¹ Mbuboobu mbawamba Jehova, ''Lulikuli lugwalo lwakulekana ndundakaleka aabo banyoko? Kuli bali basizikwelelte bangu mbindakakuuzizya? Bona, wakawuzigwa akaambo kazibi zyako, alimwi akaambo kabupapi bwako, baamako bakatandigwa. ² Nkaambonzi nindakasika pesi tekwakali naba womwe ooko? Nkaambonzi nindakayita pesi takwe naba womwe wakandisandula? Sa kuboko kwangu kwakali kufwifwi loko kuliya mali yachinunuzyo? Sa temwakali nguzu mulindime zyakukuvuna? Langa, kukukasya kwangu lwizi lwayuma; ndachita milonga kuti ibe nkanda; inswi zyayo zilafwa akaambo kakubula manzi alimwi zilabola. ³ Ndazwaatika julu amudima; ndalivumba amasaka.'' ⁴ Mwami Jehova wakandipa lulimi mbuli lwawumwi wabaabo bakayiisigwa kuchitila kuti ndaambe akukkalilila kwajwi kulibabo bakompeme; ulandibusya chifumo achifumo; ubusya kwitwi kwangu kuti kumvwe mbuli aabo bayiisigwa. ⁵ Mwami Jehova wajula matwi angu, alimwi tendakaba mupapi pe, naakuti tendakabweedela musule. ⁶ Ndakafutatila aabo bakanduuma, alimwi zikowe zyangu kuli baabo bakadunsula bulungu bwangu; Tendakasisa busyu bwangu kumilimo iigambya akubusya nkondo. ⁷ Nkaambo Mwami Jehova uyondigwasya; akaambo kaako tandibulide choolwe pe; aboobo ndachita busyu bwangu mbuli chibikilo, nkaambo ndilizi kuti tandikoyoobikwa mumawuse. ⁸ Ooyo uyondilulamika uli afwifwi. Ngwani uyondikazya? Atwiime akulangana umwi awumwi. Ngwani sikunditamikizya? Mumuleke asike afwifwi andime. ⁹ Bona, Mwami Jehova uyondigwasya. Ngwani uyondaamba kuti ndime simulandu? Bona, boonse bayozakala mbuli chizwaato; busibiibi buyomulya. ¹⁰ Ngwani aakati kanu uyowa Jehova? Ngwani ulemeka ijwi lyamulanda wakwe? Ngwani weenda mumudima uusiya mbi katakwe lampi? Weelede kusyoma zina lyaJehova akugaminina kuli Leza wakwe. ¹¹ Mulange, moonse nimumunika mulilo, nimulibambila lwenu beni azimunisyo: mweende mumumuni wamulilo wanu amumabangabanga aawo ngimwayasya. Eechi nchenchicho nchimwakatambula kulindume: Uzolala ansi mubusena bwamapenzi.