¹ ''Yiimba, webo yomwanakazi ngomwa, webo nutakwe nwakazyalide; njila mukwiimba kwalukondo akulilisya, webo nutakwe nwakali njide mukumyongwa kwakuzyala. Nkambo bana bamutakale mbaanji kwiinda bana bamwanakazi ukwetwe,'' mbwaamba Jehova. ² ''Panga tente lyako likomene akusasabula masila atente lyako aanze, chakutalichesya; lampya nsungo zyako akuyumya nkaanka zyako. ³ Nkambo uyosasabula kujanza lyachilisyo akuchimweensi, alimwi lunyungu lwako luyoozunda zisi akubambulula myunzi itakatidwe. ⁴ Utayoowi nkambo takwe pe noyofwisigwa bweeme, naaba kutyompozegwa nkambo tokoyobula choolwe; uyoluba bweeme bwabukubusi bwako akubula choolwe chakutakatwa kwako. ⁵ Nkambo mulengi wako ngomulumi wako; Jehova wamakamu ndezina lyakwe. Uusalala wa Izilayeli nguuMwaami wako; wiitwa kuti Leza wanyika yoonse. ⁶ Nkambo Jehova wakamwiita mbuli mukayintu utakatidwe akuchiswa mumuuya, mbuli mukayintu wakakwatwa bunini akutakatwa,'' mbwawamba Jehova. ⁷ ''Nkambo kwachiindi chinini ndakamusowa, pesi aluse lupati ndiyomubungania nywebo. ⁸ Mukufwasuka kwakunyema ndakasisa busyu bwangu kuzwa kulinduwe chakukuluba; pesi achizuminano chiteeli chakusyomeka ndiyoba aluse alinduwe - mbwawamba Jehova, oyo uukuvuna. ⁹ Nkaambo echi chilimbuli maanzi a Nowa kuli ndime: mbuli mbundakakonka kuti manzi a Nowa takoyoyinda aatala anyika alimbi pe, aboobo ndakonka kuti tandikoyo munyemena pe nanka kumukalalila. ¹⁰ Nikuba malundu nga alawa atulundu zikazuzume, lo luyando lwangu lutedi talukwe niluyoozwa kuli ndinywe, naaba chizuminano changu chaluumuno kuti chikazuungane - mbwawamba Jehova, ulaluse alinduwe. ¹¹ Upenzedwe, uwumidwe ampeyo awutawumbulizizgwe, langa, ndiyobika mumabwe amisyobo misyobo, alimwi kubika intalisyo zyako abbwe liyandisi. ¹² Ndiyopanga nsonge zyako abbwe lyalubbi amilyango yako yamabwe aamweka, alimwi bulambo bwako bwakunze bwamabwe meebesi. ¹³ Mpawo bana bako boonse bayoyisigwa a Jehova; alimwi luumuno lwabana bako luyooba lupati. ¹⁴ Mubululami muyoyimikwa, alimwi munoli kule kuzwa kukudyamizigwa, nkambo tamukoyoyoowa; alimwi kuzwa kuchiyoosyo, nkambo taakwe nichiyoswena afwifwi anduwe. ¹⁵ Langa, na umwi wabusya lupyopyongano, talukwe niluyozwa kuli ndime pe; kufumbwa uubusya lupyopyongano andinywe uyozundwa. ¹⁶ Bona, ndakalenga mufuzi, bachita imvutyo kumakala ayaka akupanga zilwanio mbuli mulimo wakwe, alimwi ndakalenga sikunyonyoona kuti anyonyoone. ¹⁷ Takukwe chilwanio chibambilidwe nduwe chiyozwidilila; alimwi uyoopa mulandu boonse bakupa mulandu, olu ndolukono lwabalanda ba Jehova, alimwi kululamikwa kwabo kuzwa kulindime - oku nkokwamba kwa Jehova.''