¹ Nobakwesu, mutajatilili kulusyomo muMwami wesu Jesu Kkilisito, Mwami wabulemu, chakusaluula bamwi bantu. ² Atwaambe kuti umwi muntu wanjila mumuswaangano wako kasamide inwenwe zyangolide azisamo zibotu, mpawo kwazoonjila umwi muchete uusamide zileetombe. ³ Na walanga muntu uusamide zibotu akwaamba kuti, ''Webo kkala aawa abusena bubotu,'' pesi kuli yooyu muchete wasikuti, ''Webo kiminookiya,'' na kuti, ''Kkalaansi aawa,'' ⁴ munooli tamuliikubetekeana na mukati kanu? Tewmwaba babetesi bajisi mizeezo mibi na? ⁵ Amuswilizye nobakwesu bayandika, Leza taakasala bachete munyika kuti babe bavubi mulusyomo na alimwi kuti bazookone Bwami oobo mbwaakasyomezya kulibaabo bamuyanda ? ⁶ Pesi teemwabalemeka pe bachete! Tabeensi bavubi na bamudyamizya ? Teensi mbabo na bamukwelela kunkuta? ⁷ Tabali mbabo na batukila zina bbotu eelyo ndimwakayitwa aalyo? ⁸ Zyanchonzyo, na mwazuzikizya mulawo waMwami, wabubanakukalya, mbuli mumalembe aati, ''Mukayande basimayakilane benu mbuli mbomuliyanda lwenu,'' munooli mwachita kabotu. ⁹ Pesi na kamusaluula mbimuyanda muliikuchita chibi, alimwi muliikupegwa mulandu amulawo wakutyola mulawu. ¹⁰ Nkaambo kufumbwa muntu uulemeka mulawu woonse, pesi kalebwa muli uli aamulandu wakukutyola mulawu woonse. ¹¹ Akaambo kakuti ooyo wakati, ''Utachiti bumambi,'' nguwe lubo wakati, ''utajayi.'' Na kotachiti bumambi, pesi wajaya, unooli waba simutyola mulawu. ¹² Nkinkaako ambula akuchita mbuli baabo batazoobetekwe anzila yamulawu walwaangunuko. ¹³ Nkaambo lubeta luza kalutakwe lweetelo kulibaabo batatondeezyi lweetelelo. Lweetelelo lulaluzunda lubeta. ¹⁴ Mbubotuunzi, nobakwesu, kuti umwi muntu wati ulijisi lusyomo, pesi katakwe milimu? Oolo lusyomo lulakonzya kumuvuna na? ¹⁵ Tuteedi umwi mukwesu na muchizi tasamide zisamo zilikabotu pe alimwi takwe kulya kwabuzuba oobo. ¹⁶ Twaambe kuti umwi wenu wabaambila kuti, ''Kamuya muluumuno, mukkale mukasalilwe alimwi mukute", pesi taabapa zintu zyeelede mubili, kuli mpinduunzi? ¹⁷ Munzila yomwe njiyeeyo lusyomo alulike, na kalutakwe milimu, lulifwide. ¹⁸ Pesi umwi ukonzya kwaamba kuti, ''Uli aalusyomo, alimwi imebo ndili amilimu.'' Nditondezye lusyomo lwako kakutakwe milimu, alimwi ndilakutondeezya lusyomo lwangu kwinda mumilimu yangu. ¹⁹ Ulasyoma na kuti kuli Leza omwe; uliikuchita kabotu. Pesi ayilayo myuuya mibi ilazisyoma eezyo, mpawo iteketa chakuyoowa. ²⁰ Mulayanda na kuziba, nobaalumi bafubafuba, kuti lusyomo lutakwe milimu ndwabuyo? ²¹ Abbulahamu taata wesu taakalulamikwa amilimu na aawo naakaba mwana wakwe Ayizeki kuchipayilo? ²² Mwabona kuti lusyomo lwakabeleka antoomwe amilimu yakwe, alimwi kwiinda kumilimu yakwe lusyomo lwakwe lwakamaninina. ²³ Akazuzikizigwa malembe aawamba kuti, ''Abbulahamu wakasyoma Leza, alimwi zyakamwaambya kuti uli aabululami,'' akwaambwa kuti mweenzinyina waLeza. ²⁴ Mwabona kuti muntu waambwiidwa aamilimu yakwe, peepe alusyomo biyo. ²⁵ Munzila ikozyania, Lahabbu sibumambi teembaakalulamikwa na amilimu aawo mpaakatambula basikutumwa akubalayila kuti bayende aayimbi nzila? ²⁶ Nkaambo mbuli mubili mbuuwanzeene amuuya ulifwide, mbombubo alulalo lusyomo lwaanzeene amilimu lulifwide.