¹ Maawe kulibaabo babikka twambo tutali mumulawu akulemba zitaluleme zyakupenzya. ² Balanyanzya bubotu bwabatengwaana, akubbida bachete bantu bangu zyelelo zyabo, akunyanzya bamukabafu, akuchita bamuchaala banyangwe imbono zyabo! ³ Muyochita biyeni buzuba bwalubeta bwakupyopyongania kwakusika kuzwa kule? Nkulini nkumuyojana lugwasyo, alimwi nkukuli nkumuyosiya buvubi bwanu? ⁴ Takwepe chiyosyaala, alimwi muyokotama munsi lyabajatwa na kuwa munsi lyabajayigwa. Muli zyoonse zintu eezi, Bukali bwakwe tabuna kumana pe: aboobo, ijanza lyakwe lichitandabete. ⁵ Maawe Asuliya, inkoli yabukali bwangu, musako oyo ngobwezede ndolunyemo lwangu! ⁶ Ndamutuma kukulwisya chisi chitalemeki akukulwisya bantu aabo bachitakuti njindilile kukunyema. Ndabalayilila kuti basale lusalo, akubanyanzya mbono, akuzilyatawuka mbuli matope amumigwagwa. ⁷ Pesi eezi tensinzyayeeya, natayeyi muli yeeyinzila. Zilimumoyo wakwe nkunyonyoona akugwisya zisi zyiingi loko. ⁸ Nkambo ulamba kuti, ''Tabeensi baami basilutwe bangu boonse na? ⁹ Tensi kwalinoli mbuli Kkasyemisyi? Takwensi Hamati ulimbuli Apadi? Tensikuti Samaliya ulimbuli Damasiko? ¹⁰ Mbuli jaanza lyangu lyazunda kubwami bwamituni, bwakajisi zikozyanio zyiinda Jelusalemu a Samaliya, ¹¹ mbuli mbwindakachita ku Samaliya azikozyanio zyayo, sa nsikoyochita mbubo aku Jelusalemu akuzikozyanio zyawo? ¹² Elyo mwami nakamaninsya mulimo wakwe muchilundu cha Ziyoni amu Jelusalemu, Njosubula twambo twamyoyo italemeki twabaami ba Asyiliyaakulisumpula kwabo. ¹³ Nkambo wamba kuti, ''Kwinda kunguzu zyangu akwinda kubusongo bwangu ndakachichita. Ndakamvwisisisya alimwi ndakagwisya migaano kubantu. Ndabatolela mbono zyabo, alimwi mbuli singuzu ndafwinsya basibwaami ansi. ¹⁴ Ijanza lyangu lilabuvubi, mbuli buzwa kuchitendele, buvubi bwazisi, alimwi mbuli umwi mbwabungania mayi asiidwe, Ndabungania nyika yoonse. Kaatakwe bakaputusya maboko aabo naa bakasamuna milomo yabo nanka kulila.'' ¹⁵ Ikaleba kalalikankayizya na ilwako kuliyooyo ukabelesya? Neliba isaha lilalisumpula lwalyo kwiinda yoyo uligonsya? Zilimbuli kuti inkoli ilanyampula abo bayinyampwide, nanka mbuli musako ulanyampula muntu. ¹⁶ Nkambo kako Mwami Jehova wamakamu ulatuma bulwazi akkati kababo baneneede basinkondo bakwe; alimwi kunsi abulemu bwakwe kuyooba kuyaka mbuli kwamulilo. ¹⁷ Imumuni wa Izilayeli uyooba mulilo, alimwi Bakwe ba Salali muyoba mabangabanga; ziyoyaka akutenta mamvwa aakwe akuzimana mubuzuba boomwe. ¹⁸ Jehova uyosyukuta bulemu bwalusuko lwakwe amichelo yanyika yakwe, zyoonse muuya amubili; ziyooba mbuli buumi bwamuntu uchiswa wasowelwa kule. ¹⁹ Busena busyeede minsamu yamulusaka lwakwe isyede iyoba michelo, aboobo mwana muniini ukonzya kwibala. ²⁰ Mubuzuba oobo, basyeede ba Izilayeli, luzubo lwa Jakkobo abo balobokede, tabakoyosyoma limbi kuliyooyo wakabazunda, pesi kwalyoonse bayojatilila kuli Jehova, Uusalala wa Izilayeli. ²¹ Basyede ba Jakobo balapiluka kulisinguzu Leza.. ²² Nkambo abo bantu bakwa Izilayeli, bali mbuli musele wakunkomwe yalwizi, abo luzutu basyede mbibayobweda. Lunyonyooko lwalayililwa, mbuli mbukwazulila kuyanduula bululami. ²³ Nkambo Mwami Jehova wamakamu, uyanda kubweza lunyonyooko ndwakabikila nyika yoonse. ²⁴ Akambo kaako Mwami Jehova wamakamu wati, ''Bnatu bangu bakkala mu Ziyoni, mutayoowi mu Asiliya. Uyokuuma musako akunyampwida musako, kukulwana anduwe, mbuli mbubakachita ba Ijiputi. ²⁵ Mutamuyoowi, nkambo muchiindi chifwifwi bukkali bwangu buyobamana, alunyemo lwangu luyonditola kukunyonyoona.'' ²⁶ Elyo Jehova wamakamu uyobusya mitatuuka, akati kabo, mbuli mbaakazunda ma Midiyani kumbo lya Olebbu. Uyonyampula musako wakwe atala lyalwizi akwiyimika mbuli mbwakachita mu Ijiputi. ²⁷ Mubuzuba oobo, mukuli wakwe wagwisigwa kuzwa kumakuko eenu ajokwe lyakwe kuzwa kunsingo zyanu, alimwi ijokwe liyonyonyooka nkaambo kakuneneeya. ²⁸ Sinkondoma wasika ku Ayiti akwiinda mu Migiloni; ku Mikkimasi walondola bulilu bwakwe. ²⁹ Bazubuka achito akoona ku Geebba. Lama ulakankama a Gibbiya wa Sawulo wachija. ³⁰ Wongolola, mwana musimbi wa Galimu! Swilizya, Layisya! WWebo nomu Anatoti ufwaba! ³¹ Madimena waloboka, abantu bakkede mu Gebbimu bachija akulibamba. ³² Elizuba ndilyonya ulayimikila ku Nabbi akuzunganyia janza lyachilundu musimbi wa Ziyoni, chilundu cha Jelusalemu. ³³ Amubone, Mwami Jehova wamakamu uyogonka mitabi chakuyoosya; minsamu milamfu iyogonkwa alimwi milamfu iyofwinsigwa. ³⁴ Uyogonka zisaka zyamulusaka akaleba, alimwi Lebbano ulawa mbulimbwawa singuzu.