¹ Jehova wakaamba eechi kulindime, ''Koya ukawule mulembo wakunsi agubo ubike aatala uzwaate muchikungu chako, pesi utasanguni kuchibika mumanzi pe.'' ² Aboobo ndakawula mulembo wakunsi agubo mbuli Jehova mbakandilayilila, alimwi ndakawubika aajula kawuzyunguluka chikungu. ³ Mpawo jwi lyaJehova lyakasika kulindime lwabili kaliti, ⁴ ''Bweza chisamo chakunsi eecho nchiwakawula chili muchikungu chako, nyampuka alimwi wiinke kuPelati. Uchisise nkukooko mumpako yebbwe.'' ⁵ Aboobo ndakayinka alimwi ndaakuchisisa muPelati, mbuli Jehova mbakali wandilayilila. ⁶ Nikwakiinda mazuba miingi, Jehova wakati kulindime, ''Nyampuka ubweede kuPelati. Kabweze chisamo nchindakatedi uchisise.'' ⁷ Aboobo ndakabweeda kuPelati alimwi daakusya akugwisya chisamo ooko nkundakachisiside, alimwi amubone, chakali chanyonyooka akubula mulimu lyoonse. ⁸ Mpawo jwi lyaJehova lyakasika kulindime, lyakati, ⁹ ''Jehova waamba eechi: Munzila iikozyenie ndiyonyonyoona bufubafuba bwaJuda aJelusalemu. ¹⁰ Aaba bantu babi bakaka kuswiilila jwio lyangu, beenda kabatobela bamwi baleza kuyobakomba akuyobavundamina - bayooba mbuli chizwaato eechi chakunsi chibotu kachitakwe mulimu. ¹¹ Mbuli ntako mbiijatilila kutusolo twamuntu, aboobo ndachita yoonse ng'anda yaIzilayeli ang'anda yaJuda kuti bajatilile kulindime - ooku nkwaamba kwaJehova - kuti bakabe bantu bangu, kuyondetela mpuwo, bulubu abulemu. Pesi tebakandiswiilila pe. ¹² Aboob weelede kwaamnba ijwi eeli kulimbabo, 'Jehova, Leza waIzilayeli waamba eechi: Zyoonse nkomeki ziyozuzigwa wayini.' Bayowamba kuti kulinduwe, 'Sena tatuzi na nchobeni kuti zyoonse nkomeki ziyozuzigwa wayini?' ¹³ Aboobo tedi kulimbabo, 'Jehova waamba eechi: Ndaamba kubazuzya bukolwi boonse bakkala munyika eeyi, Bami bakkala aachuuno chaDeviti chabwami, bapayizi, basinsimi aboonse bakkala muJelusalemu. ¹⁴ Mpawo ndiyowumputisyania bantu wumwi kuli wumwi, mataata abana aantomwe - ooku nkwaamba kwaJehova - nsikoyobafwida luse na luzyalo, alimwi nsikoyobavuna kulunyonyooko.''' ¹⁵ Amuswiilile akuchenjeka matwi. Mutalisumpuli pe nkaambo Jehova wambuula. ¹⁶ Amupe bulemu kuliJehova Leza wanu nkatanayeta mudima, alimwi katanachita mawulu enu kuti alebwe aajulu lyazilundu nikuvwindaana. Nkaambo mulangilila mumuni, pesi uyowusandula akuchita cheenzule chilamfu amudima uusiya mbi, kuba joba lisiya. ¹⁷ Aboobo na temwaswiilila, ndiyolila andike akaambo kakulisumpulwa kwanu. Nchobeni menso angu ayolila alimwi misozi iyoyenda, nkaambo lutanga lwaJehova lwatolwa buzike. ¹⁸ ''Amukatedi kumwami akuli banyina mwami, 'Amuseluke muze aansi kuzwa kuzyuuno zyanu zyabwami, nkaambo misini yenu yaloka kuzwa aamitwe yanu.' ¹⁹ Zisi muNegevi ziyojalwa, kakutakwe ukonzya kuzijula. Juda woonse uyotolwa mubuzike. ²⁰ Nyampula menso ako akulanga aabo bayobuza kuzwa kuMusanza. Bulikuli butanga mbwakakupa, butanga bwakali bubotu loko kulinduwe? ²¹ Uyotyeni aawo noyojana kuti Leza wachita bantu mbuwakayisya kuba bayandwi bako, nkali wabachita kuti babe basilutwe bako? Sena aaya teematalikilo aamachise aakuzyala na aayokujata mbuli mukayintu uulikutumbuka mwana? ²² Mpawo ulakonzya kwaamba kuti mumoyo wako, 'Nkaambonzi zintu eezi nizilikuchitika kulindime?' Ziyooba zyabwiingi bwazibi zyako kuti zikketi zyao zyavumbulwa alimwi wasampawulwa. ²³ Kujana bantu baKkusyi basanduka chikanda chabo na, na siluwe kusandula busaasa bwakwe? Na kakuli boobo, mpawo iwe ayebo, nikuba wakazibila bubi, mulakonzya kuchita bubotu. ²⁴ Aboobo ndiyobamwayisya mbuli buungu buzimaana muluuwo lwamunkanda. ²⁵ Eechi nchicho nchindakapa kulindinywe, chibela nchindakamubikila - ooku nkwaamba kwaJehova - akaambo kakuti mwakandiluba alimwi mwakasyoma lweeno. ²⁶ Aboobo andime ndiyokusamununa zisamo zyako, alimwi chinswe chako chiyobonwa. ²⁷ Ndibwene mamambe aako abubi bwako, bubi bwabusangu bwako muzilundu amumyuunda, alimwi ndabona zisesemyo zyako! Maawe kulinduwe, Jelusalemu! Kuyooba chiindi chilamfu biyeni nkotanasalazigwa lubo?''