¹ Eeli ndijwi lyaJehova lyakasika kuliJelemiya aatala amakani enzala, ² ''Muleke Juda alile; milyango yakwe isansaane. Balikulilila nyika; kulilila Jelusalemu kwabo kuyobwiinkilila anembo. ³ Basilutwe balatuma babelesi babo kuyoteka manzi. Eelyo nibayooya kutulonga tabakoyojana manzi pe. Bayoboola boonse kabatakwe pe; bayosisa mitwe yabo mumawuse aakutalemekwa. ⁴ Akaambo kacheechi nyika ilaandukide, nkaambo takwe mvula munyika. Basikulima bafwa nsoni alimwi balalivumba mitwe. ⁵ Nkaambo insya ilasiya kana kayo mumuunda akukasiila aato, nkaambo takwe masokwe. ⁶ Imbongolo zyamulusaka zilayimikila aantundubwi yantandabale akufwetuuka muluuwo mbuli bamwaaba. Menso aazyo taabeleki nkaambo takwe masokwe.'' ⁷ Nikuba milandu yesu ipe bukamboni aatala andiswe, Jehova uyooba azina lyakwe. Nkaambo nchito zyesu zitakwe lusyomo zyavula; twakakubisizya. ⁸ Nduwe Bulangilii bwaIzilayeli, ooyo uumuvuma muchiindi chakutyompwa, nkaambonzi noyooba mbuli muzwakule munyika, mbuli mweenzu nalyeenda uutola busiku bomwe? ⁹ Nkaambonzi noli mbuli muntu uugambide, na mbuli silumamba utakwe manguzu aakufutula? Uli aakati kesu, Jehova, alimwi zina lyakwe lilayitwa aatala aswebo. Utatusiyi! ¹⁰ Jehova waamba echi kubantu aaba: ''Mbuli kuti bayanda kutuntulika, tabakasyi mawulu aabo kukuchita oobo.'' Jehova taboteledwe pe ambabo. Lino ulayibulukwa zibi zyabo. Alimwi wabapa chisubulo. ¹¹ Jehova wakati kulindime, ''Utakombeli bubotu kwiimikilila bantu aaba. ¹² Nkaambo nibayolyiimya kulya, nsikoyoswiilila kulila kwabo, alimwi na bapa zipo zyabo zyakutenta azyakulya, nsikoyobotelwa pe mulinzizyo. Nkaambo ndiyobamaninsya apanga, nzala amalwazi.'' ¹³ Mpawo ndakati, ''O Mwami Jehova! Bona! Basinismi balikuti kubantu, 'Tamukoyolibona panga, takukoyoba nzala pe kulindinywe, nkaambo ndiyomupa lukwabililo lwini mubusena oobu.''' ¹⁴ Jehova wakati kulindime, ''Basinsimi basinsima mabejo muzina lyangu. Tendakabatuma pe, nikuba kubalayilila na kwambuula kulimbabo. Pesi zilengano zyakubeja zitagwasyi, kwaamba kwakubeja kuzwa mumayeeyelo aabo nzizyo nzibalikusinsima kulindinywe.'' ¹⁵ Nkinkaako Jehova wati kulindime, ''Aatala abasinsimi balikusinsima muzina lyangu aabo mbindakatatuma pe - aabo baamba kuti takukoyooba panga pe na nzala mpati munyika iino: Basinsimi aaba bayojayigwa eepanga enzala mpati. ¹⁶ Mpawo kubantu mbibakasinsimila bayosowelwa mumigwagwa yaJelusalemu akaambo kenzala mpati epanga, nkaambo takukoyooba naba womwe uutakabavwike - bo, makayintu aabo, bana babo balombe, na bana babo basimbi - nkaambo ndiyotila bubi bwabo aalimbabo. ¹⁷ Kaambe jwi eeli kulimbabo: 'Leka menso angu azwe misozi, mansiku asikati. Utakazumizyi kuti akaleke, nkaambo kuyooba kuwa kupati kwanakalindu mwana musimbi wabantu bangu - chilonda chipati chitasilikiki. ¹⁸ Na ndaya kumuunda, mbabo bakajayigwa epanga! Na ndaza kumyuunzi, nkukuli malwazi aachitwa eenzala. Boonse musinsimi amupayizi bayotuntuuka munyika, alimwi tabazizi pe.''' ¹⁹ Sena Juda wamukakila aato? Ulamusula naZiyoni? Nkaambonzi noyotupenzya eelyo aawo nkakutakwe kuponesegwa kwesu? Twakalangililide luumuno, pesi takwe chakali chibotu pe - alimwi chiindi chakuponesegwa, pesi bona, kuli kuyosegwa luzutu. ²⁰ Tulazumina, Jehova, milandu yesu, kubisya kwabasikale besu, nkaambo twakubisizya. ²¹ Utatukaki! Kuchitila zina lyako, utachiti chuuno chako chabwaami chisesyo. Yeeya alimwi utatyoli chizuminano chako andiswe. ²² Sena zileza zitagwasyi zyamanyika zileeta mvula? Na majulu lwawo kujana awisya lunywaanywa na? Tensi nduwe na, Jehova Leza wesu? Tulindilide kulinduwe, nkaambo nduwe uuchita zyoonse zintu eezi.