¹ Mudima uyoogwisigwa kuzwa kuli ooyo mwanakazi wakali kupengaana kapati. Muchiindi chakumatalikilo wakasampawula inyika yaZebbuloni anyika yaNafutali, pesi muchiindi chakumamanino uyoyichita kuti ikabe aabulemu, inzila iya kulwizi, mutala aJodani Galili wazisi. ² Ibantu aabo bakeenda mumudima bakabona mumuni mupati; aabo bakapona munyika yacheenzule chalufu, mumuni wabamunikila. ³ Wakavuzya nyika; wakavuzya lukondo lwabo. Balakondwa kunembo lyako mbuli lukondo kuchiindi chakutyola, mbuli baalumi mbubakondwa nibaabana zyakusaala. ⁴ Akabmbo kejokwe lyamukuli wakwe, mungwamba aakati kamakuko aakwe, inkoli yasikumudyaamizya wayipwaya mbuli kubuzuba bwaMidiyeni. ⁵ Nkaambo zyoonse insangu zyiinda kaziyobuvuuma azikobela zivungidwe mubulowa ziyowumpwa zikabe inkuni zyamulilo. ⁶ Nkaambo kulindiswe mwana unoli wazyalwa, kulindiswe mwana mulombe wapegwa; alimwi bweendelezi bunoli kumwana wamwami waluumuno. ⁷ Kuvuzigwa kwabweendelezi bwakwe akwaluumuno taakuyoomana pe, mbuli mbwanoyendelezya achuuno chabwami bwaDeviti aajulu abwami bwakwe, kukukkazika akukwiimika chaluumuno alimwi abusalali kuzwa kuchiindi chakwe kuya kunembo alyoonse. Inguzu mpati zyaJehova wamakamu ziyoochita eezi. ⁸ Mwami wakatumizya ijwi aatalaaaJakkobbu, alimwi lyakawida aali Izilayeli. ⁹ Bantu boonse bayooziba, nikuba Ifulemu abaabo bakkede muSamaliya, aabo baamba mukulisumpula alimwi kabali aamoyo wankondo, ¹⁰ ''Zitina zyawa, pesi tuloyakulila amabwe aabezedwe; mikuyu yagonkelwaansi, pesi tuyobika misamu yasidali aabusena bwayo.'' ¹¹ Nkikaako Jehova uyobukilana aatala anguwe Lezini, Sinkondonyina, akutyoloola basinkondonyina, ¹² baAlamu kubuzwezuba abaFilisitiya kububbila. Bayoojaya Izilayeli amulomo uuwasamukide. Muzintu zyoonse eezi, bukkali bwakwe tabukoyomana pe; aboobo ijanza lyakwe zichinootandabikidwe. ¹³ Nikuba oobo tabakoyoosandukila kuli ooyo sikubawuma pe, na kuyanduula Jehova wamakamu. ¹⁴ Nkinkaako Jehova uyogonkela Izilayeli mutwe amuchila, ntabi zyatukunka amatete, muzuba lyoomwe. ¹⁵ Muzululi amwaalumi mupati mbaasilutwe; alimwi musinsimi ooyo uyisya mabejo muchila. ¹⁶ Aabo bazulwida bantu aaba babazulwida chakubasowa, aabo bazulwidwa abalabo bayoomenwa. ¹⁷ Nkinkaako mwami takoyookondelelwa aatala abakubusi baalumi na kuyofwida luzyalo bamuchaala abamukabafu, mbuli kuti woonse takwe uli aaleza pe akuba basizibi, alimwi woonse mulomo wambuula zintu zyabufubafuba. Muzintu zyoonse eezi, kunyema kwakwe takukoyomana pe; aboobo janza lyakwe lichinotandabikidwe. ¹⁸ Bubi bulayaka mbuli mulilo uutenta myuunga amaamvwa; ulawumpa nikuba saka pati eelyo libuka musumpuuluu mupati wabusi. ¹⁹ Kwindila mubukali bwaJehova wamakamu inyika ilasizigwa alimwi bantu baba mbuli nkuni zyamulilo. Takwe pe naba uumwi uugwasya mweenzinyina. ²⁰ Bayojata kulya akuboko kwakuchilisyo pesi bachinooli anzala; bayoolya chilyo akulya kwakuchimweensi pesi tabakoyookkuta pe. Umwi awumwi uyoolya nyama yakuboko kwakwe mwini. ²¹ Manase uyoopenzegwa aIfulemu, alimwi Ifulemu, Manase; alimwi aantomwe bayolwisya Juda. Mulizyoonse zintu eezi bukali bwakwe tabukoyoleka pe; nikuba oobo ijanza lyakwe lichinootandabikidwe.