¹ Bayingi benu tababi bayiisyi pe, nobakwesu, nkaambo mulizi kuti swebo nituyiisya tuyoobetekwa zikkalikali. ² Nkaambo toonse tulalebwa munzila nyingi. Na umwi muntu katalebwi kumajwi, ooyo muntu uliluleme chakumaninina, ulakonzya kuzyotolola mubili wakwe woonse. ³ Lino na katubika nkabyo mumulomo wamabbiza kuti atutobelezye, nga twakonzya kuzyotolola mibili yawo. ⁴ Amuzibe alimwi kuti maato, nikuba kuti mapati biyeni alimwi ayenzegwa aluuwo, alayambwa ansoke niini loko kuyoosika kufumbwa nkwayanda sikwayenzya. ⁵ Munzila yomwe, lulimi nchizo chiniini loko, pesi lulalikankayizya muzintu zipati. Amubone alimwi kalilo kaniini mbukatentezya lusaka loonse. ⁶ Lulimi alulalo nkalilo, nyika yazibi ibikidwe aakati kazizo zyamibili yesu. Lulimi luninaania mubili woonse, luumpa buumi boonse, nkabela kuninaanakwalo kuzwa kugehhena. ⁷ Nkaambo woonse musyobo wamunyama wamusokwe, bayuni, ziyalalika, azyuuka zyamulwizi ziliikuvubwa alimwi zilazyotololwa abantu. ⁸ Pesi tawo pe muntu uukonzya Kuzyotolola lulimi. Mbubi butalyookezyi pe, musamu uujaya. ⁹ Andulo tulalumbayizya Mwami aTaata, alimwi andulo tulatuka bantu bakalengwa muchikozyanio aLeza. ¹⁰ Kuzwa mumulomo nguwo omwe kuzwa zilongezyo akutuka, Nobakwesu, eezi zintu tazyeelede kunoochitika pe. ¹¹ Kasawu komwe kalazwa na maanzi manono amaanzi aalweela? ¹² Mukuyu ulazya na nsikili nobakwesu? Na kuti musansa, uzyale nkuyu? Aboobo tachikonzeki pe kuti kasawu kazwa maanzi aalweela kazwe maanzi mabotu. ¹³ Ngwani musongo umvwisisisya aakati kenu? Mumuleke muntu ooyo atondeezye buumi bwakwe bubotu kwiinda kumilimu yakwe yakulibombya. ¹⁴ Pesi na kojisi bbivwe ndulwe mumoyo wako, utalikankayizyi pe akubejela kasimpe. ¹⁵ Oobu teensi mbombubo pe busongo buzwa kujulu. Anukutu mbwaansi, mbwenyama, buzwa kumyuuya mibi. ¹⁶ Nkaambo aawo aalibbivwe abusyaamuvule mwangu, kuli lupyopyongano anchito mbi. ¹⁷ Pesi busongo buzwa kujulu, lutaanzi bulasalala, alimwi mbwalumuuno, mbwabuuya, mbwamiyeeyo mibotu, buzwide lweetelelo amichelo mibotu, talusali pe alimwi ndwabwini. ¹⁸ Muchelo wabululami ulabyalwa muluumuno mukati kabaabo bachita chaluumuno.