli?' Mpawo uleelede kubaambila kuti, 'Jehova waamba eechi: Aabo balufu beelede kuya kulufu; aabo bepanga beelede kuya kupanga. Aabo benzala mpati beelede kwiinka kunzala mpati; alimwi aabo babuzike beelede kuya kubuzike.' ³ Nkaambo ndiyobatuma munkamu zyone - ooku nkwaamba kwaJehova - panga kukujaya bamwi, bankala kukukwela bamwi, bayuni bakujulu abanyama bamusokwe banyika kukusyukuta akunyonyoona bamwi. ⁴ Ndiyobachita chintu chiyoosya kumaami woonse , aamunyika akaambo kanzyakachita Manase mwana mulombe waHezekkiya, Mwami waJuda, muJelusalemu. ⁵ Nkaambo ngwani utakakufwide luzyalo, Jelusalemu? Ngwani uyokweetelela? ⁶ Wandisiya - ooku nkwaamba kwaJehova - wabweeda kuzwa kulindime. Aboobo ndiyokuuma ajanza lyangu akukunyonyoona. Ndakatala kukufwida luse. ⁷ Aboobo ndiyobapupulula achipupuluzyo kumilyango yanyika. Ndiyobajaya. Ndiyonyonyoona bantu bangu mukuti tabapiluki kuzwa kunzila zyabo. ⁸ Njoochita bamukabafu babo kuti bakavule kwiinda muse wamunkomwe yalwizi. Sikati ndiyotuma bajayi kumakayintu aabaalumi baniini. Ndiyobatilimuna alimwi ndiyochita kuyoowa kuti kuti kukabawide chakufwambaana. ⁹ Mwanakazi uuzyede bana bali musanu ababili bayosowegwa. Uyowizuuka. Zuba lyakwe liyobbila kakuchili sikati. Uyowusa akufwisigwa nsoni, nkaambo ndiyoopa aabo basyaala kupanga kunembo lyabasinkondonyina - ooku nkwaamba kwaJehova.'' ¹⁰ Maawe kulindime, baama bangu! Nkaambo mwakandizyala, mebo ndemuntu wakukachilana akukazyania munyika yoonse. Tendakacheneka, na kucheneka umwi muntu, pesi boonse balandituka. ¹¹ Jehova wakati: ''Sena nsikoyokuvuna lyoonse? Nchobeni ndiyochita basinkondonyokwe kuti bakakumbile kugwasigwa muchiindi chamalwazi amapenzi. ¹² Sena kujana umwi wakwamuna butale? Butale buyandisi buzwa kulubazu lwakunyika oobo buswaanizigilwe amukuba? ¹³ Buvubi ambono zyanu ndiyozipa basinkondonyokwe mbuli kusaala kutakwe muulo. Ndizoyizichita eezi akaambo kazibi zyanu zyoonse nzimwakachita kumigaano yanu yoonse. ¹⁴ Mpawo ndiyochita kuti mukabelekele basinkondonyokwe munyika eeyo njimutazi pe, nkaambo mulilo uyonamatila, ukakutulwe mubukali bwakuyoosya kwangu.'' ¹⁵ Jehova, ulizi! Kondiyeeya akundigwasya. Ndibozezya mpindu aatala lyababo bandipenzya. Ulakakatila, pesi utabazumizyi pe kuti banditande; ziba kuti ndilapenzegwa akaambo kako. ¹⁶ Majwi aako ajanwa, alimwi ndakaalya. Majwi aako aba lukondo akubotezya moyo wangu, nkaambo ndabweza zina lyako, Jehova, Leza wamakamu. ¹⁷ Tendakakkala pe aakati kabaabo basekelela na kukondelelwa. Ndakalipambula akaambo kajaanza lyako lili aanguzu, nkaambo wakandizuzya bukali. ¹⁸ Nkaambonzi machise aangu ayinkilila aanembo achilonda changu tachisilikikipe, chilakaka kupona? Sena ulandibeda mbuli maanzi aalweeno, maanzi aayo aayuminina? ¹⁹ Nkinkaako Jehova wakaamba eechi, ''Na wasanduka, Jelemiya, mpawo ndiyokuchitulula, alimwi uyoyimikila kunembo lyangu akundibelekela. Nkaambo na wapambula zintu zyabufubafuba kuzwa kuzintu loko ziyandisi, uyooba mbuli mulomo wangu. Bantu bayoboola kulinduwe, pesi webo toyelede kubweeda kulimbabo pe. ²⁰ Ndiyokuchita mbuli bulambo bwamundalila butanjiliki pe kubantu aaba, alimwi bayobusya nkondo aatala anduwe. Pesi tabakoyokuzunda pe, nkaambo ndili ayebo kukukuunununa akukuvuna - ooku nkwaamba kwaJehova - ²¹ nkaambo ndiyokuvuna kuzwa kujaanza lyasizibi akukuunununa kuzwa kujaanza lyamudyaamizi.''