¹ Kuzwa kuli kupopotezyania ampyopyongano aakati kenu? Tazizwidi muziyandisyo zyenu na eezyo zilwana akati kenu nobeni? ² Mulapeekezya, pesi tamukwe pe. Mulajaya akuba aabbivwe, pesi tamukonzyi kujana. Mulalwana akupopotezyania. Taakwe anchimuli aacho pe nkaambo tamukumbili. ³ Mulakumbila pesi tamujani pe nkaambo mukumbila aamoyo uutaluleme pe, kamuyanda kuti muzuzikizye ziyandisyo zyenu. ⁴ Nywebo nobasimamambe! Tamuzi na kuti buzolwani enyika nkulwana aaLeza? Nkokwaamba kuti kufumbwa ulisalila kuba mweenzinyina wanyika ulichita sinkondonyina aLeza. ⁵ Na muyeeya kuti malembe awamba zyabuyo aati, ''Muuya ngwaakachita kuti apone mulindiswe uli aabbivwe loko''? ⁶ Pesi Leza uupa luzyalo lwiingi, aboobo malembe awamba kuti, ''Leza ulabakazya balisumpula, pesi upa luzyalo kuli balibombya.'' ⁷ Nkokuti amulifwiinsye kuliLeza. Mumukake satani, alimwi ulamuchija. ⁸ Amuswene afwiifwi aLeza, alimwi uleza afwiifwi andinywe, Amusalazye maboko eenu, nywebo nobasizibi, alimwi musalazye myoyo yenu, nywebo nobasimyoyo iibili. ⁹ Mumvwe machise, mupwaye mibila, akulila ! Muchite kuti kuseka kwenu kube mawuse alimwi lukondo lwenu lube kuungumana. ¹⁰ Amulibombye kunembo lyaMwami, alimwi uyoomunyampula. ¹¹ Tamunoowambuuli chakutamikizyania, nobakwesu. Muntu waambuula bubi aatala amuzyalwanyina na kumubeteka muzyalwanyina ukazyania amulawu, alimwi ubeteka mulawu. Na wabeteka mulawu, toli simuchita mulawu pe, pesi ulimubetesi. ¹² Ngumwi biyo sikupa mulawu amubetesi. Nguwe uukonzya kufutula akujaya. Nduweni, webo noobeteka simayakilanenyokwe? ¹³ Muswilizye lino, nywebo nimwaamba kuti, ''sunu na juunza tuyoonjila muchisi eechi, tukakkale munyaka nkukooko, tukasambale, alimwi tukajane mpindu.'' ¹⁴ Ngwani uuzi zitakachitike juunza, alimwi buumi bwako niinzi? Nkaambo nduwe sikunkwe uuboneka kwachiindi chiniini mpawo wamwayika. ¹⁵ Anukuti, mweelede kwaamba kuti, ''Na Mwami kayanda, tulapona alimwi tuchite eechi na eechiya.'' ¹⁶ Pesi lino mulalikankayizya aatala amabambe eenu. Kulikankayizya kuli boobu koonse nkubi. ¹⁷ Nkinkaako kuli woonse uuzi kuchita kabotu pesi katazichiti, kulinguwe nchoono.