¹ Muuya wa Mwami Jehova ubaali ndime, nkambo Jehova wakandinanika kuti nkambawuke makani mabotu kuli bapengede mumyoyo. Wakandituma kuti ndiponie batyokede myoyo, kuti nkambawuke lwangunuko kuli baabo baangidwe. ² Wakandituma kuti nkambawuke munyaka wa Jehova waluzyalo, ibuzuba bwakubwedezya kwa Leza wesu, alimwi kuti ngumbulizye boonse balila. ³ Wakandituma -- kuti ndipe aabo balila mu Ziyoni - kuti ndibape ingala muchibaka chadyota, mafuta alukondo muchibaka chakulila, chikobela chakulumbayizya mubusena bwamuuya wabufubafuba, kubayita kumibanga yabululami, kubyala kwa Jehova, kuti alemekwe. ⁴ Bayoyakulula matongo; matongo akalekale; bayobwedezya matongo achiindi. Bayobwedezya matongo aamyunzi, imatongo kuzwa kumazyalane miingi aachindi. ⁵ Bazwakule bayoyima akusanina batanga bwako alimwi bana balombe babazwakule bayobeleka mumyunda yako ayamasansa. ⁶ Muyoyitwa kuti mulibapayizi ba Jehova; bayomwiita kuti mulibalanda ba Leza wesu. Muyolya buvubi bwamaasi, alimwi muyolidunda mubuvubi bwabo. ⁷ Muchibaka chakufwabeeme uyooba azyindulwidwe; alimwi muchibaka chakunyansigwa bayobotelwa ajulu azyabilo zyabo. Aboobo zimpanzi zyanyika zyaba ziyoyindululwa; kukondwa kutamani kuyooba kwabo. ⁸ Nkambo Mebo, Jehova, ndiyanda kwelanisya, alimwi ndasula bubbi ankondo zyabubi. ⁹ Ndiyobabwedezya chakusyomeka, alimwi ndiyochita chizuminano chitamani ambabo. Imikowa yabo iyozibinkana akati kabamasi, alimwi abana babo aakati kabantu. Boonse bayobabona bayo bazumina, kuli mbabo bantu Jehova mboo kalongezya. ¹⁰ Ndiyosekelela kapati muli Jehova; muli Leza wangu ndiyobotelwa loko. Nkaambo wandizwatika jansi lyalufutuko; wakandizwatika amukumba wabusalali, mbuli nabwiinga mbwalibotya lwakwe achikobela, alimwi mbuli nabwiinga mbwalibotya azilisakatizyo. ¹¹ Nkambo mbuuli nyika mbwimezeka zilyo, alimwi mbuli muunda chita zilyo zyawo kuti zikule mbubo mwami Jehova mbwayochita bululami akulumbayizya kumena kunembo lyabamasi woonse.