¹ Mulasyuuka chibbuukwa kuzwa kuchisiko cha Jese, alimwi mutabi uzwa anze kuzwa kumiyanda uyozyala muchelo. ² Muuya wa Jehova uyolyokezya aalinguwe, lulayo anguzu, a Muuya wakuziba awakuyoowa Jehova. ³ Kubotelwa kwakwe kuyooba kuyoowa Mwami; takoyobeteka amenso akwe nzyabona pe, nikuba kukosola makani akwe nzyamvwa pe. ⁴ Nikuba kuti, bafwaba chakululama akuyeeya kuuluzi kulibaabo balibombya banyika. Uyowuma nyika amfunko wamulomo wakwe., akuyoya kwamulomo uyojazya basizibi. ⁵ Bululami luyoba lukumba lwamuchibuno chakwe, akusyomeka lukumba luzyunguluka chikungu chakwe. ⁶ Wumpe uyokkala antomwe amwana wambelele, alimwi siluwe uyolala ansi antomwe akana kampongo; akana kang'ombe, amwana wamulavu, alimwi mwana wang'ombe uneneede awamulavu bayolala antomwe. ⁷ Ng'ombe abbule ziyochela amwi, alimwi bana bazyo bayolala antomwe aansi. Awalo mulavu uyochela mbuli moongo wang'ombe. ⁸ Awalo mwana uyolisenia atala lyamulyungu wanzoka, amwana uchinyonka uyobikka kuboko kwakwe atala lyamulyungu wabachipile. ⁹ Tazikoyobachisa pe nikuba kunyonyoona atala lyachilundu changu chisalala choonse; nkambo nyika iyozula kuziba Jehova, mbuli maanzi mbwavumba lwizi. ¹⁰ Kuli eelyozuba, muyanda wa Jese uyoyimikila mbuli chikwankwani kubantu. Zisi ziyomulanguula, alimwi busena bwakwe bwakulyokezezya buyolemekwa. ¹¹ Kuli eelyozuba, Mwami uyotandabika bantu basyeede bakachaala mu Asiliya, Ijiputi, Patulosi, Kkusyi Elamu, Syina, Hamati, a mutusuwa twakulwizi ¹² Uyozibikila ndembela yazisi akubungania batandidwe ba Izilayeli abamwayikide ba Juda kuzwa kuzyooko zyoone zyaanyika. ¹³ Uyosandula bbivwe lya Efulemu, abusinkondo bwa Juda buyodunsulwa. Efulemu takoyomubeda abbivwe limbi pe Juda, awalo Juda tachiyobi limbi sinkondonyina kuli Efulemu pe. ¹⁴ Nikuba kuti bayosala minkuni yaba Filisitiya kujwe, alimwi bayobanyanzya bantu bakujwe. Balolwisya ba Edomu aba Mowabbu, abantu ba Amoni bayobalemeka. ¹⁵ Jehova uyomaninizya kunyonyoona inkomwe yalwizi lwa Ijiputi. Apuumina lipya uyovukuzya janza lyakwe atala lya Mulonga Efulata alimwi uhyopambukania mutulonga tuli kumawulu. ¹⁶ Kuyoba mugwagwa mupati wabantu bacheede babalobokede kuzwa ku Asiliya, mbubonya mbuli mugwagwa waba Izilayeli ngubakajana mubuzuba oobo nibakapola kuzwa kuchisi cha Ijiputi.