¹ Abbimeleki mwana mulombe wa Jelubbu Bbaala wakaya kunzubo zyabanyina bamukowa wampuli yabanyina, ² ''Weenche uwambe oobu, kuti bazulwidi boonse bamu Syekkemu bamvwe, 'Ncheechi chibotu kuli ndinywe?'Kuti bana balombe boonse bali makkumi musanu aabili ba Jelubbu Bbaala bamwendelezye, naa kuti uumwi amwendelezye?' Amuyeeye kuti mebo ndili wafuwa lyanu anyama yanu.'' ³ Basiminzyaabo bakamwimikilila mukwaambula abazulwidi ba Syekkemu, mpawo bakazumina kutobela Abbimeleki, nkambo mbubakaamba kuti, mukulana wesu.'' ⁴ Bakamupa mali ansiliva alimakkumi musanu aabili kuzwa kung'anda ya Bbaala-Bbeliti, mpawo Abbimeleki wakabelesya nsiliva kukuliya bantu babuyo abatagwasyi bakeenda anguwe. ⁵ Abbimeleki wakaya kung'anda yawisi iliku Ofila, mpawo bbwe limwi ndyakajazya bakulana bakwe bali makkumi musanu aabili, bana balombe ba Jelubbu Bbaala. Kwakachaala Jotamu luzutu, munini wabana balombe ba Jelubbu Bbaala, nkambo wali yanika. ⁶ Bazulwidi boonse baku Syekkemu aba Bbeti Milo bakabungana antoomwe akuya kuyobikka Abbimeleki bwami, kumbali amusikili uli afwifwi amusemu ulimu Syekkemu. ⁷ Eelyo Jotamu nakambilwa aatala azeezi, wakatanta wakwiima atala achilundu cha Gelizimu. Wakoompolola akwaamba kuti kuli mbabo, ''Amundiswilile, nobazulwidi baSyekkemu, kuti Leza akamuswilizye. ⁸ Chimwi chiindi minsamu yakaya kuyolinanikila mwami, Nkambo bakaamba kuti kumusamu wamu Olifa, 'Twendelezye.' ⁹ Pesi musamu wamu Olifa wakamba kuti kuli mbabo, ''Ngandilasiya nzindilazyo, eezyo nzibalemya baleza abantu, kukwendelezya misamu iimwi?' ¹⁰ Misamu yakaamba kuti kumukuyu, 'Koza mpawo utwendelezye. ¹¹ Pesi mukuyu wakamba kuti kuli njiyo, 'Ngandilapa bunone bwangu amuchelo wangu mubotu, kuti ndibwede akuyoyendelezya iimwi misamu?' ¹² Misamu yakaamba kuti kumusansa, 'Koza utwendelezye.' ¹³ Musansa wakaamba kuti kuli njiyo ndileke wayini wangu mupya, oyo ubotezya baleza abantu, mpawo ubwede akuyoyendelezya misamu iimbi?' ¹⁴ Mpawo wakaamba kuti kumisamu yoonse kamumvwa, 'koza mpawo utwendelezye.' ¹⁵ Muumvwa wakaamba kuti kuminsamu, 'naa nkasimpe kuti uyanda kuti undinanike mbuli mwami wanu, eelyo koza akujana lukwabililo aansi amunzwide wangu. Na tembubo, eelyo lekela mulilo uzwe kumumvwa akuumpa musida wa Lebbanoni? ¹⁶ Nkinkaako lino, na mwakachita mukasimpe amubusyomesi, nimwakachita kabotu atala Jelibbu Bbaala ang'anda yakwe, alimwi naa mwakamusubula mbuli mbwelede-- ¹⁷ alimwi akuyeeya kuti taata wakamulwanina, kupeda buumi bwakwe, mpawo wakamuvuna kuzwa mujanza lyaba Midiyani -- ¹⁸ pesi sunu mwabukila ng'anda yataata akujaya bana bakwe balombe, bantu bali makumi alimusanu aabili, abbwe limwi. Mpawo mwachita Abbimeleki mwana mulombe wamulanda wakwe mwanakazi, mwami ataala abendelezi ba Syekkemu, nambo ngwaluzubo lwanu. ¹⁹ Naa mwakachita zyanchoonzyo abululami a Jelubbu Bbaala ang'anda yakwe, eelyo mwelede kukondwa muli Abbimeleki, alimwi amumuleke alakwe akondwe muli ndinywe. ²⁰ Pesi na tembubo lekela mulilo uzwe kuli Abbimeleki akuumpa bantu baSyekkemu a Bbeti Milo. Leka mulilo uzwe kuzwa kubantu ba Syekkemu a Bbeti Milo, kuti wuumpe Abbimeleki.'' ²¹ Jotamu wakaloboka wachija, waya ku Bbeli wakakkala nkuko nkambo kwakali kuule a Abbimeleki, mukulana wakwe. ²² Abbimeleki wakeendelezya Izilayeli kwamyaaka iitatu. ²³ Leza wakatuma muuya mubi aakkati ka Abbimeleki abazulwidi ba Syekkemu. Bazulwidi ba Syekkemu bakakuuzya kusyomeka nkubakalako a Abbimeleki. ²⁴ Leza wakachita eechi kuti lupyopyongano lwakachitwa kubana balombe bali makkumi alimusanu aabili ba Jelubbi Bbaala lubwedezegwe, alimwi Abbimeleki mukulana wabo apegwe mulandu wakubajaya abalumi ba Syekkemu babe amulandu nkambo bakamugwasizya kujaya bakulana bakwe. ²⁵ Aboobo bendelezi ba Syekkemu bakamubikkila bantu mukulindila atala atulundu, kuti bamuyubilile, mpawo bakabbida boonse bakali kwinda munzila eeyo. Eechi chakambilizigwa kuli Abbimeleki. ²⁶ Galu mwana mulombe wa Ebbedi wakaza anzubo zyakwe akwindilila ku Syekkemu. Bazulwidi ba Syekkemu bakali alusyomo muli nguwe. ²⁷ Bakiinka mumunda kuyobungika bulotwe kuzwa kumunda wamasansa, alimwi bakalyatawula. Bakachita pobwe mung'anda yaleza wabo, ooko nkubakalya akunywa, alimwi bakatuka Abbimeleki. ²⁸ Gaalu mwana mulombe wa Ebbedi, wakamba, ''Ngwani utegwa Abbimeleki, alimwi ngwani utegwa Syekkemu, zyakuti tukutawukile nguwe? Sena talimwana mulombe wa Jelubbu Bbaala? Sena Zebbuli tali mungambela wakwe? Kutawukila bantu ba Hamali, wisi wa Syekkemu! Nkambonzi nituta kutawukile Abbimeleki? ²⁹ Chalikundibotela kuti bantu bakwe babe munsi anguzu zyangu! Mpawo ndikagwisye Abbimeleki. Ndiyowamba kuti kuli Abbimeleki yita Impi yako yoonse.''' ³⁰ Kuchiindi Zebbuli, mungambela wamuunzi, nakaamvwa majwi a Gaalu mwana mulombe wa Ebbedi lunyemo lwakabuka. ³¹ Wakatuma batumwa kuli Abbimeleki kuti bakeene, akwaamba kuti, ''Bona, Galu mwana mulombe wa Ebbedi anzubo zyakwe bazobuza ku Syekkemu, alimwi banokuyunga muunzi kuti bakulwisye. ³² Lino, buka mansiku abasilumamba mbolabo, ukabambie kuyuba mumyuunda. ³³ Eelyo kuchifumo, kufumbwa kuti zuba lyaba mujulu, mubuke chifumo akunjilila munzi. Natamubukile abantu mbalabo, mukachite kufumbwa nchimukonzya kuli mbabo.'' ³⁴ Aboobo Abbimeleki wakabuka mansiku, lwakwe abantu boonse mbakalabo, alimwi bakayuba Syekkemu muzibunga zyoone. ³⁵ Galu mwana mulombe wa Ebbedi wakazwa mumanjililo amulyango wamunzi. Abbimeleki abantu mbakali aabo bakazwa kubusena bwabo bakuyuba. ³⁶ Eelyo Galu nakabona bantu, wakaamba kuti kuli Zebbuli, ''Bona, bantu bazobuza kabaseluka kuzwa mukalundu!'' Zebbuli wakaamba kuti kuli nguwe, ''Ulokubona minzinzimwa atulundu kibanga mbuli bantu.'' ³⁷ Galu wakaambula lubo akwaamba kuti, ''Langa, mbantu bayobuseluka akkati kanyika, alimwi chimwi chibunga chino kuza anzila yamusamu mu Okki wabasondi.'' ³⁸ Mpawo Zebbuli wakaamba kuti kuli nguwe, ''Alikuli majwi aako akulisumpula lino, lwako wakaamba kuti, ''Ngwani Abbimeleki ooyo ngotutakutawukile?'Sena aba tembibantu mbowakasampawula? Muzwe lino mpawo mukabamaninsye.'' ³⁹ Galu wakazwa mpawo wakali kuzulwida bantu ba Syekkemu, alimwi wakalwania Abbimeleki. ⁴⁰ Abbimeleki wakamutanda, mpawo Galu wakachija. Banji bakaba azilonda ziyoosya kunembo lyamanjililo amulyango wamunzi. ⁴¹ Abbimeleki wakakkala mu Aluma. Zebbuli wakakatizya Galu anzubo zyakwe kuzwa muSyekkemu. ⁴² Mubuzuba butobela bantu baSyekkemu bakazwa mumunda, alimwi eechi chakazibisigwa kuli Abbimeleki. ⁴³ Wakabweza bantu bakwe, wakabikka mubunga tutatu alimwi bakayuba mumyuda. Wakalanga akubona bantu kabazwa mumunzi akubalwisya mpawo wakabajaya. ⁴⁴ Abbimeleki ankamu nzyakali aazyo bakalwisya akusinka manjililo kumulyango wamunzi. Zimwi nkamu zibili zyakalwisya boonse bakali mumuunda akubajaya. ⁴⁵ Abbimeleki wakalwisya munzi abuzuba boonse obo. Wakuubweza muunzi, alimwi wakajaya bantu aabo bakali mulinguwo. Wakakolomweda aansi bulambo bwamunzi akumwaya munyo atala lyawo. ⁴⁶ Bazulwidi boonse bakasanza ka Syekkemu nibakachimvwa bakanjilila basinguzu bang'anda ya Eli-Bbeliti. ⁴⁷ Abbimeleki wakaambilwa kuti bazulwidi boonse babungana antoomwe kukasanza ka Syekkemu. ⁴⁸ Abbimeleki wakatanta atala achilundu Zalumoni, webo abantu boonse ambakali aabo. Abbimeleki wakabweza kaleba mpawo watema mitabi. Wakazibikka akkuko lyakwe alimwi wakaambila bantu mbakali aabo kuti, 'Nzimwabona nkandichita mufwambane akuzichita mbuli mbundachita.'' ⁴⁹ Aboobo woonse wakatema mitabi akutobela Abbimeleki. Bakazibunganisya kubulambo bwa Kasanza, mpawo akuumpa amulilo, kuti bantu boonse bakasanza ka Syekkemu abalabo bafwe, baalumi batikabe chuulu abanakazi. ⁵⁰ Eelyo Abbimeleki wakaya ku Tebbezi, mpawo wakazyunguluka atala a Tebbezi akwijata. ⁵¹ Pesi kwakali kasanza kasimide mumunzi, alimwi baalumi abanakazi abazulwidi boonse bamuunzi bakachijila kuli nkako akuyolijalila mukati. Eelyo bakatanta kukaluli kakasanza. ⁵² Abbimeleki wakaya kukasanza akuyokalwisya mpawo wakasika afwifwi amulyango wakasanza kuti akawumpe. ⁵³ Pesi mwanakazi wakalosya mwana wankando waziyo amutwe wa Abbimeleki akupwaya kaama kakwe. ⁵⁴ Mpawo wakafwambana kwiita mulombe iwakali kunyampula zilwanisyo, alimwi wakwaamba kuti kuli nguwe, ''Somona ipanga lyako mpawo undijaye, aboobo kutabi umwi uyowamba atala andime, 'Mwanakazi wakamujaya.'''Aboobo mukubusi wakwe wakamuyasa, alimwi wakafwa. ⁵⁵ Bantu ba Izilayeli nibakabona kuti Abbimeleki wafwa, bakinka kumyunzi. ⁵⁶ Aboobo Leza wakabwedezya bubi bwa Abbimeleki oobo mbwakachita kuli wisi akujaya bakulana bakwe bali makumi musanu aabili. ⁵⁷ Leza wakachita bubi boonse bwabantu ba Syekkemu bubweede atala amitwe yabo mpawo alimbabo lutuko lwa Jotamu mwana mulombe wa Jelubbu Bbaala lwakabasikila.