¹ Bantu ba Izilayeli bakati kuli Gidiyoni, ''Niinzi eechi nchiwachita kuli ndiswe? Tewakatwiita pe niwakaya kukulwana aba Midiya.'' Eelyo bakali akukazyania kupati anguwe. ² Wakati kulimbabo, ''Niinzi iino nchindachita kutelanisya andinywe? Sena nzyakuvululwida masansa a Ifulemu talikabotu na kukwinda kutebula masansa abizidwe a Abbiyeza? ³ Leza wakapa kuzunda atala abana balombe bamwami wa Midiya - Olebbu a Zibbu! Ninzi nzindakamaninsya zinga zilendelana andinywe? Lunyemo lwabo kuli nguwe lwakafwa nakamba eezi. ⁴ Gidiyoni wakasika ku Jodani akuzubuka lwakwe abantu bali myanda yotatwe bakali anguwe . Bakali bakatala, pesi bakendelela anembo kubandilila. ⁵ Wakamba kuti kubantu ba Sakkoti, ''Inchekaka amupe zinkwa kubantu balokunditobela, nkambo bakatala, alimwi tulikwandilila Zibba a Zalumana, baami ba Midiya.'' ⁶ Mpawo bapati bakaamba kuti, ''Sena kwalino maboko a Zibba a Zalumani alimuluboko lwako? Nkambonzi nitutape zinkwa kumpi yako? ⁷ Gidiyoni wakamba kuti, ''Jehova naatupa kuzunda atala a Zibba a Zalumani ndiyo delula mibili yanu amyumvwa yamunkanda azibulo.'' ⁸ Kuzwawo wakatansya kuya ku Peniyelu akwaambula kubantu oko munzila njiyonya, pesi bantu baku Peniyelu bakamusandula mbuli bantu baku Sakkoti mbubakamusandula. ⁹ Wakambula lubo kubantu ba Peniyelu akwaamba kuti, ''Nenjosika lubo mulumuno ndiyowisya ng'anda eyi ndamfu.'' ¹⁰ Lino Zibba a Zalumani bakali mu Kkakko antomwe ampii yabo, bakali bantu batikabe zyuulu zilikkumi amusunu zyabaalumi, boonse bakachaala kumpi yachiindi yabantu bakujwe, kwakawa bantu bali 120,000 baalumi bakasomona mapanga. ¹¹ Gidiyoni wakaya kunzila njibakatola basimatente, kwinda Nobba a Jogubbeha. Wakazunda impi yabasinkondonyina, nkambo tebakali kulangilila kulwisigwa. ¹² Zebba a Zalumani wakachija, alimwi Gidiyoni mpakabatobelela, wakajata baami bobile ba Midiya-Zebba a Zalumani - alimwi akubikka impi yabo yoonse mukuyoowa. ¹³ Gidiyoni, mwana mulombe wa Jowasyi, wakajoka kuzwa kunkondo kayinda munzila ya Helesi. ¹⁴ Wakajata mukubusi waku Sakkoti akumubuzya mukubusi wakalemba aansi mazina aba ngambela bali makkumi alimusanu aabili abapati ba Sakkoti. ¹⁵ Gidiyoni wakasika kubantu ba Sakkoti akwaamba kuti, ''Mulange Zebba a Zalumana, abo mbimwakandinyakila akwamba kuti, 'Sena wamuzunda kale na Zebba a Zalumuna? Tatuzi kuti twelede kupa chinkwa kumpi zyako.''' ¹⁶ Gidiyoni wakabweza bapati bamunzi akubasubula bantu ba Sakkoti amaamvwa amunkanda achiwawa. ¹⁷ Mpawo wakawisya ng'anda ndamfu ya Peniyeli akujaya bantu bamuchisi echo. ¹⁸ Eelyo Gidiyoni wakaamba kuti kuli Zebba a Zalumuna, ''Musyobonzi wabantu mbwajaya ku Tabba?'' Bakasandula kuti, ''Mbuli mbubede, abalabo mbubakabede. Awumwi wakalanga mbuli mwana mulombe wamwami.'' ¹⁹ Gidiyoni wakamba kuti, ''Bakali bakulana bangu bana balombe babaama. Mbuli Jehova mbwali muumi, nikuli temwakabajaya, tendali kumujaya pe.'' ²⁰ Wakamba kuti kuli Jeta (mwana wakwe mutanzi), ''Buka nyampuka alimwi ubajaye!'' Pesi mukubusi takagwisya panga lyakwe nkambo wakaliyobweda, nkambo wakachili mulombe munini. ²¹ Mpawo Zebba a Zalumuna bakaamba kuti, ''Buka lwako mwini utujaye! Mbuli muntu mbwabede.'' Gidiyoni wakabuka akujaya Zebba a Zalumuna. Alimwi wakabweza minkonde yakali munsingo yankalaki zyabo. ²² Eelyo bantu ba Izilayeli bakaamba kuti kuli Gidiyoni, ''Tuzulwide webo, mwana wako m ulombe, amuzukulu wako mulombe - nkambo wakatuvuna kujanza lyaba Midiya.'' ²³ Gidiyoni wakamba kuti kuli mbabo, ''Tandikoyo mwendelezya, naba mwana wangu mulombe takoyo mwendelezya pe.Jehova uyomwendelezya nywebo.'' ²⁴ Gidiyoni wakamba kuti kuli mbabo, ''Muleke ndichite chikumbizyo chaanu, kuti umwi awumwi andipe malangu-langu kuzwa kuchisalo chakwe.'' ( ba Midiya bakajisi malangu langu angolide nkambo bakali ba Isyumayeli.) ²⁵ Bakasandula, ''Twakonda tulakupa.'' Bakayala zisani mpawo muntu awumwi wakawala malangu-langu kuzwa kuchisalo chakwe. ²⁶ Kulema kwama langu-langu ayo angolida ngaakakumbila bwakali 1,700 masyekkeli angolida. Chisalo echi chakali chakuyungizya kumunkonde, zikobela zyamusinza wanyangu zyakakonwa abaami baku Midiya, alimwi kubikkilizya anketani ezyo zyakali zyungulukide munsingo yankamela. ²⁷ Gidiyoni wakachita chibbabba kunze lya malangu-langu akuchibikka mumunzi wakwe mu Ofu alimwi ba Izilayeli boonse bakandisofwazya akuchikomba kakaba kakole kuli Gidiyoni abaabo bali mung'anda yakwe. ²⁸ Aboobo ba Midiya bakali babikwa kumbali abantu ba Izilayeli alimwi tebakabusya mitwe yabo lubo aboobo nyika yakaba aluumuno kwamyaaka ilimakkumi aane mumazuba a Gidiyoni. ²⁹ Jelubbu Bbawu, mwana mulombe wa Jowasyi wakeenda akukkala mung'anda yakwe. ³⁰ Gidiyoni wakali abana balombe bali makkumi musanu aabili bakali lunyungu lwakwe, nkambo wakali abanakazi biingi. ³¹ Asimamambe wakwe, oyo wakali mu Syekkemu wakamuzyalila alimwi mwana mulombe alimwi Gidiyoni wakamupa izina litegwa Abbimeleki. ³² Gidiyoni, mwana mulombe wa Jowasyi, wakafwa muchiimo cheelede alimwi wakazikwa mukabanda ka Jowasyi syanawisi, ku Ofula kuzyalane lya Abbiyeza. ³³ Chakachitika nkuti, mbwakafwa biyo Gidiyoni, bantu ba Izilayeli bakabweeda lubo akulisofwazya mukukomba ba Bbaalu. Bakachita Balu-Bbeliti leza wabo. ³⁴ Bantu ba Izilayeli tebakayeya kulemeka Jehova, Leza wabo wakabavuna kuzwa kulubono lwabasinkondonyina kumabazu woonse. ³⁵ Tebakabamba chizuminano chabo kung'anda ya Jelubbu Bbalu (oyo utegwa, Gidiyoni), kukubwedezya zyoonse zibotu nzyakachita mu Izilayeli.