¹ Buka,buka,zwata nguzu zyako, Ziyoni; zwata magubo aako mabotu, Jelusalema dolopo lisalala: nkaambo takwe nibachiyokunjila lubo pe batapalwidwe abasofwede. ² Lizakamune kuzwa kulusuko; buka ukkale, Jelusalema; gwisya nketani munsingo yako, yomusungwa, mwana musimbi waZiyoni. ³ Nkaambo mbuboobo mbawamba Jehova, ''Takwe muulo ngomwakawuzigwa awo pe, alimwi muyofutulwa kakutakwe mali,'' ⁴ Nkaambo mbuboobo mwami Jehova mbwaamba, ''Kumatalikilo bantu bangu bakiinka aansi kuti bakajanane bukkala mu Ijipiti; alimwi Asiliya wabadyamizya kakutakwa kaambo kabotu pe. ⁵ Lino niinzi nchindilaacho ano -echi nchaambilizyo chaJehova- mukubona kuti bantu bangu bakabwezegwa biyo ? Aabo babatonga balikubaseka- eechi nchaambilizyo chaJehova- alimwi zina lyangu lilikupwapwa kwalyoonse buzuba boonse. ⁶ Nkinkaako bantu bangu bayooziba zina lyang; bayooziba muleelyo zuba kuti Ndime ndaamba, ''Iyi, Ndime!'' ⁷ Mabotu biyeni mano aazilundu abatumwa beeta makani mabotu, bambilizya luumuno, bajisi busanambi bubotu baambilizya lufutuko, baamba kuli Ziyoni, ''Leza wako ulikukwendelezya!'' ⁸ Swilila, basikulinda bako batola mujulu majwi abo, antomwe bawompolweda kubotelwa , nkaambo bayoobona , alimwi aya meso aabo, kuboola kwaJehova kuZiyoni. ⁹ Amumanikizyanie antomwe mukwiinda kukubotelwa, nomatongo aaJelusalema; nkaambo Jehova wawumbulizya bantu bakwe; wafutula Jelusalema. ¹⁰ Jehova wabikka jaanza lyakwe lisalala kunembo lyazisi zyoonse; nyika yoonse iyoobona lufutuko lwaLeza wesu. ¹¹ Enda,enda , koya aawo, utagumi chitu chisofwede; bbuda mukati kakwe; lisalazye, iwe nobweza zibelesyo zyaJehova. ¹² Nkaambo tokoyoozwa anze chakuchijana pe, nekuba kuyozwa chakudoneka; nkaambo Jehova uyozwa kunembo lyako; alimwi Leza waIzilayeli uyoba mulindizi wakumbali lyako. ¹³ Bona, mubelesi wangu uyochita chabusongo; uyolampa akusumpulwa, alimwi uyosumpulwa. ¹⁴ Mbuli biingi mbubakayowa kuli nduwe- bube bwakwe tebwakazibinkana kwinda echo chamutu ulibiyeni, alimwi chimo chakwe techachili kulangika mbuli muntu pe. ¹⁵ Nikuba boobo, mubelesi wangu uyosansila zisi zyiingi abami bayojala milomo nkaambo kakwe.Nkaambo echo nchibakatabuzigwa, bayochibona, alimwi echo nchibakatanamvwa, boyochimvwisisya.