¹ Amuze lino, nywebo nimuvubide, mulile mulyeeme akaambo kamasukuusyo aatamusikile. ² Buvubi bwenu bwabola, alimwi zisamo zyenu zyavunda ankubi. ³ Ingolide ansiliva zyenu zyabbulubana alimwi bulala bwazyo bulaba bukamboni butakamukone. Buyoolya nyama yenu mbuli mulilo. Mwalondola buvubi bwenu kuchitila mazuba aakumamamnino. ⁴ Amubone, mifolo njimuliikwiima basimilimu benu aabo baliikumukwiilila. Kukwiila kwabasikutebula kwasika kumatwi aaMwami wamakamu. ⁵ Mwapona chakukkalinkana aanyika akulibotezya mulizyoonse. Myoyo yenu mwayineneesezya buzuba bwakujayigwa. ⁶ Mwapa mulandu alimwi akujaya muntu mululami. Taakwe naamulwana pe. ⁷ Nkikaako amube amoyo mulamfu nobakwesu, mane akaboole Mwami. Mubone mulimi mbalindila muchelo mubotu kuzwa munyika alimwi uli aamoyo mulamfu kukuulindila, mane do kuwa kwemvula ntaanzi ayamelelezyo. ⁸ Anywebo amukkazike myoyo yenu. Amusimye myoyo yenu nkaambo kuboola kwaMwami kwaba aafwiifwi. ⁹ Tamutongawuki, nobakwesu, chenuchenu, nkokuti tamukabetekwi. Amubone, mubetesi uliimvwi aamulyango. ¹⁰ Amujane chitondeezyo nobakwesu, kuzwa kukoomba akulansya myoyo kwabasinsimi, aabo bakaambuula muzina lyaMwami. ¹¹ Mubone, twaamba kuti aabo bakawunduuzya machise balilongezezegwe. Mwakamvwa Joobbu mbakapengaana, alimwi mulizi machitilo aaMwami, mbayetelela akutondeezya luse. ¹² Aatala aazyoonse nobakwesu, mutakonki, nikuba kwaana ejulu na nyika, na nikuba achili zwecho chikonke. Anukuti, ''Iyii'' wenu ngabe ''Iyii'' alimwi ''Peepe'' wenu abe ''Peepe,'' kuchitila kuti tamukanjili mukubetekwa. ¹³ Kuli umwi na aakati kenu uulimubuyumuyumu? Ngakombe. Kuli uli aalumwemwe na? Ngayimbe ntembawuzyo. ¹⁴ Kuli umwi uchisidwe na akati kenu? Ngayite baalu bembungano, alimwi ngabamukombele. Abamunanike mafuta muzina lyaMwami. ¹⁵ Nkombyo yalusyomo ilamuponia muntu uuchiswa, alimwi Mwami ulamubusya. Kuti kali wakachita zibi, Leza ulamulekelela. ¹⁶ Nkikaako muzumine zibi zyenu kuli umwi awumwi, alimwi mukombelane, kuchitila kuti mupone. Inkombyo yamuntu mululami ili aanguzu loko kumabelekelo aayo. ¹⁷ Elayija wakali mwaalumi mbuli ndiswe, wakakomba chamoyo woonse kuti imvula itawi, alimwi teeyakawa pe kubusena oobo kwaminyaka yotatwe amyeezi musanu awumwi. ¹⁸ Mpawo Elayija wakakomba lubo. Majulu akapa mvula, alimwi inyika yakazyala michelo yaayo. ¹⁹ Nobakwesu, na umwi aakati kenu wasweeka wazwa kukasimpe, alimwi umwi wamuboozya, ²⁰ ooyo muntu weelede kuziba kuti kufumbwa muntu uboozya sizibi kuzwa kubulewusi bwanzila yakwe uyoomuvuna kuzwa kulufu, alimwi uyoovumba mweelwe mupati wazibi.