¹ Amuswiilile kulindime nyebo nimuyandisya bululani, inywebo nimuyandawula Jehoa: Amulange kubbwe ooko nkomwakabezululwa akulubwebwele ooko nkumwakazubulwa. ² Amulange kuliAbbulamu, wuso, akuli Sala, wakamuzyala; nkaambo kuchiindi nchakachili aalike mwaini, ndakamwiita. Ndakamulongezya akumuchita kuti avule. ³ Iyii, Jehova uyoowumbulizya Ziyoni; uyoowumbulizya masena woonse aaswekede; chimpayuma chakwe wakachichita mbuli Edeni, alimwi munkanda iikwazeme kumbali lyamumpata wamulonga waJodani mbuli muunda waJehova; lukondo abusekelezi buyoojanwa mulinguwe, chilumbo ajwi lyakwiimba. ⁴ ''Amundiswilizye loko, nobantu bangu; alimwi muswilile ndime, nobantu bangu! Nkaambo ndiyoopa mulawu, alimwi ndiyochita lubeta lwangu kuti lukabe mumuni wazisi. ⁵ Bululami bwangu bulaafwiifwi, lutuko lwangu luyoboneka aanze, alimwi jaanza lyangu liyoobeteka zisi; nyika zyakunkombwe yalwizi ziyondilindila; nkaambo bayolindila kuboko kwangu. ⁶ Amulansye meso aanu kujulu, alimwi mulange nyika yaansi, nkaambo majulu ayomwayika mbui busi, nyika iyoosama chikkobela, alimwi bakkede mulinjiyo bayoofwa mbuli nzi. Pesi lufutuko lwangu ndwalyoonse, alimwi bululami bwangu tabukoyooleka kubeleka. ⁷ Amundiswiilile, nywebo nomuzi bululami, bantu bajisi mulawu wangu mumyoyo yabo: Utayoowi chisapi chamuntu, nekuba kudyamizigwa akubisya kwabo. ⁸ Nkaambo mapempe ayoobalya mbuli chikobela mbuchilyigwa, alimwi amvwinyu ziyoobalya mbuli kulyigwa kwaboya bwambelele; pesi bululami bwangu buyooba bwalyoonse, alimwi lufutuko lwangu kuzyalani lyoonse.'' ⁹ Buka, buka, ulisamike inguzu, ajaanza lyaJehova. Buka mbuli kumazuba aakamana, mumazyalani abasikale, Teensi nduwe wakapwachuula Lahabbu, akuyasa munyama uyoosya? ¹⁰ Teensi nduwe wakayuminizya lwizi, maanzi mapati aanikide, alimwi wakachita nzila aakati kalwizi kuti banunwidwe bakiinde? ¹¹ Chibbadazyo chaJehova chiyooboola akusika kuZiyoni chakulila akukondwa akusekelela kwalyoonse aatala amitwe yabo; alimwi kusekekelela alukondo luyoobazulwida, alimwi bbusu akulila kuyobasiya. ¹² Ime, ime, ndime ikuumbulizya. Nkamboonzi nimuyowa bantu, abo bafwa, bana balombe bamisyobo yoonse, bakachitwa mbuli bwizu? ¹³ Nkamboonzi niwaluba Jehova mulengi wako, wakatanbabika majulu wabika ntalisyo yanyika? Ulimukuyoowa kupati buzuba boonse nkaambo kakunyema kwamudyaamizi eelyo nayeya kumujeya. Kulaali kunyema kwamudyaamizi? ¹⁴ Ooyo uukoteme, Jehova uyoofwambaana; takoyoofwa akutanjila mugodi, nekuba kubula chibunge. ¹⁵ Nkaambo ndime Jehova Leza wako, uubusya lwizi kuti mayuuwe avuume - Jehova wamakamu ndezina lyakwe. ¹⁶ Ndabika majwi aangu mumulomo wako, alimwi alimwi ndamuvumba amweenzule waluboko lwangu, kuti nkabyale majulu, ndikayale ntalisyo yanyika, alimwi wambila Ziyoni kuti, ''Muli bantu bangu,''' ¹⁷ Buka, buka, yimikilaJelusalema, webo nowakanywida muluboko lwaJehova kuzwa kuchinywido chabukkali bwakwe; iwebo nowakanywida muchinywido kuzwa kunkomesi iidadalisya. ¹⁸ Takwe naba oomwe akati kaboonse bana balombe bakazyalwa kuti bamuchenjezye; takwe naba omwe aakati kaboonse bana balombe mbaakabusya kuti bamujate luboko. ¹⁹ Mapenzi aaya obile achitika kulinduwe - nguuni utikuumbulizye? - mpawo kumatongo aakanyonyoka, alimwi bbalangwe apanga nguni uyookumbulizya? ²⁰ Bana bako balombe bayomana nguzu; baloona boonse kwamigwagwa yamuzyooko, mbuli lweengu mukazamba; Bazuzigwa bukkali bwaJehova, alutapatilo lwaLeza wanu. ²¹ Pesi lino amumvwe ezi, nywebo nimudyamizigilwe animukoledwe, kutaamba kukolwa kwawayini: ²² Jehova Mwaani wanu, Leza wanu, uubeteka makani aabantu bakwe, mbuboobu mbwaamba, ''Boona, ndakubwezela nkomeki yakudadalika kuzwa kujaanza lyako - achibikilo, eeyi ninkomeki yabukkali bwangu - kuchitila kuti utakanywi lubo. ²³ Njoyibika mujaanza lyabasikukpenzya, aabo bakaamba kuti kulinduwe, 'Wona aansi, kuti tukeende aatala lyako; wakachita sule lyako mbuli nyikaalimwi mbuli tugwagwa ntubeendela.''