¹ Amundiswilile, inywebo nonyika zyamunkomwe! Lino ngamundiswilizye, inywe nobantu balikulaale. Jehova wakandiita azina kuzwa kukuzyalwa, eelyo baama nibaka ndeeta munyika. ² Wakachita mulomo wangu wabosya mbuli panga; wakandisisa mumwenzule wajaanza lyakwe; wakandichita ndaba kanta kang'ayima; wakandisisa munkomo yakwe. ³ Wakati kuli ndime, ''Ulimulanda wangu, Izilayeli, kwinda muli nguwer ndatondezya bulemu bwangu.'' ⁴ Pesi ndakavuwa, ''Nikuba ndayeyesya anga ndakabeleka chabuyo, Ndakabelesya nguzu zyangu aatakwe, ano lwangunuko lwangu luli a Jehova, alubo impindu yangu ili a Leza.'' ⁵ Lino wakambula - oyo wakandibumba kukuzyalwa kwangu kuti ndibe mulanda wakwe, kuboozya Jakobo alimwi kuli nguwe, nkokuya Izilayeli abungane kuli nguwe, nkinkaako ndalemekwa mumenso a Jehova, alimwi Leza wabanguzu zyangu -- ⁶ alimwi ulaamba, ''Nchintu chinini loko kuli nduwe o mulanda wangu kubusiluzya mukowa wa Jakobo, alimwi akuboozya bakachaala ba Izilayeli. Ndiyokuchita ukabe mumuni ku Bazwakule.'' ⁷ Ezi nzenzizyo Jehova Leza nzyawamba, Mununuli wa Izilayeli, Uusalala Alikke, kulooyo buumi bwakwe bulangililwa ansi, usulidwe amanyika, alimwi muzike wabendelezi, ''Baami bayokubona akukubukila, alimwi bana babaami bayokubona akukukotamina ansi, nkambo ka Jehova usyomekene, naba oyo Uusalala Umwi wa Izilayeli, oyo iwakakusala webo.'' ⁸ 'Mbuboobu mbwawamba Jehova, ''Muchiindi nchindayeeya Ndiyokutondezya luyando lwangu Ndiyokusandula, alimwi mubuzuba bwalufutuko lwangu Ndiyokugwasya, Ndiyo kukwabilila, alimwi Ndiyokupa mbuli chizuminano chabantu, kuyakulula nyika, kuchitulula tongo kulukono. ⁹ Uyowamba kubaangidwe, 'Muzwe aanze; kulibaabo bali mung'anda zisiya zyabaangidwe, 'Mulitondezye lwanu.'Bayochela kumbali lyamigwagwa, alimwi nyika zyonse zikuneme zitakwe zintu ziyooba machezezyo aabo. ¹⁰ Tabukoyooba anzala nikuba nyota, nanka kupya naa izuba talikoyobawumpa, nkinkaako oyo ulaluzyalo uyobazulwida; uyobeembela kusika kumasawu amanzi. ¹¹ Eelyo Ndiyochita malundu aangu wonse kuba migwagwa, alimwi Ndiyochita migwagwa mipati bweelene.'' ¹² Langa, ezi ziyosika kuzwa kule loko, zimwi kuzwa kunyika akumusanza; azimwi kuzwa kunyika ya Sinimu. ¹³ Yiimba, amajulu, alimwi ubotelwe, anyika; njila mukwiimba lwako azilundu! Mbubo Jehova ulawumbulizya bantu bakwe, alimwi uyobabeda luzyalo bapenzedwe bakwe. ¹⁴ Pesi Ziyoni waamba, ''Jehova wanditakata, alimwi Mwami wandiluba.'' ¹⁵ Ngankubona mwanakazi ulaluba muvwanda wakwe, unyonka kunkolo zyakwe, elyo unoli takwe luzyalo pe amwana mulombe ngwakatumbuka? Iyii, balakonzya kuluba, pesi Nsikonzyi kuluba. ¹⁶ Langa, Ndalemba izina lyako amanza aangu; bulambo bwako buli kunembo lyangu mbobiya. ¹⁷ Bana bako balachijanina musule, nikuba aaba bakakumwaya bayobuzwa. ¹⁸ Kolanga mumbali ubone, boonse balikubungana akuza kulinduwe. Masimpe mbuli mbwempona --aaya malayilile a Jehova - nchobeni uyobazwata mbuli chilisakatizyo, alimwi uyobasama mbuli nabwinga. ¹⁹ Nikuba tewakalikwe lugwasyo wakali tongo, inyika yakali matongo, kwalino uyocheya loko kulibatakakkale mumo, abaabo bakakulya bayoba kule loko. ²⁰ Bana bakazyalwa muchindi nwakafwide bayowamba komvwide, 'Busena mbuniini loko kuli ndiswe, tuchitile ng'anda, kuti tukkale aano.' ²¹ Nkabela uyolibuzya omwini, 'Ngwani wanditumbukila bana aaba? Ndakali fwide alimwi ndakali ngomwa, muzike alimwi ndakali lekedwe. Ngwani wakakomezya bana aaba? Langa, Ndakali syede endikke; nkokuli nkubakazwa aaba ?'''' ²² Mbuboobu mbwawamba Mwami Jehova, ''Langa, Ndiyo nyampla kuboko kwangu kumanyika; Ndiyonyampula ndembela yachitondezyo kubantu. Bayoyeta bana bako basimbi amakkuko aabo. ²³ Baami bayoba mataata balela bana, alimwi abanakazi babaami bayooba basimulela bana bak; bayokukotamina masyu aabo anyika akumyankuta suko lyaku mawulu aako, alimwi uyoziba kuti Ndime Jehova; aabo bandilindila tabakoyofwa bweeme pe.'' ²⁴ Nkubona nzibalekede zilatolwa kuzwa kuli silumamba na bazike balavunwa kuzwa kuli bayoosya? ²⁵ Pesi mbuboobu mbwawamba Jehova, ''Iyii, bazike bayotolwa kuzwa kuli silumamba, alimwi azibolede ziyovunwa; eelyo Ndiyokazyania aba sinkondonyokwe akuvuna bana bako. ²⁶ Ndiyosanina badyamizyi bako anyama yabo beni; alimwi bayokolwa abulowa bwabo, mbuli mbotatedi niwayini. Nkabela yoonse misyobo yabantu iyoziba kuti Imebo, nde Jehova, ndili mufutuli wako alimwi ndendime Mununuli, Mupati Kampatila wa Jakkobbu.''